Read lulogooli 1 Petro 5 Bible Online

1 Petro 5 - lulogooli bible

1 Petro 5

¹Kigira yaga nzeganehidza avakulundu velivugana ava veye ku mwinye, inze u veye mukulundu wakye wavo, nomuloli wobusaliri bwa Kristo, kandi u veye musangi wobukumi bu li lang'aminywa.

²Mu linde kyayo kya Nyasaye ki veye ku mwinye, nokukihenza, ga ta va ku linigwa, navutswa ku mwoyo gwobuyanzi, kuli ubulaliri bwa Nyasaye: kandi ga ta va kigira linyola ubutugi budamano, navutswa nomwoyo gwobugulu;

³kandi ga ta va kuli mwekola avanene ku va vikwa ku mwinye, navutswa mwekole kuva avokuhenzera ku vekyayo.

⁴Kandi Mwayi munene lwa a lang'aminywa, mu la vugula itaji yobukumi i ta kamuluka.

⁵Kandi ndiyo mwinye avanyerere, mwegehidze ku vakulundu venyu. Kandi mwinye vosi mwivike ubwegehidzi, mu duke kutumekirana avene navene: kigira Nyasaye a hingiranga avigingiri, navutswa avegehidzi a va hedzanga tsimbabasi.

⁶Mwegehidze avene ku mukono gwetsingulu gwa Nyasaye, a duke kumunenehidza mu inyinga i duka;

⁷mu vike kuye kihenda mwoyo kyenyu kyosi, kigira a lindanga mwinye.

⁸Mu ve nobugeeri, mu linde: kigira musigu wenyu kuli king'ang'a ki fwumanga, a tsitsanga yiyi neyiyi ni yenya wa a nyala kumira:

⁹mu hing'ane naye mu singire nobuluviriri mu lisuuvira lyenyu, ni mu manya ubusaliri zana yibwo bu kolanga mu vamwavo venyu vomulirova.

¹⁰Kandi Nyasaye wetsimbabasi tsyosi wa langa mwinye mu duke kunyola ubukumi bwibwe bwemihiga nemihiga mu Kristo, lwa mu mali kusaliridzwa inyinga inkekeke, mwene a la mu kola avadukanu, nokumusingeridza, nokumuvika tsingulu.

¹¹Ubunene bu ve kuye mihiga nemihiga. Amini.

¹²Mmu ng'odera mwinye amakuva makekeke, nokumuletera mu mukono gwa Silvano amitu wetu musuuvirifu, nungikidza mwinye nokumulolekidzira, yitsi nitsyo tsimbabasi tsyeligali tsya Nyasaye: mwedinyeridze mutsyo.

¹³Uyu mutovole we Babuloni halala nemwinye, a mu chelidza; kandi Marko mwana wange.

¹⁴Mu chelidzane nelibusa lyobuyanzi. Mirembe gyi ve ku mwinye vosi ava veye mu Kristo.