Read lulogooli 1 Vatesalonike 4 Bible Online

1 Vatesalonike 4 - lulogooli bible

1 Vatesalonike 4

¹Inyima yaga, avamitu, ku mu goonya nokumweganehidza mu Mwami Yesu, kuli mwa vugula ku kwinye nu bulahi mu gendere nokuyanzidza Nyasaye, kuli mu gendanga, mu duke kukira ligali.

²Kigira mu manya lugano lwama lago ga kwa mu ha ku Mwami Yesu.

³Kigira kya Nyasaye ya lalira ki veye litakaswa lyenyu, mwinye mu vule kutsia mbakana;

⁴mundu sa mulala ku mwinye a duke kumanya kweyameha mwene mu butakatifu nomu bugoosi,

⁵si mu li mu lyegomba nomu likayirwa, kuli avandu yavo ave Tsihiri ava vula kumanya Nyasaye;

⁶mundu a ta ga manya nokugenderera amwavo wewe mu makuva yaga: kigira Mwami a veye mbanzi mu makuva yaga gosi; kuli kwa tanga kumumannya nokumulolekidzira.

⁷Kigira Nyasaye si ya ku langira kifwabwi, navutswa butakatifu.

⁸Kunangwa uyu u sulanga, si a sulanga mundu navutswa a sulanga Nyasaye u hedzanga mwinye Roho Mutakatifu wewe.

⁹Navutswa mu buyanzani bwavamwavo si mu veye nelyenya inze mmu ng'odere: kigira mwinye avene Nyasaye u mali kumwegidza kuyanzana avene navene;

¹⁰kigira mwinye mu kola likuva yili ligali ku vamwavo vosi va veye mu Makedonia. Navutswa kwinye ku mu tsuva mu kole kukira ligali;

¹¹ka ndi mwiguluhidze kwehodzeridza, nokulonda ubutumiki bwenyu avene nokukola miyinzi namakono genyu avene, kuli wa kwa mu laga;

¹²mu duke kugenda nobugoosi imbiri wa yavo ava veye kyova, mu ta va nobu daka bwekindu kali kilala.

¹³Navutswa, avamitu, si kwenya mwinye mu vule kumanya amakuva ga yavo va gonanga; mu ta verera kuli avandi ava ta li nelisuuvira.

¹⁴Kigira ni ku va ni ku suuvira Yesu ya kudza ma na a simuguka, ga veye kandi ndiyo ava gonanga mu Yesu, Nyasaye a la va leta halala naye.

¹⁵Kigira ku mu volera yaga kigira likuva lyo Mwami, kwinye ava ku veye mwoyo, ava ku tigala kuduka ku lidza lyo Mwami, si ku liyimirira yava ava mali kugona.

¹⁶Kigira Mwami mwene a liika kutwula migulu nomwoyo munene, kandi nomwoyo gwengelosi munene kandi nogwekisiliva kya Nyasaye, na yavo va kudza mu Kristo va la simuguka imbiri;

¹⁷inyima kwinye ava ku veye mwoyo, ava ku li tigala, ku la hilwa mu malesi halala na yavo, ku duke kwaganira Mwami mu bwerefu: na ndiyo ku la va halala no Mwami mihiga nemihiga.

¹⁸Kunangwa mu leminyane myoyo mwinye avene navene ku makuva yaga.