Read lulogooli 2 Vakorintho 6 Bible Online

2 Vakorintho 6 - lulogooli bible

2 Vakorintho 6

¹Muye. Na kwinye ku yinzira halala naye ku mu goonya kandi mu ta vugula tsimbabasi tsya Nyasaye tsi ve tsya vutswa.

²(Kigira a vola, Nda ku hulira inyinga yo bugirirwa, Kandi ku lidiku lyokuhonnya nda ku konya: henzi, lero ni lidiku lyokubugirirwa; henzi, lero ni lidiku lyokuhonnywa.)

³Ku vule kuha mundu kali mulala ku vyosi kyokwikigitalidza, ubutumiki bwetu bu ta kyaywa;

⁴navutswa ku vindu vyosi kwenyolera libugirirwa, kuli avatumwa va Nyasaye, mu bwikudziri bunyingi, mu busaliri, mu budinyu, mu kivi,

⁵mu bukinduki, mu libofwa, mu kivihiri, mu miyinzi, mu lididikana, mu lihonga lilia;

⁶mu litakaswa, mu limanya, mu lyekudzira, mu likolera avandi bulahi, mu Roho Mutakatifu mu liyanza li ta li nobugadi,

⁷mu likuva lyeligali, mu tsingulu tsya Nyasaye ku vyuma vyobulungi kuluvega lwomukono mulungi nomukono mmosi,

⁸ku bukumi, kandi ku livula kuva nobukumi, ku liginwa nokulidzominywa: kuli avagadi navutswa aveligali:

⁹kuli ava ta manyekana, navutswa ava manyekana ligali; kuli ava kudzanga, navutswa henza, ku veye mwoyo; kuli ava hebwanga amageli, navutswa si viitangwa;

¹⁰kuli ava verera, navutswa ava sangalanga kazozo; kuli avadaka, navutswa ku kolanga avanyingi avatugi; kuli ava ta li nekindu, navutswa ku veye nevindu vyosi.

¹¹Minwa gyetu gyi kunuleywi mwinye, Avakorintho, myoyo gyetu gyi nenehidzeywi.

¹²Mu kwinye si mu veye neliminika, navutswa mu minika mu myoyo gyenyu avene.

¹³Kunangwa amadanyi kuli yaga (mmu volera kuli mu veye avana vange), na mwinye mu nenehidzwe ndiyo mu myoyo gyenyu.

¹⁴Mu ta bofwa inira indala nava ta suuvira: kigira ha veye nelisanga ki hagati hobulungi nelihyola? Kinga ha veye nelisanga ki hagati hobulavu nekisundi?

¹⁵Kandi Kristo a veye nelihambana ki ne Biliali Setani? Kinga u suuviranga a veye nekidieli ki halala no ta suuviranga?

¹⁶Kandi litempeli lya Nyasaye li veye nobuhambani ki nemisambwa? Kigira kwinye ku veye litempeli lya Nyasaye welivamwoyo; kuli Nyasaye ya vola, Nda menya muvo, kandi nda genda muvo; kandi nda va Nyasaye wavo, navo va la va avandu vange.

¹⁷Kunangwa kigira yaga Mu twuli hagati havo, mwahuleywi, Mwami a vola, Mu ta dira kindu kidamano Na inze nda mu bugirira

¹⁸Kandi nda va Dada wenyu, Na mwinye mu la va avana vange avayai navakana Mwami Wa Nyala Vyosi a vola.