Read lulogooli 2 Vakorintho 13 Bible Online

2 Vakorintho 13 - lulogooli bible

2 Vakorintho 13

¹Nzidza ku mwinye kalunu hali kavaka. Ku minwa gyavaloli vaviri kinga vavaka amakuva gosi ga la dinyeridzwa.

²Ntangi kumuvolera, kandi mbola habulavu, kuli lwa nda li ho lwa kaviri, kandi ndiyo kalunu, lwa nta veye ho, kuvolera ava tanga kukola ubwoni, navandi vosi, ni nzidza kandi si nda va vererera;

³kigira mwenya kulola amakuva gobulungi ga Kristo u volanga mu inze; u ta veye mude dekere ku mwinye, navutswa a veye wetsingulu mu mwinye:

⁴kigira ya bambwa mmudedekere, navutswa a veye mwoyo mu tsingulu tsya Nyasaye. Kigira kwinye kandi ku veye avadedekere muye, navutswa ku la va mwoyo halala naye ku tsingulu tsya Nyasaye itsi veye ku mwinye.

⁵Mwehenze mwinye avene, ni mu va ni mu veye mu lisuuvira; mwegeridze mwinye avene. Naho si mu manya amakuva genyu avene, Yesu Kristo a veye mu mwi nve? Ni ga ta li mwa sulwa.

⁶Navutswa nsuuvira mu la manya kwinye si ku suleywi.

⁷Kalunu ku saala Nyasaye mu vule kukola ubudamano; si ga li kwinye ku duke kubugirirwa, navutswa mwinye mu kole aga veye malahi, kali ni ku veye kuli avasuleywi.

⁸Kigira si ku nyala kukola kindu kali kilala kyokuhing'ana nageligali, navutswa aga veye ku ageligali.

⁹Kigira ku sangala lwa ku veye avadedekere, na mwinye mu veye avetsingulu: kandi ku saala yaga mwinye mu ve avadukiru.

¹⁰Kigira yaga ng'oda vindu yivi ni nta veye ho, lwa mbeye ho nduke kuvula kutumekira ubululu, kuli tsingulu tsyo Mwami ya mpa kwombaka, kandi si tsi veye tsyokusambula.

¹¹Inyima, avamitu, mu gase. Mu dukire; mu leme mwoyo; mu ve nomwoyo mulala; mu menye mu mirembe: kandi Nyasaye wobuyanzi nemirembe a la va nemwinye halala.

¹²Mu chelidzane mwinye avene navene nelibusa litakatifu.

¹³Avatakatifu vosi va mu chelidze.

¹⁴Tsimbabasi tsyo Mwami Yesu Kristo, nobuyanzi bwa Nyasaye, nelisanga lya Roho Mutakatifu, vi ve nemwinye mwosi.