Read lulogooli Vahebraina 4 Bible Online

Vahebraina 4 - lulogooli bible

Vahebraina 4

¹Kunangwa, lwa lisuuviridza lyelingira mu bwelemeridza bwibwe li tigala, ku tie, gasi mbula, mulala ku mwinye a vula kwingira.

²Kigira kwinye kwilwadzwa ivangeli kuli yavo, navutswa likuva lya va hulira si lya va konya, kigira va vula ku tsuganya lisuuvira halala nelihulira.

³Kigira kwinye ava ku mali kusuuvira kwingiye mu bwelemeridzi zana; kuli wa ya vola Kuli ndisuha mu livihirirwa lyange, Si va lingira mu bwelemeridzi bwange: kali miyinzi gya twekidzwa kutwula lwa lirova lya lombwa muse.

⁴Kigira ya vola ahandi kuli ndi ku lidiku lya gatano na gaviri, Kandi Nyasaye ku lidiku lya gatano na gaviri ya sosa ku miyinzi gyigye gyosi:

⁵kandi hano, Si va lingira mu bwelemeridzi bwange.

⁶Kunangwa kigira ku litigala avalala va lingira, kandi kigira yava ava tanga kwilwadzirwa amakuva malahi si vingira kigira livula kuhulira lyavo,

⁷kandi a laga lidiku lilala, Lero, na a vola, mu Daudi inyima wetsinyinga kuli wa tsi veye (kuli wa ga volwa ku matsyambiri), Lero ni mu hulira mwoyo gwigwe, Mu ta dinnya myoyo gyenyu.

⁸Kigira Joshua a va ni ya va ha bwelemeridzi, nkano si ya vola inyima lidiku lindi.

⁹Kunangwa ubwelemeridzi bwelisabato bu tigaye ku vandu va Nyasaye.

¹⁰Kigira uyu wingiye mu bwelemeridzi bwibwe a sosanga mwene ku miyinzi gyigye kuli wa Nyasaye ya sosa ku miyinzi gyigye.

¹¹Kunangwa kwidinnye kwingira mu bwelemeridzi zana, mundu ku vosi a ta gwa ku lugano lwelifwana zana.

¹²Kigira likuva lya Nyasaye li veye mwoyo, kandi li veye netsingulu, kandi li veye nobwogi kuvita kivavi kyobwogi ku vyosi tsimbega tsyombi, kandi li tumitanga kuduka kwavukannya mwoyo na roho, nevyungu nobuhaali, kandi li veye liyangu ukumanya tsiganagani nobulaliri bwomwoyo.

¹³Kandi si ha li nekilombe ki ta li habulavu imbiri wewe: navutswa vindu vyosi vi veye kyahonyo nokulang'aminywa imbiri wetsimoni tsya uyu wa ku veye ku namakuva.

¹⁴Kunangwa kigira ku veye nomusalisi munene wetsingulu wingira na a vita mu ligulu, Yesu Mwana wa Nyasaye, ku gumire ligali lyeyama lyetu.

¹⁵Kigira si ku veye nomusalisi munene u ta nyala kuverera ku budedekere bwetu; navutswa uyu wa geridzwa mu vindu vyosi kuli kwinye, navutswa bugira ubwoni.

¹⁶Kunangwa kwisunde himbi ku intebe yetsimbabasi nobuluviriri, ku duke kuvugula liverererwa nokunyola tsimbabasi tsyokukukonya mu inyinga i li duka.