Read lulogooli 2 Vakorintho 12 Bible Online

2 Vakorintho 12 - lulogooli bible

2 Vakorintho 12

¹Ga ndukira kwiidzominya, navutswa si ki veye kindu ki nkonya; navutswa nda duka ku malola noku lilang'aminywa lyo Mwami.

²Mmanya mundu mulala mu Kristo, gyi duki kalunu imihiga likumi na gyine (mbula ya li mu mubiri si mmanya; mbula ya li na a twula mu mubiri, si mmanya; Nyasaye a manya), yetsumbwa kuduka migulu lya kavaka.

³Na inze mmanya mundu zana (mbula ya li mu mubiri mbula ya li ihale nomubiri, si mmanya; Nyasaye a manya),

⁴kuli yetsumbwa na a vikwa mu Paradisi, kandi ya hulira amakuva aga ta nyalika kuvolwa, aga veye mugyiru mundu kuvola.

⁵Kigira mundu kuli uyu ndiidzominya: navutswa kigira inze mwene si nziidzominya, bugira ni ntiidzominya mu budede kere bwange.

⁶Kigira ni nyenya kwiidzominya, si nda va musiru mba; kiglra nda vola ageligali: navutswa ndeki gase mundu kali mulala a la ganagana inze kuvita aga a lola ku inze, kinga aga a hulira ku inze.

⁷Kandi kigira ubunene bwelilang'aminywa yilyo gase nda nenehidzwa kuvita kigero kyange, nda hebwa lifwa mu mubiri, mutumwa wa Setani a duke kunkupidza kivi, mbula kunenehidzwa kuvita kigero.

⁸Ku kindu yiki nda saala Mwami hali kavaka, ki twule ku inze.

⁹Naye ya mbolera, Tsimba basi tsyange tsi ku duki: kigira tsingulu tsyange tsi dukidzeywi mu budedekere. Kunangwa ndiidzominya mu budedekere bwange nobuyanzi ligali, tsingulu tsya Kristo tsi menye ku inze.

¹⁰Kunangwa nyanzi mu budedekere, mu busaliri, mu budaka, mu lidambidzwa, mu kivi, kigira Kristo: kigira inyinga mbeye mudedekere, nilwo lwa mbeye ne tsingulu.

¹¹Mmali kugwa nobusiru: mwi nye mwa nniga; kigira ga ndukira mwinye mu nzidzominya: kigira si nda li mke ku vanene vavatumwa, kali ni nda vula kuva kindu

¹²Ligali vilolekidzu vyavatumwa vya kolwa mu mwinye mu bwekudziri bwosi, ku vilolekidzu noku vyokugenya noku miyinzi gyetsingulu

¹³Kigira ni kindu ki kya mwa gehi dzwa kuvita mavugano gandi, ni li ta li likuva yili, inze mwene si nda li muliduhu ku mwinye? Mu nsamehe ubudamano yibu.

¹⁴Henzi, i veye hali kavaka inyinga yiyi ya nzetegeki kuduka ku mwinye; kandi si nyala kuva muliduhu ku mwinye: kigira si nyenya vindu vyenyu, navutswa nyenya mwinye: kigira si ga dukira avana kuvikira avivuli vindu, navutswa navivuli ava vikira avana.

¹⁵Na inze nda salannya vyange kandi inze mwene nda salannywa nobuyanzi bwosi kigira livamwoyo lyenyu. Ni mba ni mu yanza kuvita, ngehidzeywi liyanzwa?

¹⁶Navutswa nu bulahi ga ve ndiyo, inze mwene si nda mina mwinye; navutswa, kigira nda li nobugeeri, nda mu gumira nobu geeri.

¹⁷Nda mu nyaga kindu nomukono gwomundu mulala ku yava nda tuma kuudza ku mwinye?

¹⁸Nda tsuuva Tito, kandi nda tuma amitu wetu halala naye. Tito ya mu nyaga kindu naho? Si kwa genda ku roho mulala? Si kwa genda netsinduvatiru yitsyo?

¹⁹Mu ganagana kutwula inyinga yeyo kwevera ku mwinye. Navutswa ku vola imbiri wa Nyasaye mu Kristo. Navutswa vindu vyosi vi veye kigira lyombakwa lyenyu, avayanze vange.

²⁰Kigira ntidza gase ku gosi, lwa ndidza ku mwinye nda mu lola si mu veye neliva lya nyenya, na inze mwene nda loleka ku mwinye neliva lya mu ta yanza; gase ku gosi ga la va amahangali, nembodoka, nobutima, nelyavukana, nelihuudziridza, nelimonyana, nobwigingiri, nekivihiri;

²¹gase lwa nzidza kandi Nyasaye wange a la ngehidza imbiri wenyu, kandi inze nda vererera avanyingi ava tanga kukola ubwoni ava vula kweganira ubudamano nokutsia mbakana, nobuheyi bwa va kola.