Read lulogooli 1 Vakorintho 7 Bible Online

1 Vakorintho 7 - lulogooli bible

1 Vakorintho 7

¹Kalunu ku vindu vya mwa ng'odera: Nu bulahi mundu a ta dira mukali.

²Navutswa kuhona ku litsia mbakana, mundu sa mulala a ve nomukali wewe, kandi mukali sa mulala a ve nomusatsa wewe.

³Uyu musatsa a kolere mukali kuli ga mu dukira: nomukali a kole ndiyo ku musatsa wewe.

⁴Mukali si a ve ye netsingulu ku mubiri gwigwe mwene, navutswa musatsa: kandi ndiyo musatsa si a veye netsingulu ku mubiri gwigwe mwene, navutswa mukali.

⁵Mu ta sulana avene navene bugira ni mu ta lagani inyinga, mu duke kuva nobwiyangu bwokusaala, ma mu ve halala kandi; Setani a ta duka kumugeridza kigira ku livula kwegaya lyenyu.

⁶Navutswa mbola yaga ku libugirira, si ga veye agokulaga.

⁷Navutswa nkano avandu vosi va veye kuli inze. Navutswa vosi sa mulala a veye nekihaanwa kikye ki twula ku Nyasaye, mulala ndi nowundi ndi.

⁸Navutswa mbolera yavo ava kikiri kuhilana kandi avakunzakali, Nu bulahi kuvo va menye kuli inze mbeye.

⁹Navutswa niva va menya ni va ta nyala kwegaya, va hilane: kigira nu bulahi kuhilana kuvita kwaaduka muliru.

¹⁰Navutswa yava ava mali kuhilana, mba laga, kandi si a li inze, navutswa nu Mwami, Mukali a ta leka musatsa wewe

¹¹(navutswa na a va na a twula ata hilwa kandi mba, naho yirane ku musatsa wewe); kandi musatsa a ta kunga mukali wewe.

¹²Navutswa ku vandi inze mbola, si a li Mwami: Ku vamitu vosi, mulala na a veye nomukali u ta suuvira, naye na a yanza kumenya naye, a ta mu kunga mba.

¹³Kandi mukali u veye nomusatsa u ta suuvira, naye na a yanza kumenya naye, a ta leka musatsa wewe mba.

¹⁴Kigira musatsa u ta suuvira a takasangwa kigira mukali wewe, kandi mukali u ta suuvira a takasangwa kigira musatsa. Ni ga ta li ndiyo, nkano avana venyu navadamano; navutswa kalunu va veye avalungi.

¹⁵Navutswa u ta suuvira na a lalira kutwula, a twule: amwavo wetu musatsa, kinga amwavo wetu mukali si a li mu butugwa mu vindu kuli yivi; navutswa Nyasaye u mali kukulanga mu mirembe.

¹⁶Kigira u manyi ndi, ive mukali, mbula u la honnya musatsa wowo? Kinga u manyi ndi, ive musatsa, mbula u la honnya mukali wowo?

¹⁷Navutswa kuli Mwami a gavulira avandu sa mulala, kandi kuli Nyasaye ya langa mundu sa mulala, a gende ndiyo. Na inze ndaganga ndiyo mu mavugano gosi.

¹⁸Mundu na a va ni ya langwa na a veye wa kevwa? A ta va u ta kevwa. Mundu na a va ni ya langwa na a kikiri kukevwa? A ta kevwa mba.

¹⁹Likevwa si ki veye kindu, kandi livula kukevwa si ki veye kindu; navutswa kulonda malago ga Nyasaye.

²⁰Mundu sa mulala a menye mu ga ya li nago lwa ya langwa.

²¹Ive nu u va ni wa langwa nu u veye mu butugwa? U ta lola bu veye budamano: navutswa ni ga duka kunyalika ku ive kuva nelibohololwa nu bulahi u li tumekire.

²²Kigira uyu mutugwa wa langwa mu Mwami a veye muboholole wo Mwami: kandi ndiyo uyu wa langwa a veye muboholole, a veye mutugwa wa Kristo.

²³Mwa gulwa ubuguli; mu ta gwa avatugwa va vandu.

²⁴Avamitu, mundu sa mulala ku ga ya li nago lwa ya langwa, a menye mugo halala na Nyasaye.

²⁵Ku kivune kyavakana vagyima, si mbeye namalago go Mwami: navutswa mmu voleranga liganagani lyange, kuli mundu wo Mwami a vereye tsimbabasi kuva musuuvirifu.

²⁶Ndola inkuva yiyi ni indahi kigira kivi kya ku veye nakyo yiki, nayo ni yiyi, nu bulahi mundu kuva kuli a veye.

²⁷U boheywi ku mukali? U tenya kwavukanywa. Wavukannyeywi ku mukali? Utenya mukali.

²⁸Navutswa ive nu u va nu u hilana nomukali, si u koli ubwoni mba; kandi mukana na a hilwa si a koli ubwoni mba. Navutswa ku yava va la va nekivi ku mubiri: inze nyenya kumugayira kivi.

²⁹Navutswa mbola yaga, avamitu, tsinyinga tsimbihidzeywi, ava veye navakali va duke kuva kuli va ta veye navo;

³⁰na yava ava liranga ve ve kuli ava ta liranga; nava sangalanga, va ve kuli ava ta sangalanga; nava gulanga va ve kuli ava ta li nekindu;

³¹navo ava tumekira lirova va ve kuli ava ta li tumekira ligali: kigira vindu vyelirova yili vi vitanga.

³²Navutswa nyenya mwinye mu vule kunyankana. Uyu u kikiri kuserererwa a nyankanira vindu vyo Mwami, kuli a duke kuyanzidza Mwami:

³³navutswa u mali kuserererwa a nyankanira vindu vyelirova kuli a duke kuyanzidza mukali wewe.

³⁴Kandi ha veye nelyavukana mukali nomukana. Uyu u kikiri kusererwa a nyankanira vindu vyo Mwami, a duke kuva mutakatifu ku mubiri kandi mu roho: navutswa uyu wa sererwa a nyankanira vindu vyelirova kuli a duke kuyanzidza musatsa wewe.

³⁵Kandi mbola yaga kumukonya; si nkola ndi kumugenda, navutswa kumukonya ku vindu vi dukani, kandi mu duke kulindirira Mwami bugira kugaywa.

³⁶Navutswa ku vosi mundu na a lola si a nyala kukolera mukana wewe kuli vi mu dukira, na a va na a vita bulahi bwolukana lwilwe, kandi na a va na a veye nelyenya, a kole kuli yenya; si a kola ubwoni; u leke va sererane.

³⁷Navutswa uyu u dinya mu mwoyo gwigwe, kandi si a li nelyenya, navutswa a veye netsingulu mu bulaliri bwibwe kandi u laliye inkuva yiyi mu mwoyo gwigwe kugaya mukana wewe, a kola bulahi.

³⁸Kunangwa u sereranga mukana wewe a kola bulahi; kandi uyu u ta serera a kola bulahi kuvita.

³⁹Mukali a bohangwa inyinga yomusatsa a veye mwoyo; navutswa musatsa na a kudzi a veye nomunwa kusererwa ku uyu wa yenya; navutswa ku vandu vo Mwami veng'ine.

⁴⁰Navutswa a veye nobugasu kuvita na a menya vutswa ndiyo, kuli inze ndola; kandi mbola mbeye na Roho wa Nyasaye.