Read lulogooli Varumi 3 Bible Online

Varumi 3 - lulogooli bible

Varumi 3

¹Kunangwa Muyuda a vitira ki avandi? Naho likevwa li nyala ki?

²Li konya ligali ku gosi. Lwambiri kigira va hebwa lilinda lyelivola lya Nyasaye.

³Avalala ni va vula kusuuvira, ki la va ki? Iivula ku suuvira lyavo li nyala kwononnya ubusuuvirifu bwa Nyasaye?

⁴Auwa: leka Nyasaye a ve weligali, navutswa avandu vosi va ve avabehi; kuli ga ng'odwa, U hebwe ubulungi mu makuva gogo, Kandi u guute lwa u li duka mu likalaga.

⁵Navutswa kirage kyetu ni ki nyolira ubulungi bwa Nyasaye, lidzominywa, ku vole ndi? Nyasaye a veye nekirage u letanga kivi? (Mbola kuli mundu.)

⁶Auwa, li gali: kigira ni ga ve ndiyo, Nyasaye a nyala ndi kukalagira lirova?

⁷Navutswa ageligali ga Nyasaye ni ga kira lidzominywa lilye kigira ububehi bwange, Kigira ki inze nkalagirangwa kuli mwoni?

⁸Kandi kigira ki ku ta vola (kuli ku huudzirirwa, kandi kuli avandi va kira kuvola kwinye ku vola), Ku kole ubudamano, ubulahi bu duke? Iikalagirwa lyavo kuva voni ni lilungi.

⁹Kunangwa ikindu ki? Kwinye ku sira avandi? Auwa, ligali: kigira ku tangi kulola Avayuda na Vagreki, va veye vosi mu bwoni;

¹⁰kuli ga ng'odwa, Si ha veye nomulungi, kali mulala;

¹¹Si ha veye nomanyi mba, Si ha veye nowenya Nyasaye;

¹²Va yeka ha luvega vosi, vosi halala va gwiye ava ta konya kindu Si ha veye no u kola bulahi, kalimulala:

¹³Amadundu gavo ga veye kilindwa kyalamu; Netsinimi tsyavo va tumikiye ubugadi: Ubusungu bwenzoka bu veye mu minwa gyavo:

¹⁴Aveminwa gyavo gyi zuye vikyeno nobululu:

¹⁵Tsinduvatiru tsyavo tsi genda bwangu kutahidza masahi

¹⁶Ubwoneku nekivi ki veye ku tsinzira tsyavo;

¹⁷Si va manya mba inzira yemirembe:

¹⁸Si ha veye nokutia Nyasaye imbiri wetsimoni tsyavo.

¹⁹Kalunu ku manya gosi agelilaga lya vola, lya volera yavo ava veye mu lilaga; minwa gyosi gyi kunikwe, nelirova lyosi li letwe mu likalaga lya Nyasaye:

²⁰kigira imbiri wewe si ha veye nowomubiri u li volwa a veye nobulungi ku miyinzi gyelilaga; kigira limanya lyobwoni lidzira mu lilaga.

²¹Navutswa kalunu ubulungi bwa Nyasaye bu mali kulang'aminywa bugira lilaga, nabwo bu lolekidzwa nelilaga navaprofeti;

²²yibwo nobulungi bwa Nyasaye bu veye ku lisuuvira mu Yesu Kristo ku vosi ava suuviranga, kigira si ha veye nelyavukana.

²³Kigira vosi va kola ubwoni, va vula kuduka ku ubukumi bwa Nyasaye;

²⁴ni va kolwa ava lungi vutswa netsimbabasi tsitsye kigira buhonnyi obu veye mu Kristo Yesu:

²⁵wa Nyasaye ya lang'a minya a ve kyokwisayasayira, ku lisuuvira mu masahi gege. Kigira yaga Nyasaye a lolekidza ubulung bwibwe ku litwulidza bwoni bwembiri ku mwoyo, mu bwikudziri bwibwe

²⁶Ku lilolekidza lyobulungi, mbola, inyinga ya kalunu: mwene a ve mu lungi, kandi a ve muhaani wobulungi ku uyu u veye nelisuuvira ku Yesu.

²⁷Kunangwa liidzominya li veye haliha? Li twulidzeywi. Ku lilaga ki? Lyemiyinzi? Auwa: noku lilaga lyelisuuvira.

²⁸Ku vola mundu a hebangwa ubulungi kigira lisuuvira bugira miyinzi gyelilaga.

²⁹Nyasaye a ve wa Vayuda veng'ine naho? Si a li Nyasaye we Tsihiri kandi? Yee, nowe Tsihiri kandi:

³⁰kunangwa Nyasaye na a va na a ve mulala, kandi a la ha avakevwa ubulungi nelisuuvira, kandi a la ha ava vula kukev va ubulungi kigira lisuuvira.

³¹Kunangwa kwononnya lilaga ku lisuuvira yili? Auwa, ga ta va ndiyo, navutswa ku dinyeridza lilaga.