Read lulogooli 2 Vakorintho 5 Bible Online

2 Vakorintho 5 - lulogooli bible

2 Vakorintho 5

¹Kigira ku manya inyumba yetu ya hasi hano kali ni yononywa, ku veye nelyombakwa li twulanga ku Nyasaye, inyumba i ta lombwa namakono, yemihiga nemihiga, migulu.

²Kigira ligali mu yiyi kwi nye ku kenya ni ku kayirwa kuvikwa lyombakwa lyetu li twula migulu:

³ni ku va ni ku vikwa, ku ta loleka kuva kyahonyo.

⁴Kigira kwinye ligali ava ku veye mu lyombakwa yili ku kenyanga, kigira ku minika; si ga li kigira kwenya kunavulwa, navutswa kwenya kuvikwa ligali yigu gwelikudza, livamwoyo li duke kugumira.

⁵Uyu wa ku kola kigira likuva lyene yili a veye Nyasaye, wa ku ha kihambiriru kya Roho.

⁶Madiku gosi ku veye nekilema mwoyo, kandi ku manya, ni ku veye mu mubiri si ku veye ku Mwami

⁷(kigira ku genda nelisuuvira, si ku genda nelilola);

⁸mbola ku veye nekilema mwoyo, kandi ku yanza ligali ku vuli kuva mu mubiri, ku ve hango halala no Mwami.

⁹Kigira yaga kwiguluhidza, ni ku va ni ku veye ho, kinga ni ku ta veye ho, ku ve avandu ava yanzeka kuye.

¹⁰Kigira ga ku dukira kwinye kwosi kulang'aminywa imbiri wekisako kyelikalaga kya Kristo; ku vosi sa mulala a hebwe kuli kya ya kola ku mubiri kuli ga ya kola, ni ki va kilahi kinga kidamano.

¹¹Kunangwa kigira ku manya litibwa lyo Mwami, ku girunkannya myoyo gyavandu, navutswa ku lang'aminyeywi ku Nyasaye; na inze nsuuvira ku lang'aminyeywi mu myoyo gyenyu kandi.

¹²Si kwiidzominya ku mwinye kandi, navutswa ku wla kuli ku hedza mwinye kya mwiidzominyira kigira kwinye, mu ve nekyokuvativulira aviidzominya ku vi lolekanga, ni vi ta li vyomu mwoyo.

¹³Kigira ubugeeri bwetu ni bu va ni bu goti, ga veye ku Nyasaye; naho ni ku va ni ku veye nobugeeri bwetu bwosi, ga veye ku mwinye.

¹⁴Kigira ubuyanzi bwa Kristo bu ku niganga kigira ku ganagana ndi, mulala na a va ni ya kudzira vosi, vosi va kudza;

¹⁵uyu ya kudzira vosi, ava veye mwoyo va tekolera vyavo avene, navutswa va kolere uyu wa va kudzira na a simuguka kandi.

¹⁶Kunangwa kutwula kalunu kwinye si ku manya mundu kali mulala ku lugano lwomubiri: kali kwa manya Kristo ku lugano lwomubiri, navu tswa kalunu si ku mu manya kandi ndiyo.

¹⁷Kunangwa ku vosi mundu na a veye mu Kristo a veye kilombe kihya: vindu vyosi vya kale vi viti, henza, vindu vyosi vi gwiye vihya.

¹⁸Navutswa vindu vyosi vi twula ku Nyasaye, wa ku hambannya kuye mwene kigira Kristo kandi ya ku ha ubutumwa yibu bwokuhambannya;

¹⁹kuli Nyasaye ya li mu Kristo na a leta avomkivala kuhambana naye, si a validza lihyola lyavo kuvo, na a vika ku kwinye likuva lyokuhambannya.

²⁰Kunangwa ku veye avatumwa kigira Kristo, kuli Nyasaye a goonyanga neminwa gyetu: ku goonya mwinye kigira Kristo, mu hambannywe na Nyasaye..

²¹Uyu wa vula kumanya bwoni ya mu kola kuva ubwoni kigira kwinye; kwinye ku duke kuva ubulungi bwa Nyasaye.