Read lulogooli Varumi 15 Bible Online

Varumi 15 - lulogooli bible

Varumi 15

¹Kalunu nu bulahi kwinye ava ku veye netsingulu ku ginge ubudedekere bwa va ta li netsingulu, ku vule kweyanzidza kwinye avene.

²Ku kwinye sa mulala a yanzidze umutende wewe ku bulahi kigira ubukonyi.

³Kigira Kristo mwene kandi si yeyanzidza mba; navutswa, kuli ga ng'odwa, Amanyego ga va nyeganga ive ga duka ku inze.

⁴Ki gira vindu vyosi vya tanga kung'odwa kale vya ng'odwa kigira lyegidzwa lyetu, ku lyekudzira kandi ku lilemeridza lyamang'oda ku duke kuva nelisuuviridzwa.

⁵Kalunu Nyasaye welyekudzira kandi welikiringannya a mu he mwoyo mulala mu Kristo Yesu:

⁶mwidzominye Nyasaye Dada wo Mwami wetu Yesu Kristo nembulirani nomunwa mulala.

⁷Kigira yaga mu bugirirane avene navene kuli Kristo ya bugirira mwinye, mu duke kwidzominya Nyasaye.

⁸Kigira mbola Kristo ya kolwa mutumwa wavakevwa kigira ageligali na Nyasaye, a duke kudinnya lisuuviridza lyavaguga ra hebwa,

⁹Kandi avandu ve Tsihiri va duke kwidzominya Nyasaye kigira tsimbabasi tsitsye; kuli ga ng'odwa, Kigira yaga nda kwidzominya imbiri we Tsihiri, Kandi ndimba ku lyeta lilyo.

¹⁰Kandi a vola, Mu sangale, mwinye Tsihiri, halala navandu veve.

¹¹Kandi, Mwidzominye Mwami, mwinye ave Tsihiri tsyosi; Kandi avandu vosi va mwidzominye.

¹²Kandi Isaya a vola Ki la vaho kitinya kya Jesse Kandi uyu a singira kwameha ku Tsihiri; Ave Tsihiri va la suuvira ku uyu.

¹³Kalunu Nyasaye welisuuviridzwa a mwizulitse ubuyanzi bwosi nemirembe mu lisuuvira, mu duke kukira lisuuviridzwa, mu tsingulu tsya Roho Mutakatifu.

¹⁴Avamitu vange, inze mwene nungikeywi ku mwinye, mwinye avene mwizuye ubulahi, kandi mwizuye limanya lyosi, kandi mu nyala kweganehidzana avene navene.

¹⁵Navutswa ng'odera mwinye nobuluviriri ligali ha luvega lulala, kumwidzulitsa kandi, kigira tsimbabasi tsya Nyasaye ya mpa,

¹⁶nduke kuva mutumwa wa Kristo Yesu ntsie ku Tsihiri, mba kolere ivangeli ya Nyasaye, kihaanwa kye Tsihiri ki duke kubu girirwa, Roho Mutakatifu na a mali kukitakasa.

¹⁷Kunangwa mbeye neliidzominya mu Kristo Yesu mu vindu vya Nyasaye.

¹⁸Kigira si nemi mwoyo kuvola vindu kali kilala ni vi ta li vya Kristo ya nkolidza ku lihulira lya ve Tsihiri mu livola nomu likola,

¹⁹mu tsingulu tsyevilolekidzu nevyokugenya, mu tsingulu tsya Roho Mutakatifu; kuduka kutwula Yerusalemi, netsimbega tsyosi kuduka Iluriko, nzilwadzi ivangeli ya Kristo ligali;

²⁰yee, ni ngeridza kuli wa nzilwadza ivangeli ntilwadza ha Kristo a mali kutalwa, ntombaka mmuse gwomundu wundi;

²¹na vutswa, kuli ga ng'odwa, Yava avamakuva gege ga ta duka kuvo, va la lola, Kandi yava ava ta hulira va la manya.

²²Kunangwa ndigalirwa hali kanyingi mbule kudza ku mwinye:

²³navutswa kalunu, kigira si mbeye nobwiyangu kandi mu tsimbega yitsi, kandi mihiga minyingi yigyi nda kayi rwa kuduka ku mwinye,

²⁴inyinga ya ntsia Sipania (kigira ng'anagana kumulola mu lugendo lwange, kandi mwinye mu nkonye kulwo, ni mba ni ntanga kusangala ni mwinye)

²⁵navutswa kalunu, mbola, ntsitsa Yerusalemi, ntumekira avatakatifu.

²⁶Kigira avandu va Makedonia na Akaiya va yanza kuhaana kihaanwa kigira avatakatifu avadaka ku ave Yerusalemi.

²⁷Kigira ga va yanzidza; kandi va veye neligovi lyavo. Kigira avandu ve Tsihiri ni va kole ywi avasangi ku vindu vyavo vya roho, va veye neligovi kuvo kuvakonya ku vindu vyoku mubiri.

²⁸Kunangwa lwa ndi maliridza inkuva yiyi, nokudukidza ligali ma kuyu yaga, nda vitira wenyu ni ntsia kuduka Sipania.

²⁹Kandimmanya lwa ndi duka ku mwinye, nda duka mu budukiru bwobugasu bwa Kristo.

³⁰Kalunu mmu goonya ligali, avamitu, ku Mwami wetu Yesu Kristo, kandi ku buyanzi bwa Roho, mwidinyeridze halala na inze mu lisaala lyenyu ku Nyasaye kigira inze;

³¹nduke kuhonnywa mu yava ava ta hulira ava veye mu Buyuda, kandi ubutumekiri bwange bwa ntumekira Yerusalemi bu bugirirwe ku vatakatifu;

³²nduke ku duka ku mwinye nobuyanzi ku bulaliri bwa Nyasaye, kandi nyole ubugasu halala nemwinye mwosi.

³³Kalunu Nyasaye wemirembe a ve halala nemwinye mwosi. Amini.