Read lulogooli 1 Vakorintho 1 Bible Online

1 Vakorintho 1 - lulogooli bible

1 Vakorintho 1

¹Paulo, wa langwa kigira ubulaliri bwa Nyasaye kuva mutumwa wa Yesu Kristo, na Sosithene amitu wetu

²ibaruwa yetu yiyi i dukire livugana lya Nyasaye li veye mu Korintho, yava ava takaswa mu Kristo Yesu, ava langwa va ve avatakatifu, halala na yavo vosi ava veye mu tsimbega tsyosi avanira ku lieta lyo Mwami wetu Yesu Kristo, Mwami wavo kandi wetu.

³Tsimbabasi tsi ve ku mwinye nemirembe gyi twulanga ku Nyasaye Dada wetu noku Mwami Yesu Kristo.

⁴Nsantidzanga Nyasaye wange madiku gosi kigira mwinye, kigira tsimbabasi tsya Nyasaye tsya mwa hebwa mu Kristo Yesu;

⁵kigira mu nyoye muye ubuhinda ku vindu vyosi, mu livola lyosi nelimanya lyosi;

⁶kuli lilolekidza lya Kristo lya kolwa li ve netsingulu mu mwinye:

⁷mwinye mu duke kuvula kugehera kihaanwa kali kilala; mwinye mu veye mu lilinda li lang'aminywa lyo Mwami wetu Yesu Kristo;

⁸uyu niye u li mu dinyeridza netsingulu kuduka ku kiheri, mu Dule kuva neki ndu ku mwinye ku lidiku lyo Mwami wetu Yesu Kristo.

⁹Nyasaye a veye musuuvirifu, wagyira ni mu Iangwa nokuvikwa mu lisanga lyo Mwana wewe Yesu Kristo Mwami wetu.

¹⁰Kalunu mmu goonya ligali, avamitu, ku lieta lyo Mwami wetu Yesu Kristo, mu vole amakuva malala mwinye mwosi, kandi lyavukana li ta va ku mwinye; navutswa mu lalilidze imbulirani mu tsiganagani kandi mu makuva.

¹¹Avamitu, kigira avalala avenyumba ya Kiloe va mboleye amakuva genyu, lihing'ana li veye mu mwinye:

¹²Aga mbola ni yaga, ku mwinye sa mulala a vola, Inze mbeye wa Paulo; na inze wa Apolo; na inze wa Kefa; na inze wa Kristo.

¹³Kristo yavukanywa naho? Paulo ya bambwa kigira mwinye naho? Mu batidzwa mu lieta lya Paulo naho?

¹⁴Nsantidzanga Nyasaye si nda batidza mulala ku mwinye, na a ta li Krispo na Gayo;

¹⁵gase mundu mulala a la vola mwa batidzwa mu lieta lyange.

¹⁶Kandi nda batidza avenyumba ya Stefano: bugira yava si mmanya nda batidza avandi naho.

¹⁷Kigira Kristo si ya ntuma kubatidza, navutswa kwilwadza ivangeli: si lya li mu bugeeri bwamakuva, gase tsingulu tsyomusalaba gwa Kristo tsi lononywa.

¹⁸Kigira likuva lyomusalaba li veye ubusiru ku yavo ava divanga: navutswa ku kwinye ava honnyangwa nalyo li veye tsingulu tsya Nyasaye.

¹⁹Kigira ga ng'odwa, Nda dividza ubugeeri bwavageeri, Nelimanya lyavamanya nda lega.

²⁰Umugeeri a veye haliha? Mung'odi a veye haliha? Umuhingi wenyinga yiyi a veye haliha? Nyasaye si ya kola ubugeeri bwelirova bu ve ubusiru?

²¹Kigira mu bugeeri bwa Nyasaye, lirova, mu bugeeri bwalyo, si lya manya Nyasaye, Nyasaye ya yanza kuhonnyira avasuuvira mu busiru bwelilwadza.

²²Kigira Avayuda venyanga vilolekidzu, na Vagreki venya ubugeeri:

²³navutswa kwinye kwilwadza Kristo wa bambwa, ku Vayuda a veye kyokwikigitalidza, na ku Tsihiri a veye ubusiru;

²⁴navutswa ku Vayuda na Vagreki ava langwa, a veye Kristo tsingulu tsya Nyasaye, nobugeeri bwa Nyasaye.

²⁵Kigira ubusiru bwa Nyasaye bu veye nobugeeri kuvita bwavandu; nobudedekere bwa Nyasaye bu veye netsingulu kuvita tsyavandu.

²⁶Kigira mu henze lilangwa lyenyu, avamitu, kuli si ha li navageeri vanyingi ku bugeeri bwomubiri, kandi si ha li navetsingulu avanyingi, kandi si ha li navanene vanyingi avalangwa:

²⁷navutswa Nyasaye ya tovola vindu vyobusiru ku vyelirova, a duke kulegannya avageeri, kandi Nyasaye ya tovola vindu videdekere ku vyelirova a duke kulegannya vindu vyetsingulu;

²⁸kandi viha nzahanza vyelirova nevya vandu va leganga, Nyasaye ya vi tovola, kandi vi ta veve ho a duke kukola kuva vutswa vindu vi veye ho:

²⁹ku mibiri gyosi gu ta va ho mulala okwiidzominya imbiri wa Nyasaye.

³⁰Navutswa mwinye mu twulanga kuye mu Kristo Yesu, wa Nyasaye a kola kuva ubugeeri bwetu, kandi ubulungi, nobutakatifu, nobuhonnyi:

³¹kuli wa ga ng'odwa, Widzominya, yidzominyire ku Mwami.