Read lulogooli 1 Vakorintho 6 Bible Online

1 Vakorintho 6 - lulogooli bible

1 Vakorintho 6

¹Mulala ku mwinye na a veye V nelikuva ku wakye, a lema mwoyo kutsia kumuyala imbiri wavadamano, si a tsia imbiri wavatakatifu?

²Naho si mu manya avatakatifu va la kalagira avomulirova? Kunangwa mwinye ni mu va ni mu kalagira avomulirova, si mu dukani kukalaga likalaga likekeke?

³Si mu manya ku la kalagira tsingelosi? Nasindi amakuva gelivamwoyo lya kalunu?

⁴Kunangwa ni mu va ni mu veye nelikalaga lyamakuva gelivamwoyo yili, mu vika mu livugana ava ta li kindu va kalage, naho?

⁵Mbola ndi kumulegannya. Ni ndiyo ga veye, si ha li nomulala ku mwinye, mundu mugeeri u nyala kukalagira avamwavo veve,

⁶navutswa amwavo a tsia kuyala amwavo, kandi ni imbiri wa va ta li avasuuviri?

⁷Auwa, ga mali kugwa lyoneka ku mwinye, kigira mu veye neliyalana avene navene. Kigira si bu li bulahi kwikudzira ku ga veye madamano? Kandi si bu li bulahi kunuulwa?

⁸Yee, navutswa mwinye avene mu kola ubudamano, kandi mu nuu la, kandi ni vya vamwavo venyu.

⁹Naho si mu manya avadamano si va li nyola ubwami bwa Nyasaye? Mu ta gadwa: ava tsia mbakana, kinga ava londanga misambwa, kinga avaheyi, kinga ava gwa avakali, kinga vafiraji,

¹⁰kinga avivi, kinga avakayirwa vyavene, kinga avahambiki, kinga avanyegi, kinga avanuuli, si va nyala kunyola ubwami bwa Nyasaye.

¹¹Kandi ku mwinye avalala va li kuli yava, navutswa mwogidzeywi, kandi mwa takaseywi, navutswa mwa volwa kuva avalungi ku lieta lyo Mwami Yesu Kristo, noku Roho wa Nyasaye wetu.

¹²Vindu vyosi vi nyalika ku inze; navutswa si vi li vyosi vi konyanga. Vyosi vi nyalika ku inze; navutswa si nyala kubugirira kindu kali kilala kwameha ku inze.

¹³Vyokulia vi veye vyenda, na inda i veye yevyokulia: navutswa Nyasaye a lononnya vyombi. Navutswa mubiri si gu veye gwokutsia mbakana, navutswa gu beye gwo Mwami; kandi Mwami veye womubiri:

¹⁴Kandi Nyasaye ya simugukidza Mwami, kandi a la simugukidza kwinye netsingulu tsitsye.

¹⁵Si mu manya mibiri gyenyu gyi veye vivero vya Kristo? Kunangwa nyala kuvugula vivero vya Kristo mbi kole vi gwe vivero vyowa malaya? Ga ta va ndiyo.

¹⁶Naho si mu manya uyu u hambanywa nowamalaya a veye mubiri mulala naye? Kigira a vola, Vaviri va la gwa mubiri mulala.

¹⁷Navutswa uyu u ha mbanywa no Mwami a veye roho mulala naye.

¹⁸Mwiruke litsia mbakana. Ubwoni bwosi bwomundu a kolanga bu veye ku mubiri igulu, navutswa uyu u tsitsanga mbakana a kolanga ubwoni ku mubiri gwigwe mwene.

¹⁹Naho si mu manya mubiri gu veye litempeli lya Roho Mutakatifu u veye mu mwinye, wa mu veye naye kutwula ku Nyasaye? Kandi mibiri si gyi veye gyenyu;

²⁰kigira mwa gulwa ubuguli; kunangwa mwidzominye Nyasaye mu mibiri gyenyu.