Read lulogooli Joshua 10 Bible Online

Joshua 10 - lulogooli bible

Joshua 10

¹Na ga duka, lwa Adonizedeku mwami wa Yerusalemi ya hulira kuli Joshua ya vugula lidala lya Ai, kandi kuli a mali kulyononya ligali (kuli ya kola Yeriko nomwami walyo, na ndiyo a koli ku Ai nomwami walyo), kandi kuli avamenyi Gibeon va lombi mirembe na Israeli, na va veye halala havo;

²va tia ligali, kigira Gibeon li veye lidala linene, kuli lilala ku madala gobwami, na kigira li veye linene kuvita Ai, na vasatsa vosi ava veye mulyo va veye avetsingulu.

³Kigira yaga Adonizedeku mwami wa Yerusalemi ya tuma ku Hoham mwami wa Hebironi, na Piram mwami wa Jaramuthu, na Jafia mwami wa Lakishi, na Debiri mwami wa Egilon, na a va volera,

⁴Mwanegire ku inze, mu nkonye, na ku duye Gibeon; kigira va lombi mirembe na Joshua na avana va Israeli.

⁵Kunangwa avami vatano va Vaamori, mwami wa Yerusalemi, nomwami wa Hebironi, nomwami wa Jaramuthu, nomwami wa Lakishi nomwami wa Egilon, va vugana halala, na vanegira, yavo na amahe gavo gosi, no kusingiridza amahema gavo imbiri wa Gibeon, kulwana nalyo.

⁶Na avasatsa va Gibeon va tuma vatumwa ku Joshua kuduka hokusosa ha Gilgali, ni va mbolera, U ta lindagiridza mukono gugwo ku avatumekiri vovo; wanegire bwangu ku kwinye, kukuhonnya, nokukukonya: kigira avami vosi va Vaamori ava menyanga mu kivala kyevigulu va ku twulira halala.

⁷Kunangwa Joshua yanegira kutwula Gilgali, uyu, na avandu velihe vosi halala naye, na vetsingulu na avobunyali vosi.

⁸Na Yahova ya volera Joshua, U ta va tia: kigira mmali kuvavika mmakono gogo, si ha veye nomundu kali mulala muvo u nyala kusingira imbiri wowo.

⁹Ma Joshua ya duka kuvo nonoho; kigira yanegira kutwula Gilgali ubudiku bei.

¹⁰Na Yahova ya va salannya imbiri wa Israeli, na ya viita neliita linene ha Gibeon, na a va kunga nokuvalonderera ku inzira yokwanegira Bethhoron, na a va kuya kuduka Azeka, no kuduka Makeda.

¹¹Na ga duka, lwa va li ni virukanga imbiri wa Israeli, lwa va sulunguta Beth-horon, Yahova ya va lasa magina manene kutwula migulu kuduka Azeka, ni va kudza: ava kudza kwiitwa na magina gembula va veye vanyingi kuvita ava avana va Israeli viita nekivavi.

¹²Hene yaho Joshua ya volera Yahova, ku lidiku yilyo lya Yahova ya twulidza Vaamori imbiri wa avana va Israeli; na a vola imbiri wetsimoni tsya Israeli, Ive Liuva, singira igulu ku Gibeon; Ne ive, Mweli, singira mwivona lya Aijalon.

¹³Neliuva lya singira nomweli gwa gaywa, Kuduka lwa ihiri ya mala kuvanza kisalya ku vasigu vavo. Si ga ng'odwa mu kitabu kya Jasharu? Na liuva lya singira hagati ho migulu, na si lya kola bwangu kuyera kuli kuduka himbi lidiku lyosi.

¹⁴Na si li veye ho lidiku lindi kuli yili ku matsyambiri kinga ku ga londanga inyima, kuduka Yahova ya hulira mwoyo gwomundu: kigira Yahova ya lwanira Israeli.

¹⁵Na Joshua yirana, na Israeli vosi virana halala naye, kuduka hokusosa ha Gilgali.

¹⁶Na avami vatano yava viruka, na vivisa mu luhangaywa lwa Makeda.

¹⁷Na Joshua ya volerwa makuva yago, kuvola, Avami vatano va nyoleki, navo vivisi mu luhangaywa lwa Makeda.

¹⁸Na Joshua ya n vola, Mu gomagominye magina manene kukunika munwa gwoluhangaywa, na mu vike avandu ahimbi kuvalinda:

¹⁹navutswa mwinye mu ta singira mba; mu londerere avasigu venyu, mu kupe ava veye inyima; mu ta va leka vingire mmadala gavo mba: kigira Yahova Nyasaye wenyu u mali kuvavika mu makono genyu.

²⁰Na ga duka Joshua na avana va Israeli lwa va li va mali kuviita neliita linene, kuduka ni va mali kudividzwa, navatigala kuvo lwa va mali kwingira mmadala getsingaga,

²¹ma avandu vosi virana ku Joshua mu hokusosa ha Makeda nemirembe: si ha veye nomulala wa vola kindu ku avana va Israeli, kali mulala kuvo.

