Read lulogooli Varumi 16 Bible Online

Varumi 16 - lulogooli bible

Varumi 16

¹Mbiki imbiri wenyu mbotso wetu Febe, u veye mutumwa welivugana li veye mu Kenkerea:

²mu mu bugirire ku Mwami, kuli wa ga dukira avatakatifu, kandi mu mu konye ku vindu vyosi vya yenya ku mwinye: kigira uyu mwene ya li mukonyi wavanyingi, kandi va konya inze mwene.

³Mu nchelidzire Prisila na Akula avayinzira halala ninze mu Kristo Yesu,

⁴ava haana magoti gavo kigira livamwoyo lyange; si mba santidza tsyeng'ine, navutswa mavugano gosi ge Tsihiri:

⁵kandi mu nchelidzire livugana li veye mu inyumba yavo. Kandi mu nchelidzire Epainito muyanze wange, u veye ubuhya bwa Asia ku Kristo.

⁶Mu nchelidzire Maria, wa mu kolera miyinzi minyingi.

⁷Mu nchelidzire Anderoniko na Junia, aviko vange, kandi va veye vahambe halala ninze, ava manyekana ku vatumwa, ava li mu Kristo imbiri wange.

⁸Mu nchelidzire Ampliato muyanze wange mu Mwami.

⁹Mu nchelidzire Urubano wa yinzira halala ninze mu Kristo, na Sitahusi muyanze wange.

¹⁰Mu nchelidzire Apele wa bugirirwa mu Kristo. Mu nchelidzire yavo avenyumba ya Arisitobulo.

¹¹Mu nchelidzire Herodioni mwiko wange. Mu nchelidzire yava avenyumba ya Narikiso, ava veye mu Mwami.

¹²Mu nchelidzire Turufana na Turufosa ava yinziri mu Mwami. Mu nchelidzire Perisi muyanze wa yinzira ligali mu Mwami.

¹³Mu nchelidzire Rufusu mutovole mu Mwami, kandi mama wewe, naye ni mama wange kandi.

¹⁴Mu nchelidzire Asunkirito, na Felegona, na Herime, na Pateroba, na Herima, na vamitu ava veye halala navo.

¹⁵Mu nchelidzire Filologo na Julia, na Nerea, nambotso wewe, na Olumpa, navatakatifu vosi ava veye halala navo.

¹⁶Mu chelidzane mwinye avene navene nelibusa litakatifu, Mavugano gosi ga Kristo ga chelidza mwinye.

¹⁷Kalunu mmu goonya ligali avamitu, mu henze yava ava leta lyavukana nelyekigitala, vi hing'ana namegidzo ga mweyegidza: kandi mu girunkane mu va leke.

¹⁸Kigira ava veye ndi si va tumekira Kristo Mwami wetu, navutswa va tumekira inda yavo, kandi va gada myoyo gya yava ava ta li nobudamano ku livola lyavo lidoto.

¹⁹Kigira lihulira lyenyu li vuuliki mu vandu vosi. Kunangwa nyanza ligali kigira mwinye: navutswa nyenyu mu ve avageeri ku malahi, kandi mu vule kuva nobugeeri ku madamano.

²⁰Nyasaye wemirembe a la syonola Setani isi wevirenge vyenyu kalunu ndi. Tsimbabasi tsyo Mwami wetu Yesu Kristo tsi ve nemwinye.

²¹Timoteo u yinzira halala ninze a mu chelidza; kandi Lukio na Yasoni, na Sosipataro, aviko vange.

²²Inze Teritio, wa ng'oda ibaruwa yiyi, nchelidza mwinye mu Mwami.

²³Gayo wa ng'enihi ho kandi u genihidzi livugana lyosi, a chelidza mwinye. Erasto umulindi wevindu vyelidala a mu chelidza, kandi Koarito amitu wetu.

²⁴Tsimbabasi tsyo Mwami wetu Yesu Kristo tsi ve halala ne mwinye. Amini.

²⁵Kalunu ku uyu u nyala kuluviridza mwinye kuli ivangeli yange kandi kuli lilwadza lyamakuva ga Yesu Kristo, kandi kuli livuulika lyagaviswa ga vikwa makiriri mu tsinyinga tsyemihiga nemihiga,

²⁶navutswa kalunu ga lang'aminyeywi ku makuva ga vaprofeti, kuli lilaga lya Nyasaye u veye wemihiga nemihiga ga mannyeywi ga duke ku Tsihiri tsyosi va duke ku lihulira lyelisuuvira:

²⁷Nyasaye u veye nobugeeri ye ng'ine, lidzominywa li ve kuye mihiga nemihiga kigira Yesu Kristo. Amini.