Read lulogooli Joshua 22 Bible Online

Joshua 22 - lulogooli bible

Joshua 22

¹Inyinga yeyo Joshua ya langa Varubeni, na Vagadi, nenusu yehiri ya Manase,

²na a va volera, Mwinye mu gumiye gosi ga Musa mutumekiri wa Yahova ya mu laga, kandi mu huliye mwoyo gwange mu yaga gosi ga nda mu laga:

³si mwa leka avamwavo venyu madiku yaga manyingi kuduka lero navutswa mu gumiye malago neiilagana lya Yahova Nyasaye wenyu.

⁴Kalunu Yahova Nyasaye wenyu u mali kuha avamwavo venyu bwelemeridzi, kuli ya va volera: kunangwa kalunu mwinye mwirane, mu tsie mu mahema genyu, ku kivala kyemiyandu gyenyu, kya Musa mutumekiri wa Yahova ya mu ha engereka ya Yordani.

⁵Navutswa mweguluhidze ligali kukola malago na miima gya Musa mutumekiri wa Yahova ya mu laga, kuyanza Yahova Nyasaye wenyu, nokugenda mu tsinzira tsitsye tsyosi, nokugumira amalago gege, nokuhambana naye, nokumutumekira nomwoyo gwenyu gwosi, na roho gwe nyu gwosi.

⁶Kunangwa Joshua ya va gasidza, na a va tuma va tsie: navo va tsia mmahema gavo.

⁷Na Musa ya li ni ya mala kuha inusu indala yehiri ya Manase miyandu mu Bashan; navutswa inusu yindi Joshua y a va ha miyandu hagati ha vamwavo vavo engereka ya Yordani ku luvega lwemadioli. Halala na yaga Joshua lwa ya va tuma va tsie mu mahema gava, ya va gasidza,

⁸na ya va volera, na a vola, Mwirane nobutugi bunyingi mu mahema genyu, nemitugu minyingi ligali, nefetha, nethahabu, nomugasa, nekivya, netsingubo tsinyingi ligali: mu gavulire avamwavo venyu vilanye vyavasigu venyu.

⁹Navana va Rubeni navana va Gadi nenusu yehiri ya Manase virana, ni va leka avana va Israeli kutwula Shilo, li veye mu kivala kya Kanani, kutsia mu kivala kya Gileadi, kivala kyemiyandu gyavo, gya va gumira kuli lilaga lya Yahova nomukon o gwa Musa.

¹⁰Na lwa va duka ku kivala ki veve himbi ku Yordani, ki veye mu kivala kya Kanani, avana va Rubeni navana va Gadi nenusu yehiri ya Manase vombaka ubwali himbi Yordani, bwa li ubwali bunene kuhenza ku.

¹¹Navana va Israeli va hulira ni ga volwa, Henzi, avana va Rubeni navana va Gadi nenusu yehiri ya Manase va mali kwombaka ubwali ku luvega lwembiri lwekivala kya Kanani, mu kivala ki veye himbi Yordani, ku luvega lwavana va Israeli.

¹²Navana va Israeli, lwa va hulira makuva yaga, livugana lyosi lyavana va Israeli vevungidza avene halala mu Shilo, va duke kwanegira kutsia kulwana navo.

¹³Navana va Israeli va hila vatumua ku avana va Rubeni, noku avana va Gadi, noku inusu yehiri ya Manase, kuduka mkivala kya Gileadi, navo ni yava Finehasi mwana wa Eleazaru umusalisi,

¹⁴halala na avandu avanene likumi, munene mulala wenyumba ya vaguga ku tsihiri sa indala ya Israeli; navo sa mulala va li mitwe gyetsinyumba tsyavaguga mu tsielfu tsya Israeli

¹⁵Na va duka ku avana va Rubeni, noku avana va Gadi, noku inusu yehiri ya Manase, mu kivala kya Gileadi, na va volerana navo, ni va vola,

¹⁶Livugana lyosi lya Yahova li volanga, Ni lihyolo ki lya mu hyoye ku Nyasaye wa Israeli mu luhe mu girunkani lero nokuleka kulonda Yahova, mu lyeyombakira ubwali, nokutinguha lero ku Yahova?

¹⁷Ubudamano bwa Peoru bu veye bukekeke ligali ku kwinye, bwa ku kikiri kwetakasa avene kubwo kuduka lero, kali iplegi ni i duka ku livugana lya Yahova,

¹⁸navutswa ga mu dukira lero kugirunkana nokuleka kulonda Yahova? Na ga la va, kigira mwinye mu tinguhi Yahova lero, mugamba naye a la va nobutima ku livugana lyosi lya Israeli.

