Read lulogooli 2 Vakorintho 2 Bible Online

2 Vakorintho 2 - lulogooli bible

2 Vakorintho 2

¹Mu lisuuvira lyenyu. Navutswa nda saavira yaga mwene ntadza ku mwinye kandi neliverera.

²Kigira ni mba ni mu vereridza, nibwaha u sangalidza inze navutswa uyu wa inze nda vereridza?

³Kandi nda ng'oda yaga, ni mba ni ntsitsa nta va neliverera ku yava ava ga ndukira kusangala kuvo; mbeye nelisuuvira ku mwinye mwosi, ubuyanzi bwange bu veye ubuyanzi bwenyu mwosi.

⁴Kigira lwa nda li mu busaliri ubunene nomu lidambidzwa lyomwoyo nda mu ng'odera namaliga manyingi; si ga li mwinye mu vereridzwe, navutswa mu duke kumanya ubuyanzi bwa mbeye nabwo ligali ku mwinye.

⁵Ku vosi mundu na a va na a vereridza, si ya vereridza inze tsyeng'ine, navutswa ha luvega lulala, a vereridza mwinye mwosi (nta mmina kuvita).

⁶Lihebwa amageli kuli yaga lya twula ku vanyingi li dukana nomundu kuli uyu,

⁷ndiyo nu bulahi mwinye mu mu samehe nokumuleminya mwoyo, gase ku makuva gosi mundu kuli uyu a la mirwa ku likira lyobuvereri bwibwe.

⁸Kigira yaga nyenya mmu singeridzire ubuyanzi bwenyu.

⁹Yiki ni kigira nda ng'oda, nduke kumanya ubulungi bwenyu, mu veye avahuliri ku makuva gosi.

¹⁰Navutswa ku uyu wa mu sameha kindu ku vyosi, inze kandi mmu sameha: kigira kindu kya inze nsamehi, ni mba ni nsamehi kindu ku vyosi, nsamehi kigira mwinye imbiri wa Kristo;

¹¹Setani a ta nyola ubwiyangu kukuguuta: kigira si ku vula kumanya lisaavira lilye.

¹²Lwa nda duka Troa kigira ivangeli ya Kristo, kandi lwa ndigulirwa kiliango ku Mwami,

¹³roho gwange si gwa sosa, kigira si nda nyola Tito amitu wange: navutswa nda sivulana navo, ni ntsia Makedonia.

¹⁴Navutswa lisantidza li ve ku Nyasaye, u kwimiriranga mu liguuta kazozo mu Kristo, kandi a lang'aminya mwayu gwelimanya lilye hosi ku kwinye.

¹⁵Kigira ku veye muhomo mulahi gwa Kristo ku Nyasaye, mu yava ava honyanngwa nomu va divanga;

¹⁶ha luvega lulala mwayu kutwula ku likudza kuduka ku likudza; ha luvega lundi mwayu kutwula ku livamwoyo kuduka ku livamwoyo. Kandi ibwaha a dukana nevindu yivi?

¹⁷Kigira kwinye si ku veye kuli avanyingi ava tsukannyi amakuva gandi mu makuva ga Nyasaye, navutswa ku veye kuli nageligali, imbiri wa Nyasaye, ku vola ku Kristo.