Read lulogooli 1 Vakorintho 13 Bible Online

1 Vakorintho 13 - lulogooli bible

1 Vakorintho 13

¹Ni mba ni mbola netsinimi tsyavandu netsyetsingelosi, ni nta veye nobuyanzi, mbeye mugasa gu langiriranga, kinga kuli vikuli vi salanga.

²Ni mba ni mbeye nobuprofeti, nokumanya gaviswa gosi nelimanya lyosi; kandi ni mba ni mbeye nelisuuvira lyosi, kuduka kusundidza vigulu, navutswa ni nta va nobuyanzi, si mbeye kindu.

³Kandi ni mba ni mbaana vindu vyange vyosi kukonya avadaka, kandi ni mba ni mbaana mubiri gwange gu sa mbwe, navutswa ni nta va nobuyanzi, si vi nkonya kali hakuzu.

⁴Ubuyanzi bwikudziranga, bu kolanga ubuhooma, ubuyanzi si bu veye nembodoka; kinga si bu kola uluyai, kinga si bwigingira,

⁵si bu vula kuva nobuhokya, si bwenya vyabwo ubwene, si bu veye nobutima, si bu ganagana ubudamano;

⁶kandi si bu sangalira ubwoni, navutswa bu sangala mu geligali;

⁷ubuyanzi bu kunikanga vindu vyosi, bu suuviridzanga vindu vyosi, bu suuviranga vindu vyosi, bwikudziranga ku vindu vyosi.

⁸Ubuyanzi si bu veye ne kiheri mihiga nemihiga, navutswa ubuprofeti ni bu veye ho, bu la heridzwa, tsinimi ni tsi veye ho, tsi la hera; limanya ni li veye ho, li la heridzwa.

⁹Kigira ku manya luvega lulala, kandi ku profeta luvega lulala;

¹⁰navutswa lwekidukiru ki li duka, ki veye kyoluvega lulala ki la heridzwa.

¹¹Lwa nda li mwana nda moloma kuli mwana, nda denda kuli mwana, nda ganagana kuli mwana: kalunu lwa nduki kuva mukulundu, nda heridza vindu vyobwana.

¹²Kigira kalunu ku lolera kuli mu kyeloleru, amatsengeri; navutswa inyinga yindi ku la ka lole moni na moni: kalunu mmanya luvega lulala, navutswa inyinga yindi nda ka manye ligali kuli nda manyekana ligali.

¹³Navutswa kalunu lisuuvira li menyanga, kandi lisuuviridzwa, nobuyanzi, yivi vivaka; navutswa kinene kuvyo nu buyanzi.