Read lulogooli 1 Vakorintho 11 Bible Online

1 Vakorintho 11 - lulogooli bible

1 Vakorintho 11

¹Duke hiuhonnywa. Mu ve avegi ku inze kuli inze mbeye mwegi ku Kristo.

²Kalunu nzidzominya mwinye kigira mu nzidzulitsanga ku vindu vyosi, kandi mu gumiranga ligali yaga ga mwa vugula, kuli nda mu ha.

³Navutswa nyenya mu manye mutwe gwomundu musatsa ni Kristo; nomutwe gwomukali nu mundu musatsa; nomutwe gwa Kristo ni Nyasaye.

⁴Ku vosi mundu musatsa na a saala, naho na a profeta, naye ni yekuniki mutwe a legannya mutwe gwigwe.

⁵Navutswa ku vosi mundu mukali na a saala naho na a profeta mutwe gwigwe ni gu ta kunikwa nengubo a legannya mutwe gwigwe, kigira ga veye kuli u vegeywi.

⁶Kigira na a ta kunikwa mutwe nengubo, a vegwe: navutswa ni tsi va tsisoni ku mukali kukalwa lisu nokuvegwa, a kunikwe nengubo ku mutwe.

⁷Kigira ku musatsa si ga mu dukira a kunikwe mutwe kigira a veye ligondo nobukumi bwa Nyasaye; navutswa mukali a veye ubukumi bwomusatsa.

⁸Ki gira musatsa si ya twula ku mukali navutswa mukali ya twula ku musa tsa;

⁹kigira musatsa si ya lombe rwa mukali, navutswa mukali ya lomberwa musatsa:

¹⁰kigira yaga nu bulahi mukali a ve nekiloleru kyokwamehirwa ku mutwe gwigwe, kigira tsingelosi.

¹¹Navutswa ha lala na yaga wekikali si a nyala kulega wekisatsa, kandi wekisatsa si a nyala kulega wekikali mu Mwami.

¹²Kigira kuli wehiikali ya twula ku wekisatsa, nandiyo kandi wekisatsa yivulwa ku wekikali; navutswa vindu vyosi vi twula ku Nyasaye.

¹³Mu kalage mwinye avene; nu bulahi ku wekikali kusaala na a ta kunikeywi mutwe nengubo?

¹⁴Kyalomba vindu si kya mwegidza, wekisatsa na a veye nelisu litambi, li veye tsisoni kuye?

¹⁵Navutswa wekikali na a veye nelisu litambi, li veye ubukumi kuye: kigira ya hebwa lisu lilye li gwe kyokwikunika.

¹⁶Navutswa ku vosi mundu na a va na a veye nobuhangali, kwinye si ku veye nemiima kuli yigyi, kali mavugano ga Nyasaye.

¹⁷Mu limuha amalago yaga si nzidzominya mwinye mba, kigira mu vugana si ga li ku malahi kuvita, navutswa ku budamano kuvita.

¹⁸Kigira litanga, lwa mu vugananga mu livugana, mbulira ha veye namahangali hagati henyu; na inze mbugirira malala kugo.

¹⁹Kigira si ga vula kuva li la va lyavukana hagati henyu, ava bugirirwa va duke kulang'aminywa hagati henyu.

²⁰Kunangwa mwinye lwa mu vugana halala, si ga nyalika ku mwinye kulia vyokulia vyo Mwami:

²¹kigira mu lilia lyenyu sa mulala yekolerera kuvugula vyokulia vivye; ma mulala a veye nenzala nowundi a hambika.

²²Kigira ki? Si mu veye netsinyumba tsyenyu kulia mu nokunwa? Naho mu leganga livugana lya Nyasaye, nokulegannya ava ta li nekindu? Kunangwa mmu volera ndi? Nzidzominya mwinye? Ku yaga si nzidzominya mwinye mba.

²³Kigira nda vugula ku Mwami yiki kya nda ha mwinye, kuli Mwami Yesu mu budiku yibwo bwa ya zamwa ya vugula ubukima;

²⁴kandi lwa ya mala kusantidza ya megannya, na a vola, Yibu nu mubiri gwange gu meganyiranywa mwinye: mu kole ndi kwidzulitsa inze.

²⁵Kandi ndiyo ya vugula kikombe, inyima yevyokulia na a vola, Kikombe yiki ki veye amalago mahya mu masahi gange: tsinyinga tsyosi, mu nwedza, ni mu va ni mu kole kwidzulitsa inze.

²⁶Kigira tsinyinga tsyosi tsya mu lagira ubukima yibu, nokunwa kikombe, mu lang'aminya likudza lyo Mwami kuduka inyinga ya a lidza.

²⁷Kigira yaga ku vosi u lagira ubukima yibu nokunwa kikombe kyo Mwami halala ni miima gyi ta li milahi, a veye nelikalagira lyomubiri nelya masahi go Mwami.

²⁸Navutswa mundu yegeridze nandiyo a lie ku bukima nokunwa ku kikombe.

²⁹Kigira uyu u litsanga nokunwa, a litsanga nokunwa likalagirwa lilye mwene, na a ta manyiridza mubiri.

³⁰Kigira yaga avanyingi ku mwinye va veye avadedekere navalwaye nava gonanga si va li vakekeke.

³¹Navutswa kwinye ni kwimanyiridza avene, si ku li kalagirwa mba.

³²Navutswa lwa ku kalagirwa, Mwami a ku hedzanga amageri, ku la vula kukalagirwa kivi halala navomulirova.

³³Kunangwa, avamitu, lwa mu vugana halala kulia, mu lindane avene navene.

³⁴Mundu na a va na a veye nenzala a lie mu inyumba yeye; livugana lyenyu li ta duka ku likalagirwa. Na yaga ga tigaye nda ka lombe lwa ndidza.