Read lulogooli Joshua 5 Bible Online

Joshua 5 - lulogooli bible

Joshua 5

¹Na ga duka, avami vosi va Vaamori, ava li engereka wa Yordani ku luvega lwemadioli, na avami vosi va Vakanani, ava li himbi nenyanza, lwa va hulira kuli Yahova ya kaminya amadzi ga Yordani, ga twule imbiri wa avana va Israeli, kuduka lwa va mala kwambuka, myoyo gyavo gya yenguka, kinga si va li na roho muvo kandi, kigira avana va Israeli.

²Inyinga zana Yahova ya volera Joshuaj Welombere mibano gyamagina madinyu, na u keve avana va Israeli hali kaviri.

³Kunangwa Joshua ya lombera mibano gyamagina madinyu, na ya kevera avana va i Israeli ha kigulu kyamagodo.

⁴Na kivune kya Joshua ya va kevera ni yiki: avandu vosi ava twula Egepeti, ava li avasatsa, avandu vasatsa vosi ava tsitsanga mu lihe, va kudzera mu kyagalangwi ku inzira, lwa va mala kutwula Egepeti.

⁵Kigira avandu vosi ava twula va li va mala kukevwa; navutswa avandu yavo vosi avivulirwa mu kyangalangwi ku inzira lwa va twuli Egepeti, yavo vosi va li va keva mba.

⁶Kigira avana va Israeli va genda mihiga makumi gane mu kyangalangwi, kuduka ihiri yosi, avandu vasatsa va tsitsanga mu lihe ava twula Egepeti, va li va mala kudiva, kigira si va hulira mwoyo gwa Yahova: navo nivo ava Yahova yisuhira si a la va leka va duke kulola kivala kya Yahova yisuhira vaguga vavo a la ku ha, kivala ki gangulukanga amaveere nobwuki.

⁷Na avana vavo, va ya singeridza mu bugono bwavo, yavo nivo ava Joshua ya keva: kigira va li ni va kikiri kukevwa, kigira va li ni va kikiri kuvakeva ku inzira.

⁸Na ga duka, lwa ya mala kuvakeva ihiri yosi, va menya hango havo mu hokusosa, kuduka lwa va hona.

⁹Na Yahova ya volera Joshua, Lidiku lya lero yili mmali kugomagominya tsisoni tsya Egepeti tsi twuli ku mwinye. Kigira yaga lieta lya ha zana lya langwa Gilgali, kuduka lero.

¹⁰Na avana va Israeli vombaka mahema gavo ha Gilgali; na va lomba lilia lya lipasaka ku lidiku li kola likumi na gane gomweli, mgolova mu kivala kyekereremu kya Yeriko.

¹¹Navo va lagira ku buswage bwekivala ku mugamba gwa londa lipasaka, ubukima bu ta li na mamera, ne vi kalange, ku lidiku yilyo.

¹²Na mana ya hera mugamba, inyima wokulagira buswage bwekivala; na avana va Israeli si va nyola mana kandi mba; navutswa va lia ku vyokulia vyekivala kya Kanani muhiga yigwo.

¹³Na ga duka, lwa Joshua ya li himbi nelidala lya Yeriko, ya ginga tsimoni tsitsye na a lola, na henza, mundu musatsa ya singira ku lungika imbiri wewe naye ya li ne kivavi mmukono gwigwe: na Joshua ya tsia kuye, na a mbolera, Ive u veye ku luvega lwetu, naho u veye ku luvega lwa avasigu vetu?

¹⁴Ya vola, Auwa; navutswa nduki kalunu kuva munene welihe lya Yahova. Ma Joshua ya gwa hasi mammama, na ya mu sigamira, na a mu teva, Mwami wange a volera ki inze mutumekiri wewe?

¹⁵No munene welihe lya Yahova ya volera Joshua, Twulidza kilatu kikyo ku kirenge kikyo; kigira ha u singive ha veye hatakatifu. Na Joshua ya kola ndiyo.