Read lulogooli 1 Vakorintho 2 Bible Online

1 Vakorintho 2 - lulogooli bible

1 Vakorintho 2

¹Na inze lwa nda duka ku mwinye, avamitu, si ndadza kumwilwadzira lilolekidza lya Nyasaye nobunene bwamakuva kinga nobugeeri.

²Kigira nda lalira mbule kumanya kindu kali kilala mu mwinye, navutswa Yesu Kristo, uyu u bambeywi.

³Nda li nemwinye nobudedekere nobutii, nelidegera linene.

⁴Kandi livola lyange nelilwadza lyange si lya li mu makuva gokugoonya gobugeeri, navutswa lya li mu lilang'aminywa lya Roho kandi lyetsingulu:

⁵lisuuvira lyenyu li ta va mu bugeeri bwavandu, navutswa li ve mu tsingulu tsya Nyasaye.

⁶Kwinye ku vola ubugeeri hagati havo ava veye avadukiru: navutswa si bu li ubugeeri bwenyinga yiyi, kandi si bu li bwavanene bwenyinga yiyi, ava li heridzwa.

⁷Navutswa kwinye ku vola ubugeeri bwa Nyasaye mu gaviswa, ubugeeri bwa viswa, bwa Nyasaye ya singeridza imbiri wetsinyinga yitsi ku lidzominywa lyetu.

⁸Mu vanene venyinga yiyi si ha veye nomulala u bu manya: kigira va va ni va bu manya nkano si va bamba Mwami wobukumi

⁹Navutswa kuli ga ng'odwa, Vindu vyemoni i ta lola, kandi ugutu si gu hulira, Kandi si vingira mu mwoyo gwomundu, Vindu vyosi vya Nyasaye ya lombera ava mu yanza.

¹⁰Navutswa Nyasaye ya ku vuulira ku Roho: kigira Roho yidera vindu vyosi; yee, kuduka ku vindu vya Nyasaye vyoluliva.

¹¹Kigira nibwaha ku vandu u manya vindu vyavandu ni gu ta li roho gwomundu gu veye muye? Kandi ndiyo vindu vya Nyasaye si ha veye no vi manya na a ta li Roho wa Nyasaye.

¹²Navutswa kwinye si kwa vugula roho gwelirova, navutswa kwa vugula Roho wa twula ku Nyasaye; ku duke kumanya vindu vya Nyasaye ya ku ha nobuhaani.

¹³Vindu vya kwinye ku volanga, si vi veye mu makuva gobugeeri bwavandu bwegidza, navutswa aga Roho yegidza; ku tsukannya vindu vya Roho namakuva ga Roho.

¹⁴Mundu wolugano lwo mubiri si ya vugula vindu vya Roho wa Nyasaye: kigira vi veye ubusiru kuye; naye si ya nyala kuvimanya, kigira vi manyekana ku roho.

¹⁵Navutswa uyu u veye wa roho yidera vindu vyosi, navutswa mwene, mundu si ya mwidera kali mulala.

¹⁶Kigira ibwaha wa manya tsiganagani tsyo Mwami, a duke kumwegidza? Navutswa kwinye ku veye netsiganagani tsya Kristo.