Read lulogooli 1 Vakorintho 9 Bible Online

1 Vakorintho 9 - lulogooli bible

1 Vakorintho 9

¹Inze si mbeye muboholole? Inze si mbeye mutumwa? Inze si nda lola Yesu Mwami wetu? Mwinye si mu veye miyinzi gyange mu Mwami?

²Inze ni mba ni nta veye mutumwa ku vandi, navutswa mbeye mulumwa ku mwinye; kigira mu veye muhuri gwange mu Mwami.

³Litivula lyange kuvo avidera inze ni yili.

⁴Si ku veye netsingulu kulia nokunwa?

⁵Si ku veye netsingulu kuvugula mukali u suuvira, kali kuli avatumwa avandi, kandi avamwavo vo Mwami, kandi Kefa?

⁶Naho inze tsyeng'ine na Baranaba, si ku veye netsingulu kuleka kuyinzira?

⁷Ni musikari ki kutumika vutswa? Nibwaha u similiangn kizabibu na a ta lia ku mazabibu? Naho ibwaha wayanga kyayo na a ta nwa maveere gekyayo?

⁸Mbola yaga kuli avandu? Naho lilaga si li vola ndiyo?

⁹Kigira ga ng'odwa mu lilaga lya Musa, U ta boha ing'ombe mu munwa inyinga i huulanga ubuswage. Nyasaye a ganagana ageng'ombe,

¹⁰naho a vola yili kigira kwinye, ligali? Yee, ga ng'odwa kigira kwinyekigira uyu u limanga nu bulahi a lime nelisuuvira, na uyu u huulanga a huule nelisuuvira a la nyola ku vya a huula.

¹¹Kwinye ni ku va ni kwa mu simikira vindu vyo nwoyo, ni kindu kinene ni ku va ni ku gesa vindu vyenyu vyomubiri?

¹²Avandi ni va va ni va nyola tsingulu yitsi ku mwinye, nasindi kwinye? Navutswa si kwa tumekira tsingulu yitsi; navutswa kwikudzira ku vindu vyosi ku duke kuvula kwigalira ivangeli ya Kristo.

¹³Si mu manya yava ava tumikanga mu vindu vyelitempeli, va litsanga ku vindu vyelitempeli, na yava ava tumikanga ku bwali va veye nekidieli kyavo halala nobwnli?

¹⁴Kandi ndiyo, Mwami ya laga yava ava landidzanga ivangeli va duke kunyola ku ivangeli yivi va konya.

¹⁵Navutswa inze si nda tumekira vindu yivi kali kilala; kandi si ng'oda vindu yivi vi kolwe ku inzekigira ku inze nu bulahi nkudze kuvita mundu kali mulala kukola lidzominya lyange li ve lyavutswa.

¹⁶Kigira kali ni nzilwadza ivangeli, si mbeye nago kwiidzominya; kigira mbikeywi linigwa; kigira ubudamano bu veye ku inze ni mbula kwilwadza ivangeli.

¹⁷Kigira ni nkola yaga nobuyanzi bwange mwene, mbeye namadanyi: navutswa ni bu ta li ubuyanzi bwange mwene, mbebeywi ubulindi bwevangeli.

¹⁸Kunangwa madanyi gange ga veye ki? Ga veye yaga inyinga nzilwadza ivangeli nduke kukola ivangeli i ta va nomutungu, mbule kutumekira tsingulu tsyange tsyosi mu ivangeli.

¹⁹Kigira kali nda li muboholole ku vandu vosi, ndivika mu butuzwa ku vosi, nduke kunyola vanyingi.

²⁰Ku Vayuda nda gwa kuli Muyuda, nyole Avayuda; ku yava ava veve ku lilaga, nda gwa kuli u veye ku lilaga, (mwene si nda li ku lilaga), nduke kunyola ava veye ku lilaga.

²¹Ku yavo ava ta li nelilaga, nda gwa kuli u ta li nelilaga, mwene si nda vula kuva nelilaga ku Nyasaye, navutswa ku lilaga ya Kristo, nyole ava ta li nelilaga.

²²Ku vadedekere nda gwa mudedekere, nyole avadedekere: ku vandu vosi nda kolwa vyosi, ku vyosi nduke kuhonnya v alala.

²³Na inze nkolanga vindu vyosi kigira ivangeli, nduke kuva u sangi muyo.

²⁴Si mu manya yava ava gerana tsimbiru va nyagula vosi, navutswa mulala a nyola madanyii? Na ndiyo kandi mu nyagule; mu duke kunyola.

²⁵Ku vosi u veye neli gerana mu bukino yegayanga ku vindu vyosi. Yava va kola ndiyo va nyole itaji yonekanga, navutswa kwinye kunyola itaji i tonekanga.

²⁶Kunangwa inze nyagulanga si ga li kuli aga nta manya; kandi kuli nduyananga si ga li kuli u duyanga mwika:

²⁷navutswa nkindukidza mubiri gwange, nokugutuma: gase inyinga mmali kwilwadzira avandi inze mwene nda sulwa.