Read lulogooli Yakobo 2 Bible Online

Yakobo 2 - lulogooli bible

Yakobo 2

¹Avamitu, mu ta va nelisuuvira lyo Mwami wetu Yesu Kristo uyu niye Mwami wobukumi, nelyeridza ku vandu.

²Kigira ni yingira mu livugana lyenyu mundu wiviki imingiri yethahabu, netsingubo tsindahi, kandi ni yingira mudaka u veye nengubo imandagalu;

³na mwinye mu henzanga wiviki ingubo indahi, nokumuvolera, Ive wikala hano halahi; kandi mu volera mudaka Singira hala, kinga wikala ha virenge vyange;

⁴si mu kola litovolannya avene navene, nokugwa avakalagi veliganagana lidamano?

⁵Mu hulire, avamitu avayanze; Nyasaye si ya tovola ava veye avadaka vomulirova, va ve avatugi velisuuvira, kandi va ve ava lia miyandu gyobwami bwa ya laga ava mu yanzanga?

⁶Navutswa mwinye mwononnyi lidzominywa lyomundu mudaka. Avatugi si va mu minanga, nokumung'usa kuduka imbiri wentebe yelikalaga?

⁷Yava si va nyega lieta lilahi lya mu langangwa ku?

⁸Navutswa ni mu dukidza malago gobwami kuli mang'oda, U yanze mutende wowo kuli weyanza mwene, mu koli bulahi:

⁹navutswa ni mu va nelyeridza ku vandu, mu kola ubwoni, kandi malago ga mu lang'aminya kuva avahyoli.

¹⁰Kigira ku vosi wenya kugumira malago gosi, navutswa yikigitala ku likuva lilala, u gwiye u volwa muhyoli wa gosi.

¹¹Kigira uyu wa vola, U ta heya, ya vola kandi, U tiita. Kalunu nu u vula kuheya, navutswa wiita, u gwiye muhyoli wamalago.

¹²Mu vole ndiyo, nokukola ndiyo kandi, kuli avandu va li kalagirwa ku malago gelibubohololwa.

¹³Kigira likalaga si li veye netsimbabasi ku uyu u ta li netsimbabasi: tsimbabasi tsiidzominyanga ku likalaga.

¹⁴Avamitu, ga konya ki, mundu na a vola a veye nelisuuvira, navutswa si a veye nelikola? Iisuuvira zana li nyala kumuhonnya?

¹⁵Amitu kinga mbotso na a va na a veye kyahonyo nokudaka vyokulia vya kase,

¹⁶kandi mulala ku mwinye a va volera, Tsii nemirembe, mu nyole luya nokwiguta; navutswa si mu va ha vindu vyomubiri vi dakiywi; ga konya ki?

¹⁷Kandi ndiyo, lisuuvira li ta veye nelikola, li kudzi lyene.

¹⁸Yee, mundu a la vola, Ive u veye nelisuuvira, na inze mbeye nelikola: mmannya lisuuvira lilyo bugira likola lilyo, na inze nda ku mannya lisuuvira lyange ku likola lyange.

¹⁹Ive u suuvira Nyasaye a veye mulala; u kola bulahi: amademone kandi ga suuvira, ni ga degera.

²⁰Navutswa u la manya, Ive mundu u ta li kindu, lisuuvira bugira likola li veye ligumba?

²¹Abrahamu guga wetu, si ya volwa kuva nobulungi ku likola, inyinga ya haana Isaka mwana wewe ku bwali?

²²Ive u lola lisuuvira lya ya kola halala nelikola lilye, noku likola zana lisuuvira lya kolwa lidukiru;

²³kandi mang'oda ga kolwa madukiru aga vola, Abrahamu ya suuvira Nyasaye, kandi ga volwa kuye kuva ubuhlngi; kandi ya langwa mulina wa Nyasaye.

²⁴Mu lolanga mundu a volangwa kuva nobulungi ku likola, si ku li ku lisuuvira lyeng'ine.

²⁵Kandi ndiyo Rahabu wamalaya, si ya volwa kuva nobulungi ku likola, kigira yingiridza avatumwa, na a va twulidza va tsie ku inzira yindi?

²⁶Kigira kuli mubiri bugira mwoyo gu kudzi kandi ndiyo lisuuvira bugira likola li kudzi.