Read lulogooli 1 Timoteo 6 Bible Online

1 Timoteo 6 - lulogooli bible

1 Timoteo 6

¹Ku vatugwa ava veye isi wenira va vole avanene vavo va dukani nelidzominywa lyosi, lieta lya Nyasaye halala namegidzo li ta nyegwa.

²Kandi yava ava veye navanene vavo ava suuviranga, va ta va lega mba, kigira va veye avamwavo; navutswa nu bulahi va va tumekire bulahi kigira avanene yava ava vugulanga ubulahi ku miyinzi gyavo va veye avasuuviri navayanze. Vindu yivi wegidze kandi u va tsuve.

³Ku vosi mundu na a leta amegidzo lugano lundi, kandi na a ta bugirira amakuva gobulamu, ago Mwami wetu Yesu Kristo, kandi megidzo aga hambana nelitibwa lya Nyasaye;

⁴u vimbi mutwe, kandi si a manya kindu, navutswa u viti mutwe ku mateva noku mahangali gamakuva ga letanga imbodoka, nobutindi, namanyego, netsiganagani tsindamano,

⁵nelihing'ana lyavandu, voneika ubugeeri navo va daki ageligali, va ganagana litibwa lya Nyasaye li veye inzira yevyambeti.

⁶Navutswa litibwa lya Nyasaye halala nelibugirira liva lya u veye li veye vyambeti vinyingi.

⁷Kigira si kwa duka mu lirova nekindu, kandi si ku nyala kutsia nekindu kali kilala;

⁸navutswa ni ku veye ne vyokulia netsingubo vindu yivi vi la ku duka.

⁹Navutswa yavo ave nyanga kuva nobutugi va gwidzanga mu ligeridzwa nomu mitego, nomu likayirwa linyingi lyobusiru nelyo kwononnya, li hila avandu mu bukyamu nomu budivi.

¹⁰Kigira kitinya kyobudamano tsing'ano tsyosi ki veye liyanza ubutugi: bwa valala vivika mu likayirwa va goti kandi va twuli ku lisuuvira, kandi nokwetumita avene nobusaliri bunyingi.

¹¹Navutswa ive, O mundu wa Nyasaye wiruke vindu yivi; u londe buiungi, nelitibwa lya Nyasaye, nelisuuvira, nobuyanzi, nobwikudziri, nobuhooma.

¹²U dinye kulwana ubulwani bulahi bwelisuuvira, u gumire livamwoyo li ta here mba, lya wa langirwa, kandi weyama lyeyama lilahi imbiri wavaloli vanyingi.

¹³Nku tsuva imbiri wa Nyasaye, u hedzanga vindu vyosi livamwoyo, kandi imbiri wa Kristo Yesu, wa lolekidza lyeyama lilahi imbiri wa Pontio Pilatu;

¹⁴u linde lilaga li ta va nembala, li ta va nelinyegwa, kuduka lilang'ama lyo Mwami wetu Yesu Kristo:

¹⁵mu tsinyinga tsyalyo U Veye Netsingulu Veng'ine, Wa Gasidzwa, Mwami wavami, Munene ku vamehanga kuli vanene, a la lolekidza;

¹⁶u veye neliwla kukudza yeng'ine, u menyanga mu bulaw obu tisundwa himbi; womundu a ta lola kali mulala, kandi si ha veye nomundu u nyala kumulola: kuye lidzominywa netsingulu tsi ve kuye mihiga nemihiga. Amini.

¹⁷U lage ava veye avatugi mu tsinyinga tsya kalunu, va ta va nobwigingiri, kandi va ta vika lisuuvira lyavo ku ubutugi bu ta suuvirwa, nawtswa va suuvire Nyasaye, u ku hedzanga vindu vyosi nobuhinda ku duke kuvitumekira nobuyanzi;

¹⁸kandi va kole bulahi, va ve avatugi ku miyinzi milahi, va ve avahaani vevindu, kandi va ve avasangi navandi mu vindu vyomwoyo;

¹⁹vivikire akiba yomuse mulahi kuduka tsinyinga tsidzanga, va duke kugumira livamwoyo li veye lyeligali.

²⁰Ive O Timoteo, u linde kya wa kolwa mulindi wakyo, u girunkane kutwula ku tsimbaka tsya vutswa, netsyamanyego, namahangali ga langwa limanya navutswa ga veye ububehi;

²¹lyavalala va londa ku ma va gotidza lisuuvira. Tsimbabasi tsi ve halala nemwinye.