Read lulogooli Vakolosai 2 Bible Online

Vakolosai 2 - lulogooli bible

Vakolosai 2

¹Kigira nyenya mu manye ubunene bwobusaliri bwa mbeye nabwo kigira mwinye, kandi kigira Avalaodikia, kandi kigira ava kikiri kundola mmoni mwange mwomubiri;

²va duke kuleminywa mwoyo gwavo, va hambanywe halala mu buyanzi, kuduka ubutugi bwosi bwobudukiru bwelimanya, va duke kumanya ubuvisi bwa Nyasaye, obu veye Kristo,

³wobutugi bwosi bwobugeeri nobwelimanya bu viseywi mu.

⁴Mbola yaga ku vosi, mundu kali mulala a ta duka kumugada namakuva madoto.

⁵Kigira kali ni nta veho nomubiri, navutswa mbeye ho halala nemwinye na roho gwange, nokusangala nokulola ubulohidzi bwenyu, nobwidinyeridzi bwelisuuvira lyenyu mu Kristo.

⁶Kunangwa kuli mwa vugula Kristo Yesu Mwami, mu gende ndiyo muye,

⁷mu ve nemiri, kandi avombakeywi muye, nokuvikwa tsingulu mu lisuuvira lyenyu, kuli wa mwegidzwa nokukiridza lisantidza lyenyu.

⁸Mu henze bulahi gase mundu ku vosi a la mu lanyera ku ubugeeri bwomkivala nobugadi bwa vutswa, ku tsing'ano tsyavandu noku megidzo golugano lwelirova, ga ta li ku lugano lwa Kristo.

⁹Kigira ubudukiru bwosi Obwanyasaye bu menya muye ku mubiri,

¹⁰kandi mwinye mu dukidzireywi muye u veye mutwe gwobunene bwosi netsingulu tsyosi.

¹¹Wa mu mali kukeverwa mu nelikevwa li ta kolwa namakono, mu lifwuvula lyomubiri gwenyama, mu likevwa lya Kristo;

¹²mu tebeywi halala naye mu libatidzwa, lya mwa simugukidzirwa mu halala naye kigira lisuuvira mu liyinzira lya Nyasaye, wa mu simugukidza kutwula mu vakudzu.

¹³Mwinye mwa li mwa kudzera mu lihyola lyenyu, nomu livula kukevwa lyemibiri gyenyu, vee, ya mu ha livamwoyo halala naye, lwa ya mala kukusameha mahyola getu gosi;

¹⁴u twulidzi lilaga lya ng'oderwa kwinye mu malago, lya hing'ana nekwinye: kandi u li sundi ha luvega, u li bambi nemisamari ku musalaba gwigu e.

¹⁵U guuti ubunene netsingulu, u vi lang'aminyi habulavu u singiye kuvyo ku musalaba.

¹⁶Kunangwa ku vosi mundu a ta mu kalagira ku vyokulia, kinga ku vyokunwa, kinga ku lidiku lyelilia, kinga ku lilonda mweli, kinga ku lisabato:

¹⁷vindu yivi vi veye kiriri kyevindu vidzanga; navutswa mubiri gu veye gwa Kristo.

¹⁸Mu ta leka mundu kali mulala kumunyaga amadanyi genyu ku lyegehidza lyelyenya lilye mwene, nokusigamira tsingelosi, wiviki mu vindu vya malola, u vimbidzeywi mutwe vutswa mu tsiganagani tsitsye ku lugano lwomubiri,

¹⁹u vuli kugumira Mutwe, kugwo mubiri gwosi, gu gasidzeywi nokuhambanywa halala kigira vyungu vyagwo nemigoye gyagwo, gu medekanga ku limeda lya Nyasaye.

²⁰Ni mu va mwa kudza halala na Kristo ku megidzo ga kale gelirova, kigira ki mwivika mu minwa kuli yava va menya mu lirova,

²¹U ta gumira, kandi, U ta tsatsama, kandi, U ta dira

²²(vi veye vindu vyokufwera vyosi mu likola), ku lilonda megidzo namalago gavandu?

²³Vindu vi fwana ubugeeri mu lisigamira lyoweyanzanga, nomu lyegehidza, nomu likupidzwa mubiri kivi; navutswa si vi li vindu vyokukonya kwigalira likayirwa lyetu lyomubiri.