Read lulogooli Vahebraina 10 Bible Online

Vahebraina 10 - lulogooli bible

Vahebraina 10

¹Kigira lilaga li veye nekiriri kyevindu vilahi vidzanga, i vuli kuva nelifwana lyavyo, visyuviriru vi haanangwa ku muhiga nomuhiga, si vi nyala mihiga gyosi kukola avisunda himbi, avadukiru.

²Ni ga ta veye ndiyo nkano si vya leka kuhaanwa? Kigira ava sigamiranga ni va mali kutakaswa inyinga indala nkano va vula kuva nomwoyo gwokumanya bwoni kandi.

³Navutswa mu visyuviriru yivi ha veye nelidzulitsa bwoni ku muhiga nomuhiga.

⁴Kigira si ga nyalika amasahi getsigiriki na getsimbuli kutwulidza ubwoni.

⁵Kigira yaga inyinga yingira mu lirova, a vola, Visyuviriru nevihaanwa si wenya, Navutswa wa nombera mubiri;

⁶Mu vihaanwa vigyima vyokusambwa nevisyuviriru kigira ubwoni si wa yanzidzwa navyo:

⁷Kunangwa nda vola, Henza, mmali kuudza (Mu tsikaratasi tsyekitabu ga ng'odwa ku inze) Kukola ubulaliri bubwo, O Nyasaye.

⁸Kuli a vola inyima, Visyuviriru nevihaanwa, nevihaanwa vigyima vyokusambwa, nevisyuviriru kigira ubwoni si wa vyenya, kandi si wa yanzidzwa navyo (vya haanwa kuli Iilaga),

⁹kunangwa ya vola, Henza, mmali kuudza kukola ubulaliri bubwo. Ya twulidza lyokutanga a duke kusingeridza lya kaviri.

¹⁰Kigira ubulaliri bwibwe kwinye ku takaseywi ku kihaanwa kyomubiri gwa Yesu Kristo inyinga indala eng'ine.

¹¹Kandi ligali avasalisi vosi va singiranga kazozo kukola ubutumwa nokuhaana visyuviriru zana, vi li vula kali hakuzuzu kutwulidza ubwoni:

¹²navutswa uyu, inyinga ya mala kuhaana kisyuviriru kilala kigira ubwoni kuduka mihiga gvosi yikala ha mukono mulungi gwa Nyasaye;

¹³kutwula inyinga yeyo a lindanga kuduka avasigu veve va kolwe kisako kyevirenge vivye

¹⁴Kigira ku kisyuviriru kilala ya va kola avadukiru mihiga nemihiga yavo ava takaswa.

¹⁵Kandi Roho Mutakatifu a ku lolekidzira, kigira inyima wa ya vola yaga.

¹⁶Yili ni lilagana lya ndi va kolera Inyima wamadiku yago, Mwami a vola: Nda vika lilaga lyange mu myoyo gyavo, Kandi nda ga ng'oda mu rnyoyo gyavo; hene yaho ya vola,

¹⁷Kandi ubwoni nobwebaali bwavo si nda vidzulira kandi.

¹⁸Kunangwa helisamefwa lyavyo li veye, si ha veye kandi nevihaanwa kigira ubwoni.

¹⁹Kunangwa, avamitu, kigira ku veye nobuluviriri bwokwingira hatakatifu ku masahi ga Yesu,

²⁰ku inzira ya ya ku tangira, inzira impya neyelivamwoyo kuvitira ku kyokukinga, livola ii veye mubiri gwigwe,

²¹kandi kigira ku oeye nomusalisi munene ku inyumba ya Nyasaye;

²²kwisunde himbi nomwoyo gweligali nomu lisuuvira lyobudukiru, ku veye nemyoyo gyetu gyuheywi kutwulidza mwoyo mudamano; nomubiri gwetu gwogidzwa namadzi malahi,

²³ku gumire budinyu lyeyama lyelisuuvira lyetu li ta dengeya; kigira uyu wa laga a veye musuuvirifu.

²⁴Ku ganane avene navene kuduka kuvukidzana ku buyanzi noku miyinzi milahi;

²⁵ku ta leka livugana halala avene navene, ku ta va kuli miima gyavalala gyi veye, navutswa li ve litsuvana; kandi kukola kuvita ligali, inyinga mu lola lidiku yilyo lisunda himbi.

²⁶Kigira ni ku va ni ku kola ubwoni ne litovola inyima wa ku vuguye limanya lyageligali, si ha tigala kisyuviriru kyobwoni,

²⁷navutswa li veye ho lihenzerera likalagirwa lyobutii nelyobululu bwomuliru gu li lia avahingi.

²⁸Mundu wononya lilaga lya Musa ku likuva lyavaloli vaviri kinga vavaka, a kudzanga bugira liverererwa:

²⁹mu loli ndi, nasindi uyu u duvagi Mwana wa Nyasaye, nokuvola amasahi gelilaga na aga ya takaswa nago ga veye kindu kidamano, nokulega Roho wetsimbabasi, ga mu dukira kuhebwa amageli hali ganga?

³⁰Kigira ku manya uyu wa vola, Isira ni yange, nda tunga. Kandi agandi, Mwami a la kalagira avandu veve.

³¹Li veye likuva lyokutihidza kugwa mu makono ga Nyasaye welivamwoyo.

³²Navutswa mwidzulire madiku ga vita, ga mwa kolerwa mu ubulavu, mwikudzira ku mahangali manene gobusaliri;

³³yiyi, mwa kolwa kiloleru ku manyego nekivi; kandi yiyi, mwa gwa avasangi halala na yavo ava kolwa ndiyo.

³⁴Kigira mwa salira mu myoyo halala na yavo ava li mu buhambe, kandi mwa bugirira nobuyanzi kunuulwa vindu vyenyu, kigira mu manya mwinye avene mu veye nevindu vilahi kuvita yivyo navyo vi ta hera mba.

³⁵Kunangwa mu ta ta ubuluviriri bwenyu obu veye namadanyi manene.

³⁶Kigira mu veye nelyenya lyobwikudziri, inyinga mu mali kukola aga Nyasaye yenyanga, mu nyole lisuuviridzwa.

³⁷Kigira i tigaye inyinga inkekeke, Uyu uudzanga a ladza, kandi si a la lindagira.

³⁸Navutswa mulungi wange a la va mwoyo kigira lisuuvira: Kandi ni yirana inyima mwoyo gwange si gu la mu yanza.

³⁹Navutswa kwinye si ku veye mu yavo avirana inyima kuduka mu budivi; navutswa ku veye mu yavo ava veye nelisuuvira kuduka mu buhonnyi bwomwoyo.