¹⁹Navutswa kivala kyemiyandu gyenyu, ni ki va ni ki veye kidamano, hene yaho mwinye mwambuke nookwingira mu kivala kyemiyandu gya Yahova, kyelihema lya Yahova li menyi mu, na mu vugule miyandu hagati hetu: navutswa mu vule kutinguha Yahova, kandi mu vule kutinguha kwinye, ku lyeyombakira ubwali bwundi ku bwali bwa Yahova Nyasaye wetu.

²⁰Akan mwana wa Zera si ya kola mahyolo ku vindu vya gimwa, nobutima bwa gwa ku livugana lyosi lya Israeli? Na mundu uyu si ya diva yeng ine mu ubudamano bwibwe.

²¹Kunangwa avana va Rubeni navana va Gadi nenusu yehiri ya Manase va tivula, ni va volera yavo ava li mitwe gyetsielfu tsya Israeli, ni va vola,

²²Yahova, Nyasaye, Wanyala Vyosi, Yahova, Nyasaye, Wanyala Vyosi, niye u manya; na Israeli a la manya: ni ga va ni ga veye mu butingu, kinga ni ga va ni ga veye mu lihyolo ku Yahova (u ta ku honnya lero),

²³kwinye kweyombakira ubwali ku duke kugirungana nokuleka kulonda Yahova; kinga ni ku va ni ku haana kubwo kihaanwa kyokusamba, kinga kihaanwa kyobusie, kinga ni ku va ni ku haana kubwo kihaanwa kyemirembe, Yahova mwene a vanze likuva yili;

²⁴kinga ni ku va ni kwa tovola kukola yaga nobutii, nelisaavira, ni kuvola, Mu madiku gadzanga namusia avana venyu va la volera avana vetu, nokuvola, Mwinye mu veye na ki ku Yahova, Nyasaye wa Israeli?

²⁵Kigira Yahova ya kola mugera wa Yordani kuva lwako hagati hetu nemwinye, avana va Rubeni, navana va Gadi: si mu veye nekidieli ku Yahova: ni ndiyo nkano avana venyu va kola avana vetu kuleka kutia Yahova.

²⁶Kunangwa kwa vola, Kwetegeke kwombaka bwali, si bu li bwekihaanwa kyokusamba, kinga bwekihaanwa:

²⁷navutswa bu la va lilolekidza hagati hetu nemwinye, kandi hagati hevisukululwi vyetu inyima wetu, kuduka kukola ubutumekiri bwa Yahova imbiri wewe nevihaanwa vyokusambwa, halala nevihaanwa vyetu, noku vihaanwa vyetu vyemirembe; avana venyu va vule kuvolera avana vetu mmadiku gadzanga, Mwinye si mu veye nekidieli mu Yahova.

²⁸Kunangwa kwa vola, Ga la va lwa va li kuvolera likuva kuli yilyo, kinga kuvolera avandu vevisukululwi vyetu mu madiku gadzanga, kwinye ku la vola, Henza lifwanana lyobwali bwa Yahova, bwavaguga vetu va lomba, si bwa li bwevihaanwa vyokusamba, kinga bwevihaanwa; navutswa bu veye lilolekidza hagati hetu nemwinye.

²⁹Nyasaye a ku gaye kutinguha Yahova, nokugirunkana lero kuleka kulonda Yahova, nokwombaka bwali bwevihaanwa vyokusamba, kinga vihaanwa vyobusie, kinga vihaanwa, ku bwali bwundi lugano ku yibu bwa Yahova Nyasaye wetu bu veye imbiri welihema lilye.

³⁰Kunangwa Finehasi umusalisi, navanene velivugana, avemitwe gyetsielfu tsya Israeli va li halala naye, lwa va hulira makuva gavana va Rubeni, navana va Gadi, navana va Manase va vola, ga va yanzidza ligali.

³¹Na Finehasi mwana wa Eleazaru umusalisi ya volera avana va Rubeni, navana va Gadi, navana va Manase, na a vola, Lidiku lya lero yili ku manya Yahova a veye hagati hetu, kigira si mu hyoye imbiri wa Yahova: kalunu mwinye mu mali kuhonnya avana va Israeli ku mukono gwa Yahova.

³²Na Finehasi mwana wa Eleazaru umusalisi, navanene, virana ni va leka avana va Rubeni, navana va Gadi, kutwula mu kivala kya Gileadi, nokwingira mu kivala kya Kanani, kwirana ku avana va Israeli, ni va va letera makuva kandi.

³³Navana va Israeli va yanza inkuva yiyi; navana va Israeli va gasidza Nyasaye, si va vola kandi makuva gokutsia kuvo kulwana navo, nokwononya kivala kyavana va Rubeni navana va Gadi va menya mu.

³⁴Navana va Rubeni navana va Gadi va gulika bwali yilu Ed: kigira va vola, bu veye lilolekidza hagati hetu Yahova a veye Nyasaye.