Read lulogooli 2 Vakorintho 3 Bible Online

2 Vakorintho 3 - lulogooli bible

2 Vakorintho 3

¹Ku tanganga kandi kwiidzominya? Naho ku veye nelyenya tsibaruwa tsyelidzominya tsidza ku mwinye kuli avandi, naho tsi twula ku mwinye?

²Mwinye mu veye ibaruwa yetu, ya ng'odwa mu myoyo gyetu, i veye nelimanyekana nelisomwa mu vandu vosi;

³kigira mu lang'aminyeywi mu veye ibaruwa ya Kristo, ya kwinye kwa tumekira, si ya ng'odwa nowino navutswa na Roho wa Nyasaye welivamwoyo; si i li mu vibao vyamagina, navutswa mu vibao vyomwoyo gwenyama.

⁴Na kwinye ku veye nelisuuvira ndi ku Nyasaye kigira Kristo:

⁵si ga li kwinye avene ku veye avaduki, kuganagana vindu vyosi kuli vya twula ku kwinye; navutswa ubudu kiru bwetu bu twula ku Nyasaye;

⁶naye iye wa ku kola avadukiru ku ve avatumwa va malago mahya; si ga veye genduguta, navutswa ga roho: kigira induguta yiitanga, navutswa roho gu leta livamwoyo.

⁷Navutswa ubutumwa bwelikudza, bwa ng'odwa, nokukongwa mu magina, ni bu va ni bwa li nobukumi, kuduka avana va Israeli va tamwa kwumika mumoni mwa Musa, kigira ubukumi bwommoni mwimwe; nabwo nobukumi bwa vitanga:

⁸nasindi ubutumiki bwa roho si bu la va nobukumi kuvita?

⁹Kigira ubutumiki bwelikalaga lyekivi ni bu va ni bu veye nobukumi, nasindi ligali ubutumiki bwoblilungi bu la kira kuva nobukumi ligali.

¹⁰Kigira yiki kidzominyangwa si kidzominyangwa mu likuva yili, kigira ubukumi bwa kira.

¹¹Kigira yikyo ki vitanga ni ki va ni kya li nobukumi, nasindi yikyo ki menyanga ki veye nobukumi.

¹²Kunangwa kigira ku veye nelisuuviridzwa kuli yili, ku vola nobuluviriri ligali,

¹³si ku veye kuli Musa, wekunika mumoni mwimwe nengubo inzasasu, avana va Israeli va vule kwumika kuduka kiheri kya yikyo ki vitanga:

¹⁴navutswa tsi ganagani tsyavo tsya kolwa tsindinyu: kigira kuduka kali lero malago ga kale ni ga somwa, ingubo inzasasu i vedza ho, ga vula kuvuulika kuvo bwasasu bwa twulidzwa mu Kristo.

¹⁵Navutswa kuduka lero tsinyinga tsyosi vitabu vya Musa ni vi somwa, ubwasasu bu veye ho mu myoyo gyavo.

¹⁶Navutswa inyinga yemyoyo gyi ligirunkana kuyeka ku Mwami, ubwasasu bu la twulidzwa.

¹⁷Mwami a veye Roho uyu: ha Roho wo Mwami a veye libohololwo bu veye yo.

¹⁸Navutswa kwinye kwosi nomumoni mwa vula kukunikwa ubwasasu ku lolanga ubukumi bwo Mwami kuli mu kyeloleru, ku girukannyangwa kuduka ligondo lilala kutwula ku bukumi kuduka ku bukumi, kuli ku Mwami, Roho uyu.