Read lulogooli Vafeso 3 Bible Online

Vafeso 3 - lulogooli bible

Vafeso 3

¹Kigira yaga inze Paulo, muhambe wa Kristo Yesu kigira mwinye Avetsihiri,

²ni mu va ni mu hulira amakuva gobulindi bwetsimbabasi tsya Nyasaye tsya nda hebwa kigira mwinye;

³kuli nda mannywa agaviswa mu livuulwa, kuli nda tanga kumung'odera mu makuva makekeke.

⁴Ku yaga lwa mu soma, mu la duka kumanya limanya lyange mu gaviswa ga Kristo;

⁵aga vandu vamakula agandi ga vula kumannywa ku vana vavandu, kuli ga vuuleywi kalunu ku vatumwa vatakatifu noku vaprofeti mu Roho;

⁶ga veye ndi, avandu Vetsihiri va gwiye avasangi avemiyandu, kandi avomubiri mulala, avasangi velisuuviridzwa li veye mu Kristo Yesu kigira ivangeli,

⁷ya nda gwa ku mutumwa, kuli kihaanwa kyetsimbabasi tsya Nyasaye kya nda hebwa kuli miyinzi gyetsingulu tsitsye.

⁸Inze, u veye mukekeke ku mutakatifu u veye mukekeke ku vosi, nda hebwa tsimbabasi yitsi nzilwadzire Avetsihiri ubunyingi bwobutugi bwa Kristo obu ta manyekana bwosi;

⁹nokukola vosi va duke kulola lugano lwobulindi bwagaviswa kutwula tsinyinga tsinyingi bwa viswa mu Nyasaye wa lomba vindu vyosi;

¹⁰ubugeeri bwa Nyasaye obu veye tsing'ano tsinyingi, bu vuulwe kalunu ku ubunene no ku tsingulu tsyomigulu, nelivugana.

¹¹Yili li veye kuli ubulaliri bwemihiga nemihiga bwa ya lalira mu Kristo Yesu Mwami wetu:

¹²wa ku veye nobuluviriri nobwiyangu bwokuduka mu kilema mwoyo kigira lisuuvira kuye.

¹³Kigira yaga mmu goonya mu ta kudza mwoyo kigira kivi kyange kya mbeye nakyo, kigira mwinye, nakyo ki veye ubukumi bwenyu.

¹⁴Kigira yaga nsigamanga imbiri wa Dada,

¹⁵wehiri yosi yomigulu neya hasi tsi langwa lieta kuye,

¹⁶a mu he kudaswa tsingulu mu mundu wenyu womugati kigira Roho wewe, kuli ubutugi bwobukumi bwibwe;

¹⁷Kristo a duke kumenya mu myoyo gyenyu kigira lisuuvira; kuduka mu mali kuva nemiri nomuse mu buyanzi,

¹⁸mu luhe mu nyale kuduka halala navatakatifu vosi, kugumira ubambalalu nobutambi, kandi ubutambi bwokutsia igulu nobwokutsia hasi,

¹⁹nokumanya ubuyanzi bwa Kristo obu vita limanya, mu duke kwizulitswa kali kuduka ku lizula lyosi lya Nyasaye.

²⁰Kalunu ku uyu u nyalanga kukukolera ligali kuvita ga ku nyala kusaava naga kuganagana, kuli tsingulu tsi yinziranga mu kwinye,

²¹ku uyu ubukumi mu livugana nomu Kristo Yesu kuduka ku makula namakula bu veye kuye imihiga nemihiga. Amini.