Read lulogooli Vakolosai 3 Bible Online

Vakolosai 3 - lulogooli bible

Vakolosai 3

¹Kunangwa ni mu va ni mwa simugukidzwa halala na Kristo mwenye vindu vi veye igulu, ha Kristo a veye, wikaye ha mukono mulungi gwa Nyasaye.

²Muganagane ligali vindu vi veye igulu mu ta ganagana vindu vya hasi.

³Kigira mwa kudza, nelivamwoyo lyenyu li viseywi halala na Kristo mu Nyasaye.

⁴Kristo a veye livamwoyo lyetu, lwa a li lang'aminywa hene yaho na mwinye mu la lang'aminywa mu bukumi halala naye.

⁵Kunangwa mwiite vivero vyenyu vi veye vya hasi: navyo nokutsia mbakana, nekifwabwi, nelikayirwa lidamano, nelyegomba lidamano, nelikayirwa vyavene, li veye kusigamira misambwa.

⁶Kigira vindu yivi ubutima bwa Nyasaye buudzanga ku vana vobutingu:

⁷na mwinye kandi mwa genda mu vindu yivi ku matsyambiri, lwa mwa menya mu vindu yivi.

⁸Navutswa kalunu mwinye kandi mu te vyosi ihale: ubutima, nelivihirirwa, nembodoka, namanyego, namakuva madamano mu minwa gyenyu:

⁹mu ta veherana avene navene; kigira mu mali kufwuvula mundu wa kale halala nelikola lilye,

¹⁰kandi mwiviki mundu muhya, u kolangwa muhya a duke a nyole limanya kuli ligondo lyowa mu lomba:

¹¹ha la vula kuva ho Mugreki, no Muyuda, kinga likevwa, nelivula kukevwa, kinga u ta manya miima, kinga Musikuthi, kinga mutugwa, kinga muboholole; navutswa Kristo a veye vyosi, kandi a veye mu vyosi.

¹²Kunangwa mu kole kuli avatovole va Nyasaye, ava veye avatakatifu navayanzwa, mwivike mwoyo gwetsimbabasi, nelikola lilahi, nelyegehidza, nobuhooma, nobwikudziri;

¹³mwikudzirane avene navene, nokusamehana mundu sa mulala nowa kye, ku vosi mundu na a veye nelikuva ku wakye; kuli Mwami ya sameha mwinye, na mwinye mu kole ndiyo:

¹⁴nokuvita vindu yivi vyosi mu ve nobuyanzi, bu veye kiboheru kyobudukiru.

¹⁵Kandi mu leke mirembe gya Kristo gyamehe mu myoyo gyenyu, mwinye mwa langirwa mu mubiri mulala mu duke kugyinyola, kandi mu ve nelisantidza.

¹⁶Likuva lya Kristo li menye mu mwinye nobuhinda: mu bugeeri bwosi mwegidzane nokugerihidzana avene navene ku zaburi noku tsinyimbu noku tsinyimbu tsyomu roho, mwimbire Nyasaye nemyoyo milahi.

¹⁷Kandi ku vyosi vya mu kolanga mu makuva nomu likola, mu kolere vyosi mu lieta lyo Mwami Yesu, mu santidzere Nyasaye Dada ku uyu.

¹⁸Mwinye avakali, mwegehidze ku vasatsa venyu, kuli wa ga dukanga mu Mwami.

¹⁹Mwinye avasatsa, mu yanze avakali venyu, mu ta va vihirirwa.

²⁰Mwinye avana, mu hulire avivuli venyu mu vindu vyosi, kigira yiki ki yanzekanga mu Mwami.

²¹Mwinye vadada, mu ta vihiriridza avana venyu, va vule kwoneka mu myoyo.

²²Avatugwa, mu hulire avami venyu ku lugano lwomubiri, mu vindu vyosi; mu ta kola butugwa bwetsimoni, kuli ava yanzidza avandu, navutswa nomwoyo gu ta li nobugadi; nomu gwokutia Mwami:

²³ku vyosi vya mu kola, mu kole nomwoyo, kuli ku Mwami, ga ta va kuli ku vandu;

²⁴mu manya mu la nyola ku Mwami madanyi gemiyandu: mu tumikiranga Mwami Kristo.

²⁵Kigira uyu u kyaminyanga a la nyola ubukyamu bwibwe bwa ya kola kandi: si ha veye nelitovola.