Read lulogooli Vikolwa 7 Bible Online

Vikolwa 7 - lulogooli bible

Vikolwa 7

¹Musalisi munene ya teva Stefano, Ni ndiyo amakuva yaga?

²Ya tivula. Mwinye avamitu navadada, mu hulire: Nyasaye wobukumi ya loleka ku guga wetu Abrahamu, lwa ya li mu Mesopotamia, inyinga ya li na a kikiri kumenya Harani,

³na a mu volera, Twula mu kivala kikyo, u leke avandu vovo, u tsie mu kivala kya ndi ku mannya.

⁴Ku, ya twula mu kivala kya Vakalidei, na a menya Harani: na kutwula yaho inyima welikudza lya dada wewe, Nyasaye ya mwadikidza na a mu leta mu kivala yiki kya mwinye mu menya mu kalunu:

⁵kandi si ya mu ha mu miyandu, kali gya a vika ku kirenge: na a lagana naye a la mu ha kivala yiki ki ve kikye kandi kyavana veve venyima, lwa ya li na a ta li nomwana.

⁶Nyasaye ya vola kuli yaga, avana veve va la menya mu kivala kyobugeni, navo va la va kola avatugwa vavo, na va la va dambidza mihiga tsimia tsine.

⁷Kandi Nyasaye ya vola, Avandu vehiri yiyo, i la va kola avatugwa vayo, nda va kalagira amakuvagavo: kandi inyima ya yaga va la twula navo va la ntumekira hano.

⁸Kandi ya va ha lilaga lyokukebwa: ku, Abrahamu yivula Isaka, na a mu keva ku lidiku lya gatanu na gavaka; Isaka yivula Yakobo, na Yakobo yivula avaguga vetu likumi na vaviri.

⁹Avaguga vetu yavo va li nembodoka ku Yosefa, ni va mu gula a tsie Egepeti: kandi Nyasaye ya li halala naye,

¹⁰na a mu twulidza mu busaliri bwibwe bwosi na a mu ha ubulahi nobugeeri imbiri wa Farao, mwami we Egepeti; na Farao ya mu kola munyampara mu Egepeti nomu inyumba yeye yosi.

¹¹Ku, inzala yadza mu kivala kya Egepeti kyosi nomu Kanani, kandi ubusaliri bunene: navaguga vetu si va nyola vyokulia.

¹²Navutswa Yakobo lwa ya hulira ubuswage bu veye mu Egepeti, ya tuma vaguga vetu inyinga yembiri.

¹³Mu lugendo lwa kaviri Yosefa yevuula ku vamwavo veve; kandi ihiri ya Yosefa ya vuulika ku Farao.

¹⁴Kandi Yosefa ya tuma na a langa dada wewe Yakobo yadze kuye, navandu veve vosi, avandu makumi gatanu na gaviri navandu vatanu.

¹⁵Ku, Yakobo ya sulunguta Egepeti. Kandi ya kudza mwene navaguga vetu;

¹⁶ni va gingwa ni va hilwa Shekem, ni va vikwa mu kilindwa kya Abrahamu ya gula nobuguli bwefetha ku vana va Emori mu Shekem.

¹⁷Navutswa lwa ya li ni yenya kuduka inyinga yelisuuviridza lya Nyasaye ya laga Abrahamu, avandu va landa na va dasika mu Egepeti,

¹⁸ya luha na a duka mwami wundi we Egepeti wa vula kumanya Yosefa.

¹⁹Uyu ya kola ubugeeri bwobugadi ku ihiri yetu, na a dambidza vaguga vetu va te avana vavo kyova va ta va mwoyo.

²⁰Inyinga zana Musa yivulwa, na a va mulahi munononona a lerwa imyeli gyivaka mu inyumba ya ise:

²¹kandi lwa ya tebwa kyova, mukana wa Farao ya mu dola na a mu lera na a mu kola mwana wewe.

²²Ku, Musa yegidzwa ubugeeri bwosi bwa Vaegepeti; kandi ya li netsingulu ku makuva gege noku miyinzi gyigye.

²³Navutswa lwa ya li himbi kuduka mihiga makumi gane, ga duka mu mwoyo gwigwe a tsie kulola avamwavo veve, avana va Israeli.

²⁴Na a lola mulala ya dambidzwa ya mu gayira na a mu kalagira ku ma kuva na a dambidzirwa, na a kuya Muegepeti.

²⁵Kandi ya ganagana avamwavo veve va manya Nyasaye u va he ubuhonnyi nomukono gwigwe: navutswa si va manya.

²⁶Mugamba ya nyola ava kupana ni yenya kuvahambannya, na a vola, Vasatsa mwinye mu veye avamwavo kigira ki mwononnyana?

²⁷Navutswa uyu wononnya mutende wewe ya mu luguta, na a mu teva, Ibwaha ya ku vika u ve munene nomukalagi ku kwinye?

²⁸Wenya kunziita kuli wiiti Muegepeti mgolova?

²⁹Musa yiruka ku livola yilyo, na a gwa mugeni mu kivala kya Midiani, ni yivulira vo avana vaviri vayai.

³⁰Kandi lwa ya mala mihiga makumi gane, ingelosi ya loleka kuye mu kyangalangwi kyekigulu kya Sinai, mu lumemo lwomuliru mu kasala.

³¹Kandi Musa lwa ya gu lola, ya genya lilola yilyo; ni yenya kwisunda himbi kuhenza, mwoyo gwo Mwami gwadza,

³²ni gu vola, Inze mbeye Nyasaye wavaguga vovo, Nyasaye wa Abrahamu, na Isaka, na Yakobo. Musa ya degera, kandi si ya lema mwoyo kuhenza.

