Read lulogooli Yakobo 3 Bible Online

Yakobo 3 - lulogooli bible

Yakobo 3

¹Mu ta va avegidzi vanyingi, avamitu, mu manya ku la nyola likalagirwa linene kuvita.

²Kigira kwosi kwikigitala ku vindu vinyingi. Mundu u tikigitala ku livola a veye mudukiru, u nyalanga kwigalira nelijamu, mubiri gwosi.

³Kunangwa ni ku viha majamu getsiparasi mu minwa gyatsyo tsi duke kukuhulira, ku tsi girunkananga kandi mubiri gwatsyo gwosi.

⁴Henza bwato kandi, kali bu veye bunene ndi nokuhilwa nembuudza inene, navutswa bu girunkannyangwa nesukani inkekeke, kutsia hosi hobulaliri bwomuhili bwenya.

⁵Kandi ndiyo ululimi lu veye kivero kikekeke, nalwo lwiidzominya ku vindu vinene. Muhenze kuli tsinku tsi veye tsinyingi tsyaakidzangwa nomuliru mukekeke

⁶Kandi ululimi lu veye muliru: Iirova lyobudamano ku vivero vyetu li veye lulimi, nilwo lu vikanga kivihiri ku mubiri gwosi, nokwaakidza ligenda lyosi lyelilombwa, nalwo lwaakidzangwa negehena.

⁷Kigira tsing'ano tsyosi tsyenyama netsyamanyonyi, netsyetsinyama tsi molanga, netsyevindu vyomu inyanza, va tsi tuga kandi avandu va tsi tuga:

⁸navutswa lulimi si ha li nomundu kali mulala u nyala kulutuga; lu veye ubudamano bu ta lekera, lwizuye ubusungu obwiitanga.

⁹Ku gasidzanga Mwami nalwo naye ni Dada; kandi ku laamanga avandu nalwo ava lombwa ku lifwana lya Nyasaye:

¹⁰ligasidza nelilaama li twula ku munwa mulala. Avamitu, si bu li bulahi vindu yivi vi ve ndiyo.

¹¹Kidaho kilala ki senula amadzi makindu namalulu?

¹²Avamitu, mukuyu gu nyala kwama mizeituni, kinga muzabibu gwama makuyu? Kandi amadzi gomunyu si ga nyala kusenula makindu.

¹³Ibwaha u veye mugeeri nowelimanya ku mwinye? A lang'aminye ku liva lilahi lilye mu miyinzi gyigye mu buhooma bwobugeeri.

¹⁴Navutswa ni mu va ni mu veye nembodoka indulu nelihangalidzana mu myoyo gyenyu, mu tiidzominya kandi mu ta vola ububehi ku geligali.

¹⁵Ubugeeri yibu si bu veye bu twulanga igulu, navutswa nobwa hasi, nobwomwoyo gwomundu, nobwa mademone.

¹⁶Kigira hembodoka i veye nelihangalidzana, ha zana kivihiri ki veye ho nemiyinzi gyosigyetsisoni.

¹⁷Navutswa ubugeeri bu twulanga igulu, mu litanga bu veye buniiu, nobwemirembe, nobwobuhokya, nobwobuhuliridzi, nobwezuye tsimbabasi na makuyu malahi, obu ta li nelyahulannya, obu ta li nobugadi.

¹⁸Likuyu lyobulungi li midzeywi mu mirembe ku yavo ava kolanga mirembe.