Read lulogooli 1 Timoteo 5 Bible Online

1 Timoteo 5 - lulogooli bible

1 Timoteo 5

¹U ta gondokera mukulundu, navutswa u mu goonye kuli dada wowo; navakekeke, kuli avamwavo vovo:

²navakeere kuli vamama vovo; navang'erere kuli avabotso vovo nobugoosi bwosi.

³U he avakunzakali veligali lidzominywa.

⁴Navutswa ku vosi mukunzakali u veye navana kinga avisukulu, va tange kweyegidza litibwa lya Nyasaye ku venyumba vavo, nokugwuha avivuli vavo: kigira yili li yanzeka imbiri wa Nyasaye.

⁵U veye mukunzakali weligali, kandi a veye yeng'ine u veye nelisuuvira lilye ku Nyasaye kandi u menyanga mu lisaala nomu lihomba ubudiku nombasu.

⁶Navutswa u menyanga mu lilonda uluyai, u kudzi mu liva lya a veye mwoyo.

⁷Vindu yivi kandi, u vi lage, va ta va nekindu kuvo.

⁸Navutswa ku vosi mundu na a ta linda aveve, ligali yava avenyumba yeye, u mali kwambakana lisuuvira, kandi u veye mudamano kuvita u ta suuvira.

⁹Kali mulala a ta ng'odwa ku vakunzakali na a ta duka mihiga amakumi gatanu nelilala, wa li womusatsa mulala,

¹⁰wa lolekidzwa kuva nemiyinzi milahi; na a va ni ya leranga avana, na a va ni yingiridzanga avageni, na a va ni ya savidzanga virenge vyavatakatifu, na a va ni ya konyanga ava kupa kiva, na a va ni ya londanga miyinzi gyosi milahi nobugulu.

¹¹Navu tswa avakunzakali avang'erere u vambakane: kigira inyinga vebaaye ku Kristo venya va tsie ulukali;

¹²navo va veye nelikalagirwa kivi kigira va teye lisuuvira lyavo lyembiri.

¹³Kandi aga vita yaga vega ubugata, ni va vodonkana mu tsinyumba netsinyumba; kandi si va veye avagata veng'ine, navutswa kandi va veye avomuntama kandi avahudziridzi, va volanga amakuva ga ta va duka.

¹⁴Kunangwa nye nya avang'erere va tsie tsinkali, vivule avana, va linde tsinyumba, kandi va ta ha musigu ubwiyangu bwokunyega kali inyinga indala:

¹⁵kigira kalunu avalala va mali kugirunkana kuyeka ku Setani.

¹⁶Ku vosi mukali u suuviranga na a veye navakunzakali, a va konye, livugana li vule kuminika; Ii duke kukonya yava ava veye avakunzakali veligali.

¹⁷Avakulundu avamehanga bulahi va volwe va dukani nelidzominywa lya kaviri, ligali yava ava nyankana ku mivinzi gyelivola nomu lyegidza.

¹⁸Kigira mang'oda ga vola, U ta boha munwa gweng'ombe inyinga i hulanga ubuswage. Kandi, Muyinziri a dukana namadanyi gege.

¹⁹U ta bugirira kindu ki volwa ku mukulundu ni ki ta li ku valoli vaviri kinga vavaka.

²⁰Avonanga u va gayire imbiri wa vosi, avandi va duke kutia.

²¹Nku laga imbiri wa Nyasaye, nembiri wa Kristo Yesu, nembiri wetsingelosi ava tovolwa, u linde vindu yivi bugira kuva nelikalaga lya bwangubwangu, kandi u ta kola kindu kali kilala nelyeridza.

²²U ta vika makono ku mundu bwangu kali mulala, kandi u ta va nelisanga mu bwoni bwavandu vandi: welinde u ve museredze.

²³Kutwula kalunu u ta nwa amadzi geng'ine, navutswa u tumekire iwaini inkekeke kigira inda yoyo, kandi kigira ubudedekere bubwo hali ka nyingi.

²⁴Ubwoni bwavandu valala bu veye habulavu, bwimiranga kuduka mu likalaga; nobwavandi bu twula inyima.

²⁵Kandi ndiyo gyi veye ho miyinzi milahi gyi veye habulavu; kandi yigyi gyi ta li ndiyo si gyi nyala kuviswa.