³³Kandi Mwami ya mu volera, Twulidza vilatu mu virenge vivyo: kigira ha u singiye ni lirova litakatifu.

³⁴Lilola nda lola ubusaliri bwavandu vange ava veye mu Egepeti, kandi mmali kuhulira ubukenyi bwavo, na inze mmali kwika nduke kuvahonnya. Kalunu hamba, nda ku tuma kutsia Egepeti.

³⁵Musa uyu wa va sula, va vola, Ibwaha ya ku vika u ve munene nomukalagi? Niye wa Nyasaye ya tuma a ve munene nomubohololi, nomukono gwengelosi wa loleka kuye mu kasala.

³⁶Mundu uyu ya vimirira kutwula, inyima wa ya kola vyokugenya nevilolekidzu mu Egepeti, nomu Inyanza Inzakanyu, kandi mu kyangalangwi imihiga amakumi gane.

³⁷Uyu ni Musa uyo wa volera avana va Israeli, Nyasaye a la mu singeridzira muprofeti u li twula mu vamwavo venyu, u fwanana na inze.

³⁸Uyu niye wa li mu livugana mu kyangalangwi halala nengelosi wa volerana naye mu kigulu kya Sinai, kandi navaguga vetu: wa vugula livola lyeliva mwoyo kuha kwinye.

³⁹Vaguga vetu si va bugirira kumuhulira uyu navutswa va mu luguta a twule kuvo kandi mu myoyo gyavo virana Egepeti,

⁴⁰ni va volera Haruni, U ku lombere vanyasaye va kwimirire: kigira Musa uyu wa kwimirira kutwula mu kivala kya Egepeti, si ku manya kya mu gwira.

⁴¹Kandi mu madiku yago va lomba kifwananywi kyekimoli, ni va leta isadaka ku musambwa, ni va sangala ku miyinzi gyemikono gyavo.

⁴²Navutswa Nyasaye ya girunkana na a va leka va tumekire lihe lyomigulu; kuli ga ng'odwa mu kitabu kyavaprofeti Mwa ndetera tsinyama tsinziite netsisadaka Imihiga makumi gane mu kyangalangwi, mwinye venyumba ya Israeli?

⁴³Kandi mwa vugula lihema lya Moloka, Kandi ing'ereng'ani yomunyasaye Rafan, Vifwananywi vya mwa lomba mu duke kuvisigamira: Na inze nda mwadikidza mu tsie kuvita Babuloni.

⁴⁴Vaguga vetu va li nelihema lyokulolekidza mu kyangalangwi, kuli wa ya laga, wa volera Musa, a li lombe li fwanane nekya ya lola.

⁴⁵Lya vaguga vetu mu inyinga yavo, va li leta halala na Joshua lwa va vugula kivala kyetsihiri, tsya Nyasaye ya kunga imbiri wetsimoni tsyavaguga vetu kuduka ku Daudi;

⁴⁶wa nyola tsimbabasi imbiri wa Nyasaye, kandi yenya kumullyolera Nyasaye wa Yakobo ha a menya.

⁴⁷Navutswa Solomoni ya mwombakira inyumba.

⁴⁸Navutswa U Veye Igulu Ligali si a menya mu tsinyumba tsyombakwa na makono; kuli muprofeti a vola,

⁴⁹Ligulu ni kisako kyange kyobwami, Nelirova ni kisako kyevirenge vyange: Mwami a vola, Ni inyumba ki ya mu li nyombakira? Naho ni ha li ha hobusosi bwange?

⁵⁰Si gwa li mukono gwange gwa lomba vindu yivi vyosi?

⁵¹Mwinye avamagoti madinyu, avemyovo gyenyu namatu genyu vya vula kukebwa, mwinye kazozo mu hingidza Roho Mutakatifu: kuli vaguga venyu va kola, kandi mwinye mu kola.

⁵²U li ha ku vaprofeti, vaguga venyu va vula kudambidza? Kandi va viita yavo ava tanga kumannya lidza lyo Mulungi; wa mwinye kalunu mu mali kugwa avazami naviiti;

⁵³mwinye mwa vugula lilaga kuli gyetsingelosi va laga, kandi si mwa gyi gumira.

⁵⁴Lwa va hulira vindu yivi, va vihirirwa mu myoyo gyavo, ni va lumannya amino gavo kuye.

⁵⁵Navutswa naye ya manya ni yizula Roho Mutakatifu, ni yumika na a henza migulu, na a lola ubukumi bwa Nyasaye, na Yesu u singiye ha mukono mulungi gwa Nyasaye,

⁵⁶na a vola, Henzi, ndola ligulu li kunulwa, no Mwana wa Adamu u singiye ha mukono mulungi gwa Nyasaye.

⁵⁷Navutswa va hanzuka, ni va kunika amatu gavo, ni va mwitsunira halala.

⁵⁸Kandi va mu ta kyova welidala, ni va mu lasa magina: navaloli va vika tsingubo tsyavo ha virenge vyomundu musoleli wa langwa Saulo.

⁵⁹Ni va lasa Stefano magina, naye ya manya ni yanira ku Mwami, na a vola, Mwami Yesu, vugula mwoyo gwange.

⁶⁰Kandi ya sigama na a hanzuka na a vola, Mwami, u ta vika kuvo ubwoni yibu. Kandi lwa ya mala kuvola yaga, ya gona.