Read lulogooli Joshua 3 Bible Online

Joshua 3 - lulogooli bible

Joshua 3

¹Ma Joshua ya vuka mugamba mabwebwe, va twula Shitim, ni va duka ku mugera gwa Yordani, uyu na avana va Israeli vosi; na va menya ho lwa va kikiri kwambuka.

²Ga duka inyima ya madiku gavaka, avanvampara va tsia hagati hokusosa;

³ni va laga avandu, ni va va volera, Lwa mu lola lisanduku lyelilagana lya Yahova Nyasaye wenyu, na vasalisi Valevi va li gingi, hene yaho mu la twula ha mu veye, nokulilonda.

⁴Navutswa ubwiyangu bu la va yo hagati helisanduku nemwinye, bweligera lyamakono tsielfu tsiviri: mu ta tsia himbi nalyo mba, mu duke kumanya inzira i mu dukiranga kutsia kuyo; kigira mwinye mu kikiri kugenda ku inzira yiyi.

⁵Joshua ya volera avandu, Mwetakase; kigira mugamba Yahova a la kola kyokugenya hagati henyu.

⁶Kandi Joshua ya volera vasalisi, nokuvola, Mu gingi lisanduku lyelilagana, mu tange kwambuka. Navo va ginga lisanduku lyelilagana, na vimirira avandu.

⁷Na Yahova ya volera Joshua, Lero ndi nda tanga kukukuminya imbiri wetsimoni tsya Israeli vosi, va duke kumanya, kuli nda li halala na Musa, ni ndiyo nda va halala nive.

⁸Na u la laga vasalisi va ginganga Iisanduku lyelilagana, nokuvola, Lwa mu duka ku luginga lwamadzi ga a Yordani, mu la singira mu Yordani.

⁹Na Joshua ya volera avana va Israeli, Hambi hano, mu huliri makuva ga Yahova Nyasaye wenyu.

¹⁰Na Joshua ya vola, Ku yaga mu la manya Nyasaye a veye mwoyo a veye hagati henyu, kandi uyu si a li vula kukunga nokutwulidza imbiri wenyu Vakanan, na Vahiti, na Vahivi, na Vaperizi, na Vagirigashi, na Vaamori, na Vajebusi.

¹¹Henza, lisanduku lyelilagana lya Yahova welirova lyosi lyambukanga imbiri wenyu nokwingira Yordani.

¹²Kunangwa kalunu mu vugule avasatsa likumi na vaviri mu tsihiri tsya Israeli, ku ihiri sa indala mundu mulala.

¹³Ga la duka, lwe tsinduvatiru tsyevirenge vyavasalisi ava ginganga lisanduku lya Yahova Mwami welirova lyosi, tsi singira mu madzi ga Yordani, amadzi ga Yordani ga la kalika, amadzi yago ga twulanga ku luvega lwelugulu; na ga a singira kuva kitumi kilala.

¹⁴Na ga duka, lwa vandu yavo va twula mmahema gavo, va duke kwambuka Yordani, avasalisi ava ginga lisanduku lyelilagana va li imbiri wavandu;

¹⁵na lwa yavo va ginga lisanduku va duka Yordani, nevirenge vyavasalisi ava ginga lisanduku lwa vya hema ku madzi (kigira mugera gwa Yordani gwizulira kuvita tsinzako tsyagwo tsyosi tsinyinga tsyosi tsyeligesa),

¹⁶hene yaho amadzi gikanga kutwula ku luvega lwolugulu ga singira, na ga diguluka na ga gwa kitumi ihale ligali, kuduka ha Adam, lidala li veye himbi Zarethan; na amadzi ga sulunguta kutsia ku luvega lwenyanza yekereremu, inyanza yo Munyu, ga kalika ligali: na avandu yavo vambuka kulungika Yeriko.

¹⁷Na avasalisi va ginga lisanduku lyelilagana lya Yahova va singira budinyu ku marova amumu hagati ha Yordani; na Israeli vosi vambuka ku marova amumu, kuduka ihiri yosi ya mala kwambuka Yordani.