Read lulogooli Varumi 7 Bible Online

Varumi 7 - lulogooli bible

Varumi 7

¹Avamitu, si mu manya (kigira mbolera avandu ava manyi lilaga), lilaga lyameha ku mundu inyinga ya a veye mwoyo?

²Kigira mukali uyu u veye nomusatsa wewe, u boheywi nelilaga ku musatsa inyinga a veye mwoyo; navutswa musatsa na a kudzi u bohololwi ku lilaga lyomusatsa.

³Kunangwa, uyu na a va nomusatsa wundi inyinga musatsa wewe a veye mwoyo, a la langwa muheyi, navutswa musatsa wewe na a kudza u bohololwi ku lilaga, kali musatsa wundi na a mu hila si a nyala kulangwa muheyi.

⁴Kigira yaga, avamitu, mwinye kandi mu koleywi mu gwe avakudzu ku lilaga mu mubiri gwa Kristo; mu duke kuhambanywa ku wundi, ku uyu wa simugukidzwa kutwula mu vakudzu, kwinye ku duke kwamira Nyasaye makuyu.

⁵Kigira lwa kwa li mu liva lyomubiri, likayirwa lyo bwoni lya li mu lilaga lya kola mu vivero vyetu kuduka kwama makuyu gelikudza.

⁶Navutswa kalunu ku twulidzeywi mu lilaga, kigira ku gwiye avakudzu ku yiyi ya ku gumira; ku duke kutumekira mu buhya bwa roho, si mu li mu bukungu bwenduguta.

⁷Kunangwa ku la vola ki? Lilaga li veye bwoni? Ga ta va ndiyo. Navutswa si nda li manye bwoni bugira lilaga: kigira si nda li manye likayirwa bugira lilaga kuvola, U ta kayirwa mba.

⁸Navutswa ubwoni, lwa bwa nyola ubwiyangu ku lilaga, bwa kola mu inze likayirwa tsing'ano netsing'ano, kigira bugira lilaga bwoni bu kudzi.

⁹Kandi lwambiri inze nda li mwoyo bugira lilaga: navutswa lwa lilaga lya duka, ubwoni bwa simuguka, na inze nda kudza;

¹⁰kandi lilaga lya li ku livamwoyo nda li lola li veye ku likudza.

¹¹Kigira ubwoni bwa nyola ubwiyangu ku lilaga bwa ngada, ni bu nziita kulyo.

¹²Na ndiyo lilaga li veye litakatifu, kandi amalago ga veye matakatifu, kandi malungi, kandi ma lahi.

¹³Kunangwa yaga aga veye amalahi, ga gwa ku inze likudza? Ga ta va ndiyo. Navutswa ubwoni bu duke kulang'aminywa kuva ubwoni, ku likola inze mukudzu ku aga li malahi, ubwoni bu duke kuva ubwoni ligali kigira lilaga.

¹⁴Kigira kwinye ku manya lilaga li veye yomu roho: navutswa inze mbeye weliva lyomubiri, inze ngamannywa kuduka mu bwoni.

¹⁵Kigira aga nkolanga si nga manya: kigira aga nyanza si nga kolanga; navutswa aga ndunyira nigo ga nkolanga.

¹⁶Navutswa ni nkola aga nta yanza, mbugirira lilaga li veye lidahi.

¹⁷Kunangwa si a li inze mwene u kolanga yaga, navutswa nu bwoni bu menya mu inze.

¹⁸Kigira mmanya ligali mu inze, mu liva lyomubiri gwange, kindu kilahi si ki menya mu mba: kigira lyenya nyenyanga, navutswa likola lilahi si ndi lola.

¹⁹Kigira amalahi aga nyenya, si nkolanga mba, navutswa ubudamano bwa nta yanza, nibwo bwa nkolanga.

²⁰Navutswa ni mba ni nkola aga nta yanza, si a li inze mwene u ga kolangaj navutswa nu bwoni bu menyi mu inze.

²¹Kunangwa ndola lilaga yili, ku inze wenyanga kukola amalahi, ubudamano bu veye ho.

²²Kigira nsangalira lilaga lya Nyasaye mu mwoyo gwange:

²³navutswa ndolanga lilaga lyo lugano lundi mu vivero vyange, li lwana nobugeeri, li mbilanga mu buhambe bwelilaga lyobwoni bu veye mu vivero vyange.

²⁴O inze mbeye mundu mudivi ibwaha a la ntwulidza ku mubiri gwelikudza yili?

²⁵Nsantidza Nyasaye ku Yesu Kristo Mwami wetu. Kunangwa kalunu inze mwene ntumekira ligali lilaga lya Nyasaye nobugeeri bwange; navutswa liva lyomubiri ntumekira lilaga lyobwoni.