Read lulogooli Varumi 14 Bible Online

Varumi 14 - lulogooli bible

Varumi 14

¹Navutswa uyu u veye mudedekere mu lisuuvira, mu mu bugirire, navutswa ga ta va agelikalaga amakuva gelihayahayidza.

²Mundu mulala a veye nelisuuvira lyokulia vindu vyosi: navutswa uyu mudedekere a litsanga tsingutsa.

³Uyu u litsanga a ta lega uyu u ta litsanga; kandi uyu u ta litsanga a ta kalagira uyu u litsanga: kigira Nyasaye u mali kumubugirira.

⁴Ive u veye bwaha u kalagira mutumwa wowundi? Ku mwami wewe mwene a singiranga kinga a gwidza. Ligali a la singiridzwa; kigira Mwami a veye netsingulu kumusingiridza.

⁵Mundu mulala a yanza lidiku lilala kuvita lidiku lindi: wundi a yanza madiku gosi halala. Avandu vosi sa mulala a manyeridze ligali mwoyo gwigwe mwene.

⁶Uyu u yanza lidiku, a li yanzira ku Mwami: kandi uyu u litsanga a litsanga ku Mwami, kigira a santidza Nyasaye; kandi uyu u ta litsanga, livula kulia lilye li twula ku Mwami, kandi a santidza Nyasaye.

⁷Kigira si ha veye nomulala ku kwinye wekolera agege mwene mu livamwoyo, kandi si ha veye nomulala wekolera agege mwene mu likudza.

⁸Kigira ni ku va ni ku veye mwoyo ku vera mwoyo ku Mwami, kinga ni ku va ni ku kudza ku kudzera ku Mwami: kunangwa ni ku va ni ku veye mwoyo, naho ni ku va ni ku kudza, ku veye avo Mwami.

⁹Kigira Kristo ya kudza na simuguka kandi, a duke kuva Mwami wetsing'ano tsyombi avakudzu kandi wa va veye mwoyo.

¹⁰Navutswa ive kigira ki u kalagira amwavo wowo? Kandi ive kigira ki u lega amwavo wowo? Kigira vosi ku la singira imbiri wekisako kyekyina kya Nyasaye.

¹¹Kigira ga ng'odwa, Kuli inze mbeye mwoyo, Mwami a vola amasigamo gosi ga la sigama imbiri wange, Ne tsinimi tsyosi tsi leyama imbiri wa Nyasaye.

¹²Kunangwa kwinye kwosi sa mulala alevolera amakuva gege mwene imbiri wa Nyasaye.

¹³Na ndiyo li ta va mu kwinye likalagirana avene navene: navutswa nu bulahi mu kalage yaga, mundu kali mulala a ta vikira amwavo wewe kyokumwikigitalidza, kinga kyokumuzoma hasi.

¹⁴Mmanya, kandi nungikeywi ligali, mu Mwami Yesu si ha veye nekindu ki veye kidamano kyene: navutswa ku uyu u lola ki veye kidamano, ku uyu ki veye kidamano.

¹⁵Kigira amwavo wowo na va na a verera kigira vyokulia, su u gendanga mu buyanzi kandi. U tononnya nevyokulia vivyo uyu wa Kristo ya kudzera.

¹⁶Mu ta leka ubulahi bwenyu bu nyegwe:

¹⁷kigira ubwami bwa Nyasaye si bu veye kulia nokunwa, navutswa bu veye ubulungi nemirembe nobuyanzi mu Roho Mutakatifu.

¹⁸Kigira uyu u tumekira Kristo mu vindu yivi a yanzeka ku Nyasaye, kandi avandu va mu bugirira.

¹⁹Kigira yaga ku londe vindu vyemirembe, kandi vindu vyokukonyana.

²⁰Mu tononnya mivinzi gya Nyasaye kigira vyokulia. Ligali vindu vyosi vi veye vilahi; navutswa nu budamano ku uyu u litsanga ni yikigitala.

²¹Nu bulahi kuvula kulia inyama nokunwa iwaini, nokukola vyosi vyamwavo wowo yikigitala ku.

²²Lisuuvira lya u veye nalyo, u ve nalyo ive mwene imbiri wa Nyasaye. A veye nobugasu u tekalagira ku yiki kya a bugirira.

²³Navutswa uyu u hayahayidza na a lia, a kalagirangwa kigira a litsa bugira lisuuvira; namakuva gosi a ga ta veye mu lisuuvira ga veye ubwoni.