Read lulogooli 1 Vatesalonike 1 Bible Online

1 Vatesalonike 1 - lulogooli bible

1 Vatesalonike 1

¹Paulo, na Silvano, na Timoteo, ibaruuwa yetu yiyi i duke ku livugana lya Vatesalonike li veye mu Nyasaye Dada nomu Mwami Yesu Kristo: Tsimbabasi tsi ve ku mwinye nemirembe.

²Ku santidzanga Nyasaye tsinyinga tsyosi kigira mwinye mwosi, ku mu tala mu lisaala lyetu

³kwidzulitsanga kazozo miyinzi gyenyu gyelisuuvira, nelinyankana lyenyu lyobuyanzi, nobwikudziri bwenyu bwelisuuvira li veye mu Mwami wetu Yesu Kristo, imbiri wa Nyasaye wetu Dada.

⁴Kigira, mwinye ava mitu avayanze va Nyasaye, ku manya litovolwa lyenyu,

⁵kigira ivangeli yetu si ya duka ku mwinye mu amakuva amere, navutswa mu tsingulu, nomu Roho Mutakatifu, nomu limanyiridza linyingi; kuli wa mu manya lugano lweliva lyetu ku mwinye kigira mwinye.

⁶Kandi mwinye mwa gwa avegi ku kwinye noku Mwami, mu mali kunyola likuva mu busaliri bunyingi, halala nelisangala lya Roho Mutakatifu;

⁷kuduka mwinye mu gwiye kilolero ku vandu vosi mu Makedonia nomu Akaya ava suuvira.

⁸Kigira gu twuli ku mwinye mwoyo gwelivola lyo Mwami, si gu duki Makedonia na Akaya mweng'ine, navutswa hosi lisuuvira lyenyu ku Nyasaye li landi; ku luhi ku vuli kuva nelyenya kuvola kindu.

⁹Kigira avene va vola amakuva getu agolugano lwelingira lyetu ku mwinye; kandi kuli mwa vika ha mugongo misambwa, nokuyeka ku Nyasaye, nokutumekira Nyasaye u veye mwoyo kandi weligali,

¹⁰no kulindirira Mwana wewe kutwula migulu wa ya simugukidza kutwula mu vakudzu naye ni Yesu, u honnya kwinye mu butima buudzanga.