²²Hene yaho Joshua ya vola, Kunula munwa gwoluhangaywa, mu ndetere avami vatano hano kutwula mu luhangaywa.

²³Navo va kola li ndiyo, ni va mu letera avami vatano yavo kutwula mu luhangaywa, mwami wa Yerusalemi, nomwami wa Hebironi nomwami wa Jaramuthu, nomwami wa Lakishi, nomwami wa Egilon.

²⁴Na ga duka, lwa va letera Joshua avami vatano yavo, Joshua ya langa avasatsa vosi va Israeli, na a volera avanene vavandu velihe ava tsia halala naye, Mwisunde himbi, mu vike tsindavatiru tsyenyu mu magoti ga avami yava. Navo visunda ahimbi, ni va vika tsinduvatiru tsyavo ku magoti gavo.

²⁵Na Joshua ya va volera, Mu ta tia mba, kandi mu ta kudza mwoyo, mu ve avagulu na avaluviriri: kigira ni ndiyo Yahova a la kolera avasigu venyu vosi ava mu lwana navo.

²⁶Nenyima Joshua ya va kuya, na a viita, na a va sunga ku misala gyitano: navo va sung'anana ku misala kuduka mgolova.

²⁷Na inyinga ya liuva lya yera, Joshua ya laga, navo va va twulidza ku misala, ni va va ta mu luhangaywa ha va li ni vivisa, na va vika magina manene mmunwa gwoluhangaywa, kuduka lidiku lya lero.

²⁸Na Joshua ya vugula lidala lya Makeda ku lidiku yilyo, na a li duya nobwogi bwekivavi, nomwami walyo: na a va dividza ligali na vosi ava veye mwoyo mulyo; si ya leka kali mulala wa tigala; na ya kolera mwami wa Makeda kuli ya kolera mwami wa Yeriko.

²⁹Na Joshua ya vita kutwula Makeda kuduka Libina, na Israeli vosi va li halala naye, na va lwana na Libina:

³⁰kandi Yahova ya vika lidala yilyo, nomwami walyo, mmukono gwa Israeli; na a li duya nobwogi bwekivavi, na avandu vosi ava li mulyo; si ya leka kali mulala wa tigala mulyo; na ya kolera mwami walyo kuli ya kolera mwami wa Yeriko.

³¹Na Joshua ya vita kutwula Libina, na Israeli vosi va li halala naye, ni va duka Lakishi, ni va singeridza lihe lyavo imbiri walyo, no kulwana nalyo:

³²na Yahova ya vika Lakishi mmukono gwa Israeli; na ya li vugula ku lidiku lya kaviri, na ya li duya nobwogi bwekivavi, na avandu vosi va veye mulyo, kuli gosi ga ya kolera Libina.

³³Hene yaho Horam mwami wa Gezeri yanegira kukonya Lakishi: na Joshua ya mu duya halala na avandu veve vosi kuduka lwa ya vula kuleka kali mulala wa tigala kuye.

³⁴Na Joshua ya vita kutwula Lakishi, na Israeli vosi halala naye, kuduka Egilon; na va singeridza lihe lyavo imbiri walyo, na va lwana nalyo:

³⁵na va li vugula lidiku yilyo, na va li duya nobwogi bwekivavi; na avandu vosi va li mulyo, ya va dividza ligali lidiku yilyo, kuli gosi ga ya kolera lidala lya Lakishi.

³⁶Na Joshua yanegira kutwula Egilon, na Israeli vosi halala naye, kuduka Hebironi: ni va lwana nalyo:

³⁷na va li vugula, na va li duya nobwogi bwekivavi, nomwami walyo, na madala galyo gosi, na avandu vosi va veye mulyo; si ya leka kali mulala kutigala, kuli gosi ga ya kolera Egilon; navutswa ya li dividza ligali, na avandu vosi ava li mulyo.

³⁸Na Joshua yirana, na Israeli vosi halala naye, kuduka Debiri, ni va lwana nalyo:

³⁹na ya li vugula, nomwami nalyo, na madala galyo gosi: na va ga duya nobwogi bwekivavi, na va dividza ligali avandu vosi va veye mulyo; na si ya leka kali mulala ku tigala: kuli ya kolera Hebironi ni ndiyo ya kolera Debiri, nomwamii walyo; kuli ya kolera kandi Libina, nomwami nalyo.

⁴⁰Kunangwa Joshua ya duya kivala yikyo kyosi, kyekivala kyevigulu, nekivala kya Kusini, nekivala kyekereremu, nevivala vi diguluku, na avami vavyo vosi: si ya leka kali mulala kutigala, navutswa ya vononya ligali vosi avaheranga, kuli Yahova, Nyasaye wa Israeli, ya laga.

⁴¹Na Joshua ya va duya kutwula Kadeshbarnea kuduka Gaza, kivala kyosi kya Goshen, kuduka Gibeen.

⁴²Na avami yavo vosi, nevivala vyavo Joshua ya vugula inyinga indala kigira Yahova, Nyasaye wa Israeli ya lwanira Israeli.

⁴³Na Joshua yirana, na Israeli vosi halala naye, kuduka hokusosa havo ha Gilgali.