Read lulogooli 2 Vakorintho 8 Bible Online

2 Vakorintho 8 - lulogooli bible

2 Vakorintho 8

¹Kandi ku mannya mwinye, avamitu, tsimbabasi tsya Nyasaye ya ha mavugano ga Makedonia;

²mu ligeridzwa linene lyobusaliri, bunyingi bwobuyanzi bwavo nobudaka bwavo bwa kira ligali, kuduka ku butugi bwobuhaani.

³Kigira kuli tsingulu tsyavo, ndolekidza yee kandi kuvita tsingulu tsyavo, va haana nobusaaviri bwavo avene,

⁴va ku goonya ligali ku tsimbabasi yitsi tsyelisanga lyokutumekira ava takatifu.

⁵Kandi si ga li kuli kwa suuvira, navutswa lwembiri vehila ku Mwami avene, nokweleta ku kwinye kandi nobulaliri bwa Nyasaye.

⁶Kwinye kwa luha kwa tsuuva Tito, kuli ya tanga miyinzi yigyi, kandi a dukidze ku mwinye kandi tsimbabasi yitsi.

⁷Navutswa kuli mwa kira vindu vinyingi lisuuvira, nelivola, nelimanya, nobugulu bwosi, nobuyanzi bwenyu bu yeka ku kwinye, mu henze mu kire tsimbabasi yitsi kandi.

⁸Si mbola kuhaana munwa, navutswa ku bugulu bwavandi ngeridza kandi ubulungi bwobuyanzi bwenyu.

⁹Kigira mu manya tsimbabasi tsyo Mwami wetu Yesu Kristo, kali ya li mutugi ya gwa mudaka kigira mwinye mwinye mu duke kuva avatugi kigira ubudaka bwibwe.

¹⁰Na inze mu inkuva yiyi mmu hedzanga amakuva gange: kigira yaga na malahi ku mwinye, ava mwa tanga va maliye muhiga mulala, si ga li likola lyeng'ine, navutswa halala nokusaavira kandi.

¹¹Navutswa mu maliridze likola kandi; kuli mwetegeka lisaavira, kandi mu ve nobudukiru mu tsingulu tsyenyu.

¹²Kigira ni gu ve ho mwoyo gwete geke gu bugirirangwa kuli kigero kyomundu a veye nakyo, si ga li kuli kigero kya a ta li nakyo mba.

¹³Kigira si mboye likuva yili, avandi va hone na mwinye mu kupidzwe kivi mba;

¹⁴navutswa li ve lile ng'ana: inyinga ya kalunu, ubuhinda bwenyu bu duke ku bugeheru bwavo, kandi ubuhinda bwavo bu duke ku bugeheru bwenyu; li duke kuva lileng'ana:

¹⁵kuiigang'odwa, Uyu wa vungidza vinyingi si ya veye nevya tigala; kandi uyu wa vungidza vikekeke si ya daka.

¹⁶Navutswa nsantidzanga Nyasaye, u vikanga ubugulu yibu kigira mwinye mu mwoyo gwa Tito.

¹⁷Kigira ya bugirira lyeganehidza lyetu ligali; navutswa kigira mwene ya li nobugulu ligali, yadza ku mwihye nobulaliri bwibwe mwene.

¹⁸Kandi ku tumi halala naye amitu wetu welidzominywa lilye mu ivangeli lya landa mu mavugano gosi;

¹⁹navutswa si ga li yaga geng'ine, navutswa a veye wamavugano ga vika a gende halala nekwinye mu inkuva yetsimbabasi yitsi, tsya ku tumekira kuduka kuleta ubukumi ku Mwami, kandi kuvuula lyetegeka lyemyoyo gyetu:

²⁰kwilinda mu inkuva yiyi ha ta va nomundu kali mulala u lola kindu ku kwinye ku vindu vyobuhaani bwa ku tumekira yibu:

²¹kigira kwa tanga kugana gana ivindu vilahi, si ga li imbiri wo Mwami yeng'ine, navutswa imbiri wavandu kandi.

²²Kandi kwinye ku tumi halala navo amitu wetu, wa ku lemera mwoyo kigira a veye nobugulu ligali mu vindu vinyingi, navutswa kalunu a veye nobugulu kukira ligali kigira lisuuvira linene lya a veye nalyo ku mwinye.

²³Mundu na a teva makuza ga Tito, a veye wa ku sanga naye kandi u yinzira halala na inze kigira mwinye; kinga na a teva amakuva gavamitu vetu, va veye avatumwa va mavugano, kandi va veye ubukumi bwa Kristo.

²⁴Mu lang'aminye kilolero kyobuyanzi bwenyu imbiri wa mavugano, kandi mu lang'aminye kilolero kyeliidzominya lyetu kigira mwinye.