Read lulogooli Vahebraina 11 Bible Online

Vahebraina 11 - lulogooli bible

Vahebraina 11

¹Kunangwa lisuuvira li veye ki dinnyanga vindu vi henzererangwa, kindu ki lungikidza vindu vi ta lolekanga.

²Kigira ku yili avaguga va lolekidzwa.

³Ku lisuuvira ku manya vindu vyosi vya lombwa nelikuva lya Nyasaye, kuduka vindu vi loleka si vya lombwa nevindu vi loleka.

⁴Ku lisuuvira Habili ya letera Nyasaye kisyuviriru kilahi kuvita kya Kaini, kya ya lolekidzirwa ku, ya li mulungi, Nyasaye ya lolekidza ku vihaanwa vivye: kulyo kali ni ya kudza, a ki vola.

⁵Ku lisuuvira Enoka yadikidzwa a vule kulola likudza; kandi si ya loleka, kigira Nyasaye ya mwadikidza: kigira imbiri welyadikidzwa lilye ya li na a lolekidzeywi ya yanzeka ku Nyasaye:

⁶kandi bugira lisuuvira si ga nyalika kuyanzeka kuye; kigira uyu uudzanga ku Nyasaye ga mu dukira kusuuvira a veye ho, kandi niye muhaani wa madanyi ga yavo ava mwenyanga.

⁷Ku lisuuvira Nuhu, lwa Nyasaye ya mu mannya amakuva gevindu vi kikiri kuloleka, ku litia lya ya tia Nyasaye, ya lomba liato a duke kuhonnya avenyumba yeye; ku yago ya kalagira avelirova va ve nekindu kuvo, kandi ya gwa wemiyandu gyobulungi bu veye ku lisuuvira.

⁸Ku lisuuvira Abrahamu lwa ya langwa, ya hulira a twule a tsie aha a li nyola ha ve miyandu gyigye; naye ya twula na a tsia na a ta manya wa a tsitsanga.

⁹Ku lisuuvira ya gwa mumenyi mu kivala kyelisuuviridzwa, kuli a veye mu kivala ki ta li kikye, nokumenya mu mahema halala na Isaka na Yakobo ava li vemiyandu gyelisuuviridzwa zana halala naye:

¹⁰kigira ya henzerera lidala li veye nomuse, lya Nyasaye a veye mwombaki nomulombi.

¹¹Ku lisuuvira Sara mwene ya vugula tsingulu tsyokutanga visukululwi lwenyinga yeye ya vita, kigira ya vola wa suuviridza a veye musuuviriiu:

¹²kigira yaga, vivulwa ku mulala wa li kuli mukudzu, vanyingi va leng'ana netsing'ereng'ani tsyomigulu, kandi kuli muyeke gu veye ku luginga lwenyanza, gu ta valika.

¹³Yava vosi va kudza mu lisuuvira, va vula kunyola lisuuviridzwa, navutswa va li ni va li loleye hale, nokulkhelidza, nokweyama va li ava menya navagehdi mu lirova.

¹⁴Kigira ava vola amakuva kuli yaga va lang'aminya venya kivala kyavo avene.

¹⁵Kandi ligali va va ni vidzulitsa kivala kya va twula mu, nkano va li nobwiyangu kwirana.

¹⁶Navutswa kalunu venyanga kivala kilahi kuvita, nakyo ki veye migulu; kigira yaga Nyasaye si ya lola tsisoni kulangwa Nyasaye wavo; kigira u va lombeye lidala.

¹⁷Ku lisuuvira Abrahamu, lwa ya geridzwa, ya twulidza Isaka, a ve kisyuviriru: yee, uyu ya vugula lisuuviridzwa nobuyanzi ya li na a twulidza mwana wewe muderwa;

¹⁸uyu wa volerwa; Visukululwi vivyo vi la nyoleka mu Isaka:

¹⁹a volanga Nyasaye a nyala kusimugukidza kali kumutwulidza mu vakudzu; kandi ya mu nyola kutwula yo mu lifwana.

²⁰Ku lisuuvira Isaka ya gasidza Yakobo na Esau, kali mu vindu vi li va lwenyima.

²¹Ku lisuuvira Yakobo, lwa iya kudzanga, ya gasidza avana va Yosefa sa mulala; na a sigama lwa yidira ku impimbo yeye.

²²Ku lisuuvira Yosefa, inyinga kiheri kikye kya li himbi, ya tala amakuva agelitwula lyavana va Israeli; na a laga ku vigumba vivye.

²³Ku lismlvira Musa, lwa yivulwa, avivuli veve va mu visa imyeli gyivaka, kigira va lola a veye mwana mulahi; kandi si va tia munwa gwomwami.

²⁴Ku lisuuvira Musa, lwa ya gwa mundu u duki, ya sula kulangwa mwana womukana wa Farao;

²⁵ya tovola kusanga mu likupidzwa kivi lyavandu va Nyasaye, kuvita kuva nobuyanzi bwobwoni ku inyinga

²⁶a vola linyegwa lya Kristo li veye ubutugi ubunene kuvita ubutugi bwa Egepeti: kigira ya henzerera madanyi.

²⁷Ku lisuuvira ya twula Egepeti, ya vula kutia ubutima bwomwami; kigira yikudzira kuli a lola uyu u ta loleka.

²⁸Ku lisuuvira ya kola lipasaka, nokwuha masahi, uyu wa dividza ava tanga kwivulwa a ta va dira.

²⁹Ku lisuuvira va vita mu inyanza inzakanyu kuli ku marova amumu: lwa Vagepeti va geridza kukola ndiyo va kudzera mu madzi.

³⁰Ku lisuuvira madigi ga Yeriko ga gwa, inyima ya ga kumbiridzwa madiku gatano na gaviri.

³¹Ku lisuuvira Rahabu wamalaya si ya diva halala na yavo ava vula kuhulira, kigira yingiridza avaluti nemirembe.

³²Kandi inze nda vola ki agandi? Kigira tsinyinga si tsi la duka ni mbola amakuva ga Gideoni, naga Baraka, naga Samsoni, naga Jefetha; naga Daudi, naga Samweli, naga vaprofeti:

³³ava guutira ku lisuuvira ubwami bwavami, va kola bulungi, va nyola lisuuviridzwa, va kunikaminwagyeving'ang'a,

³⁴va guuta tsingulu tsyomuliru, va hona ku bwogi bwekivavi, kutwula mu budedekere va hebwa tsingulu, va gwa avagulu mu lihe, va kunga amahe gavageni.

³⁵Avakali va vugula avakudzu vavo mu lisimugukidzwa; navandi va saliridzwa nobudamano, va sula lihona lyavo, va duke kunyola lisimuguka lilahi kuvita.

³⁶Navandi va li neligeridzwa lyetsiseko nelyelikuywa, yee, nelyelibofwa nelyelivikwa munyumba yavahambe:

³⁷va laswa magina, va kalwa nomusameno, va geridzwa, viitwa nekivavi: va vodonkana viviki tsingubo tsyamagondi netsyetsimbuli: va li avadaka, va li mu kivi, va kolwa ubudamano

³⁸(avandu avelirova li ta dukana kuva navo), va vodonkananga mu kyangalangwi, nomu vigulu, nomu tsimbangaywa, nomu mbogo bwelirova.

³⁹Yava vosi, lwa va mali kulolekidzwa ku lisuuvira lyavo, si va nyola lisuuviridzwa zana,

⁴⁰kigira Nyasaye ya vikira kwinye kindu ki veye kilahi kuvita, yava bugira kwinye va ta duka kukolwa avadukanu.