Read lulogooli 1 Vakorintho 12 Bible Online

1 Vakorintho 12 - lulogooli bible

1 Vakorintho 12

¹Kalunu, avamitu, si nyenya mu vule kumanya amakuva gevihaanwa vya Roho.

²Mu manya kuli mwa li ave Tsihiri, mwa gotidzwa ni mu londa vifwananyi vi ta li nomwoyo, kuli mwimirirwa.

³Kigira yaga mmannya mwinye si ha li nomundu u volanga mu Roho wa Nyasaye, u vola, Yesu a ve lilaamwa; kandi si ha li nomundu u nyala kuvola Yesu a veye Mwami ni bu ta li mu Roho Mutakatifu.

⁴Ha veye netsing'ano tsyevihaanwa, navutswa Roho a veye mulala.

⁵Kandi ha veye netsing'ano tsyobu tumwa, kandi Mwami a veye mulala.

⁶Kandi ha veye netsing'ano tsyeliyinzira, nawtswa Nyasaye a veye mulala, u kolanga vindu vyosi mu vosi.

⁷Navutswa sa mulala a hebwangwa livuula lya Roho kigira likonyana.

⁸Kigira mulala a hebwangwa ubugeeri ku Roho; nowundi a hebwangwa limanya, ku Roho zana:

⁹wundi a hebwangwa lisuuvira, ku Roho zana; wundi a hebwangwa vihaanwa vyokuhonnya valwaye, ku Roho zana;

¹⁰wundi a hebwangwa likola miyinzi gyetsingulu; wundi a hebwangwa ubuprofeti; kandi wundi a hebwangwa limanya roho: wundi a hebuangua tsing'ano tsyetsinimi; kandi wundi a hebwangua ligirunkannya tsinimi;

¹¹navutswa amakuva yaga gosi Roho zana a kolanga, nokugavulira vosi sa mulala lugano lugano kuli ga a yanza.

¹²Kigira kuli mubiri gu veye mulala kandi gu veye nevivero vinyingi, kandi vivero vyosi vyomubiri vi veye vinyingi vi kola mubiri mulala; kandi Kristo a veye ndiyo.

¹³Kigira kwosi kwa bati dzwa mu Roho mulala ku duke kuva mubiri mulala, ni ku veye Avayuda naho Avagreki, naho avatugwa, naho avaboholole; kwosi kwa nwehidzwa ku Roho mulala.

¹⁴Kigira mubiri si gu veye kivero kilala, navutswa gu veye vivero vinyingi.

¹⁵Kirenge ni ki vola, Kigira inze si mbeye mukono si mbeye womubiri; si ki veye kyomubiri kigira yaga?

¹⁶Kandi ugutu ni gu vola, Kigira inze si mbeye imoni, si mbeye womubiri; si gu veye gwomubiri kigira yaga?

¹⁷Mubiri gwosi ni gu va imoni lihulira li veye haliha? Mubiri gwosi ni gu va ugutu, lifunyiridza li veye haliha?

¹⁸Navutswa kalunu Nya saye u viki vivero si kilala ku mubiri kuli wa a yanza.

¹⁹Kandi vivero vyosi ni vi va kilala, mubiri gu veye haliha?

²⁰Navutswa kalunu vi veye vivero vinyingi, navutswa mubiri gu veye mulala.

²¹Kandi imoni si i nyala kuvolera mukono, Si nyenya ive: kinga mutwe kuvolera virenge, Si nyenya mwinye.

²²Auwa, nu bulahi ligali, vivero yivyo vyomubiri vi lolekanga kuva videdekere kuvita vyenyangwa ligali:

²³kandi vivero vyomubiri vya ku ganagana vya gehera lidzominywa, ku vidzominya kuvita; nevivero vyetu vi ta li vilahi vi veye vilahi kuvita;

²⁴kigira vivero vyetu vilahi si vi veye nelyenya: navutswa Nyasaye ya hambannya mubiri nokuha yiki kya gehera lidzominywa kuvita;

²⁵lyavukana li ta va ku mubiri, navutswa vivero vyosi vi dendane vyene na vyene.

²⁶Kandi kivero kilala ni ki salira, vivero vyosi vi salira halala nakyo; kinga kivero kilala ni kidzominywa, vivero vyosi vi sangala nakyo.

²⁷Mwinye mu veye mubiri gwa Kristo, kandi sa mulala mu veye vivero kugwo.

²⁸Kandi Nyasaye ya vika avalala mu livugana, vokutanga avatumwa, avakaviri navaprofeta, avakavaka va veye avegidzi, kandi likola miyinzi gyokugenya, kandi vihaanwa vyokuhonnya avalwaye, kandi ubukonyani, kandi lya meha, kandi tsing'ano tsyetsinimi.

²⁹Kunangwa vosi va veye avatumwa? Naho vosi va veye avaprofeti? Naho vosi va veye avegidzi? Naho vosi va kola miyinzi gyokugenya?

³⁰Naho vosi va veye nevihaanwa vyokuhonnya avalwaye? Naho vosi va vola tsinimi lugano lugano? Naho vosi va girunkannya tsinimi?

³¹Navutswa mwenye ligali vihaanwa vinene kuvita. Kandi mmu mannya inzira indahi kuvita.