Read lulogooli Varumi 10 Bible Online

Varumi 10 - lulogooli bible

Varumi 10

¹Avamitu, livanza lyomwoyo gwange, nelisaala lyange ku Nyasaye kigira yavo, li veye va honnywe.

²Kigira mba lolekidzira va veye nobugulu bwa Nyasaye, navutswa si bwa li mu limanya.

³Kigira, lwa va vula kumanya ubulungi bwa Nyasaye, kandi lwa venya kusingeridza bwavo avene, si vege hidza ku bulungi bwa Nyasaye.

⁴Kigira Kristo a veye limaliridza lyelilaga ku vosi ava suuvira.

⁵Kigira Musa a ng'oda, mundu u kola bulungi bwelilaga a la va mwoyo kubwo.

⁶Navutswa ubulungi bwelisuuvira bu vola ndi, U ta vola mu mwoyo gugwo, Ibwaha u lyanegira mwigulu? (Nago nokuleta Kristo hasi)

⁷naho, Ibwaha u liika mu bogo? (Nago nokutwulidza Kristo mu vakudzu).

⁸Navutswa ga vola ki? Likuva yili li veye himbi nive, mu munwa gugwo, kandi mu mwoyo gugwo, nalyo li veye likuva lyelisuuvira lyokwilwadza:

⁹kigira nu u va nu weyama nomunwa Yesu a veye Mwami, nokusuuvira mu mwoyo gugwo Nyasaye ya mu twulidza mu vakudzu u la honnywa.

¹⁰Kigira mundu a suuvira nomwoyo a duke ku bulungi; ni yeyama nomunwa a duke ku buhonnyi.

¹¹Kigira ma ng'oda ga vola, Ku vosi u mu suuvira si a li va soni.

¹²Kigira si ha veye nelyavukana mu Vayuda na Vegreki: kigira uyu Mwami mulala a veye Mwami wa vosi, kandi a veye mutugi ku vosi ava mwanira:

¹³kigira, Ku vosi u lyanira ku lieta lyo Mwami a la honnywa.

¹⁴Kunangwa va lanira ndi ku uyu wa va vula kusuuvira? Nandi va la suuvira ndi ku uyu wa va vula kuhulira? Kandi va la hulira ndi bugira mwilwadzi?

¹⁵Kandi va lilwadza ndi bugira kutumwa? Kuli wa ga ng'odwa, Avya li vilahi ki ivirenge vya yavo ava leta amakuva gevindu vilahil.

¹⁶Navutswa si va li vosi ava bugirira ivangeli. Kigira Isaya a vola, Mwami, ibwaha u suuvira livola lyetu?

¹⁷Kunangwa na ndiyo lisuuvira li dukira ku lihulira, nelihulira li dukira ku likuva lya Kristo.

¹⁸Navutswa nteva, Si va hulira? Yee, ligali, Lwanga lwavo lwa twula nokuduka mu lirova lyosi, Kandi amakuva gavo ga duka ku tsindulu tsyelirova.

¹⁹Navutswa nteva, Avaisraeli si va manya? Kutanga Musa a vola, Nda mu kendekidzira ava ta li ihiri, Kandi nda mu vihiriridzira ihiri i ta li nelimanya.

²⁰Kandi Isaya a luvirira ligali, na a vola, Nda loleka ku randu va ta nyenya; Nda lang'ama ku yava ava ta nteva.

²¹Navutswa ku Vaisraeli a vola, Mbasu pei nda nyira makono gange ku vandu va vula kuhulira navahangali.