Read lulogooli 2 Vatesalonike 1 Bible Online

2 Vatesalonike 1 - lulogooli bible

2 Vatesalonike 1

¹Paulo, na Silvano, na Timoteo, ibaruwa yetu yiyi i dukire livugana lya Vatesalonike mu Nyasaye Dada wetu no Mwami Yesu Kristo;

²Tsimbabasi nemirembe gyi twulanga ku Nyasaye Dada, noku Mwami Yesu Kristo, gyi ve na mwinye.

³Ga ku dukira kusantidza Nyasaye madiku gosi kigira mwinye, avamitu, kuli wa ga dukanga, kigira lisuuvira lyenyu li medekanga ligali, kandi ubuyanzi bwomundu sa mulala ku mwinye mwosi bwa a veye nabwo ku wakye, bu kiranga;

⁴kuduka kwinye avene kwidzominya kigira mwinye mu mavugano ga Nyasaye, kigira ubwikudziri bwenyu nelisuuvira lya mu veye nalyo, mu lidambidzwa lyenyu lyosi, nomu kivi kya mwikudzira mu.

⁵Yiki ni kilolekidzu kyobulungi bwelikalaga lya Nyasaye; mwinye mu duke kuvali dzwa kuva avadukani ku bwami bwa Nyasaye, bwa mu nyolera ku kivi:

⁶ni ga va ni ga veye ubulungi ku Nyasaye kutunga yavo kivi ava mu kupidza kivi,

⁷navutswa mwinye ava kupidzwa kivi li la va lyelemereridza halala nekwinye, mu lilang'aminywa lyo Mwami Yesu kutwula migulu halala netsingelosi avetsingulu tsitsye mu muliru gwetsimemo,

⁸a la va tunga kisalya ava vula kumanya Nyasaye, nokuvula kuhulira ivangeli yo Mwami wetu Yesu:

⁹ava li hebwa amageli, nago ga veye lidividzwa mihiga nemihiga kutwula imbiri wo Mwami, kandi kutwula mu bukumi bwetsingulu tsitsye,

¹⁰inyinga a lidza kwidzominywa mu vatakatifu veve, nokugenyerwa mu yavo ava suuvira, mu lidiku yilyo (kigira lilolekidza lyetu ku mwinye lya bugirirwa).

¹¹Kigira yaga ku saala Nyasaye kazozo kigira mwinye Nyasaye wetu a duke kulola mwinye kuva avadukanu mu lilangwa lyenyu, nokudukidza netsingulu, lyegomba bulahi nemiyinzi gyosi gyelisuuvira;

¹²lieta lyo Mwami wetu Yesu li duke kwidzominyirwa mu mwinve na mwinye muye, kuli tsimbabasi tsya Nyasaye wetu netsyo Mwami Yesu Kristo.