Read lulogooli Vagalatia 4 Bible Online

Vagalatia 4 - lulogooli bible

Vagalatia 4

¹Navutswa mbola, tsinyinga tsyosi wemiyandu na a veye ho mwana si a li nelyavukana nomutugwa kali na a veye mwami wa vosi;

²na vutswa a veye mke ku valindi navahenzi kuduka inyinga ya ise ya laga.

³Kandi kwinye kwa li ndiyo, lwa kwa li avana, kwa tumannyangwa mu megidzo gembiri gomulirova:

⁴navutswa liduka lyenyinga lwa lya duka, Nyasaye ya tuma Mwana wewe, yivulwa mu wekikali, yivulwa na a bofwa mu lilaga,

⁵a duke kuhonnya ava bofwa mu lilaga, ku duke kunyola libugirirwa kuva avana.

⁶Kandi kigira mu veye avana, Nyasaye ya tuma Roho wo Mwana wewe yingire mu myoyo gyetu nokulira, Abba, Dada.

⁷U luhe u vule kuva mutugwa kandi, navutswa u veye mwana; kandi nu u veye mwana, u veye wemiyandu kigira Nyasaye.

⁸Navutswa inyinga yeyo, kigira si mwa manya Nyasaye, mwa li ni mu veye avatugwa va yavo aveliva lyavo li ta li lyavanyasaye:

⁹navutswa kalunu ni mu mali kumanya Nyasaye, navutswa kindu kinene Nyasaye na a mali kumanya mwinye, ga veye ndi mwinye kwirana kandi mu megidzo ku matsyambiri amadedekere agobudaka, aga mwenya kugwa avatugwa vago kandi?

¹⁰Mwinye mu linda madiku, nemyeli, netsinyinga, nemihiga.

¹¹Mbeye nobutii ku mwinye, gase ku vyosi mmu nyankanira vutswa.

¹²Avamitu, nyenya mwinye mu e ve kuli inze mbeye, kigira inze mbeye kuli mwinye. Si mwa nkolera kidamano kali kilala:

¹³navutswa mu manya nda mwilwadzira ivangeli inyinga yokutanga kigira ubudedekere bwa nda li nabwo mu mubiri gwange.

¹⁴Ligeridzwa lyenyu ku mubiri gwange si mwa li lega mba, kandi si mwa sula; navutswa mwa mbugirira kuli nda li ingelosi wa Nyasaye, kandi kuli Kristo Yesu.

¹⁵Kunangwa liidzominya lyenyu li veye haliha? Kigira mmu lolekidzira, ni ga va ni ga nyalika nkano mwa ka twulidza tsimoni tsyenyu nokumpa.

¹⁶Kunangwa mbeye musigu wenyu, kigira nda mu volera ageligali?

¹⁷Va veye nobugulu ku mwinye, navutswa si bu li bulahi; navutswa venya kumuhanira kyova, mu duke kuvenya.

¹⁸Navutswa nu bulahi madiku gosi kugoonywa ku vindu vilahi, si ga li lwa mbeye ho halala nemwinye lweng'ine.

¹⁹Avana va nge vadoto ava ndolera ku ubululu bwelivula kandi kuduka Kristo a loleke ligondo lilye mu mwinye

²⁰navutswa nkano nda ka va halala nemwinye kalunu nokugirunkana linidzu lyange; kigira mbeye nelihayahayidza ku mwinye.

²¹Mu mbolere mwinye, avenyanga kubofwa mu lilaga, si mu hulira lilaga zana?

²²Kigira ga ng'odwa, Abrahamu ya li navana avayai vaviri, mulala yivulwa mu mutugwa, nowundi yivulwa mukali mwene hango.

²³Navutswa mwana womutugwa yivulwa ku lugano lwomubiri; navutswa mwana womkali mwene hango yivulwa kigira lisuuviridzwa.

²⁴Amakuva yaga ga veye lugano: kigira avakali vaviri yava va lolekidzwa kuva malagano gaviri Iilala li twula ku kigulu kya Sinai, livulanga avana ku butugwa, nalyo li veye Hagari.

²⁵Na uyu Hagari a veye kigulu Sinai mu Arabia kandi ki fwanana ne Yerusalemi lya kalunu: kigira li veye mu butugwa halala navana valyo.

²⁶Navutswa Yerusalemi li veye igulu i veye imboholole nayo iyo mama wetu.

²⁷Kigira ga ng'odwa U sangale, ive u veye mugumba wa vula kwivula avana; U twulidze mwoyo u lire ive wa vula kulola ubusaliri bwelivula: Kigira avana va uyu u menya yeng'ine va veye avanyingi kuvita va uyu u veye nomusatsa.

²⁸Kwinye, avamitu, ku veye avana velisuuviridzwa kuli Isaka.

²⁹Navutswa kuli tsinyinga yetsyo, uyu wivulwa ku lugano lwomubiri ya dambidza uyu wivulwa ku lugano lwa Roho, kandi kuduka kalunu ga veye ndiyo.

³⁰Navutswa mang'oda ga vola ndi? U kunge uyu mutugwa halala nomwana wewe: kigira mwana womutugwa si a la lia miyandu halala nomwana womukali mwene hango.

³¹Kunangwa, avamitu, si ku veye avana vomutugwa, navutswa ku veye avana vomukali mwene hango.