Read lulogooli 2 Petro 1 Bible Online

2 Petro 1 - lulogooli bible

2 Petro 1

¹Simoni Petro, mutugwa nomutumwa wa Yesu Kristo, ibaruua yange i duke ku ava nyoye lisuuvira lilala lyere lyobulahi halala nekwinye, mu bulungi bwa Nyasaye wetu, Muhonnyi wetu Yesu Kristo:

²Tsimbabasi tsi ve ku mwinye nemirembe gyingihidzwe mu limanya lya Nyasaye nelya Yesu Mwami wetu

³kigira tsingulu tsitsye tsyo Bunyasaye tsya ku ha vindu vyosi vi dukananga mu livamwoyo nomu litibwa lya Nyasaye, kigira limanya lya uyu wa ku langira ku bunene kuvita bwobukumi bwibwe mwene;

⁴ku yaga ya ku ha lisuuviridza lilye lilahi nelinene ligali; ku yilyo mu duke kuva avasangi aveliva lyo Bunyasaye, kigira mu hononoki ku bwoneku bu veye mu lirova kigira likayirwa.

⁵Yee, kandi kigira yaga mu mede ku luvega lwenyu ubugulu bwosi, mu lisuuvira lyenyu mu tese mu buluviriri, nomu buluviriri bwenyu mu tese mu limanya;

⁶nomu limanya lyenyu mu tese mu lyelinda, nomu lyelinda mu tese mu lyekudzira; nomu lyekudzira lyenyu mu tese mu litibwa lya Nyasaye;

⁷nomu litibwa lya Nyasaye lyenyu mu tese mu liyanza avamwavo; nomu liyanza avamwavo mu tese mu ubuyanzi.

⁸Kigira vindu yivi ni vi veye vyenyu nokukira, vi la mu kola mu vule kuva avagata kandi ava tama makuyu kuduka ku limanya Mwami wetu Yesu Kristo.

⁹Kigira uyu u daka vindu yivi a veye muboku, u lolanga vi veye himbi vyeng'ine nokwivirira litakaswa lyobwoni bwibwe bwa kale.

¹⁰Kigira yaga, avamitu, mu kole ubugulu kuvita mu duke kukola lilangwa lyenyu nelitovolwa lyenyu li ve netsingulu ligali: kigira ni mu kola yaga mu la vula kwikigitala hosi:

¹¹kigira ndiyo mu la hebwa nobuhaani lingira mu bwami bwemihiga nemihiga bwo Mwami wetu Muhonnyi Yesu Kristo.

¹²Kigira yaga ndetegeka madiku gosi kumwidzulitsa vindu yivi, kali ni mu vi manya, nokuguluhidzwa mu geligali ga mu veye nago.

¹³Kandi ng'anagana nu bulahi, inyinga ya mmenya mu lihema yili, kumuvukidza nokumwidzulitsa;

¹⁴kigira mmanya livika haluvega lihema lyange lidza bwangu, kuli Mwami wetu Yesu Kristo ya mmannya.

¹⁵Yee, nda kola ubugulu mwinye kazozo, inyima yelitsia lyange, mu duke kwidzulira vindu yivi.

¹⁶Kigira si kwa londa tsing'ano tsya lombwa nobugeeri, inyinga kwa mu mannya tsingulu tsyelidza lyo Mwami wetu Yesu Kristo, navutswa kwa li avaloli vobunyale bwibwe.

¹⁷Kigira ya nyola ku Nyasaye Dada lidzominywa nobukumi, lwa gwa duka kuye mwoyo gu twula mu Bukumi Ubunene, Uyu niye Mwana wange muyanze wange, u nyanzidzanga:

¹⁸kandi mwoyo yigu kwinye avene kwa hulira gu twula migulu, lwa kwa li halala naye mu kigulu kitakatifu.

¹⁹Kandi ku veye nelikuva lyobuprofeti li koleywi kuva netsingulu kukira, lya mu koli bulahi ni mu li huliridza, kuli itaya yaakanga ha kisundi, kuduka bu luha bu kya, kandi ing'ereng'ani ya mugamba i loleka mu myoyo gyenyu;

²⁰mu tanga kumanya likuva yili, si ha veye nobuprofeti bwamang'oda bu veye nobulohidzi bwomundu.

²¹Kigira ubuprofeti si bwa dukira ku bulaliri bwomundu: navutswa vandu va twula ku Nyasaye va vola aga Roho Mutakatifu ya va tsuviridza.