Read lulogooli 1 Yohana 5 Bible Online

1 Yohana 5 - lulogooli bible

1 Yohana 5

¹Ku vosi u suuvira Yesu ni Kristo, yivulwa kutwula ku Nyasaye: kandi u yanza wa mwivula, a yanza kandi wivulwa kutwula kuye.

²Ku yaga ku manya kwinye ku yanza avana va Nyasaye, lwa ku yanza Nyasaye kandi kukola amalago gege.

³Kigira yibwo nu buyanzi bwa Nyasaye, ku gumire amalago gege: kandi amalago gege si ga li malitu mba.

⁴Kigira ku vyosi kivulwa kutwula ku Nyasaye ki guuta vyomkivala: yili ni liguuta lya guuta vyomkivala, lisuuvira lyetu.

⁵Kandi ibwaha uyu u guuta vyomkivala navutswa u suuvira Yesu nu Mwana wa Nyasaye?

⁶Uyu niye uudzi ku inzira yamadzi namasahi, Yesu Kristo; si ga li amadzi geng'ine, navutswa namadzi namasahi. Kandi niye Roho u lolekidza, kigira Roho noweligali.

⁷Kigira vavaka va ve avelolekidzi migulu, Dada ne Inkuva na Roho Mutakatifu, na yavo vavaka va veye mulala.

⁸Kandi va veyo vavaka va lolekidza mu lirova, navo ni Roho, namadzi, namasahi: kandi yava vavaka va hambana mu mulala.

⁹Ni ku bugirira lilolekidza lyavandu, lilolekidza lya Nyasaye li veye linene kuvita: kigira lilolekidza lya Nyasaye ni yili, u mali kulolekidza ku Mwana wewe.

¹⁰U suuvira Mwana wa Nyasaye a veye nelilolekidza muye; u ta suuvira Nyasaye u mali kumukola mubehi; kigira si ya suuvira lilolekidza lya Nyasaye a lolekidza ku Mwana wewe.

¹¹Kandi lilolekidza ni yili, Ya ku ha livamwoyo li ta hera mba, kandi livamwoyo yili li veye mu Mwana wewe..

¹²U veye no Mwana a veye nelivamwoyo yili; u ta li no Mwana wa Nyasaye si a li neliva mwoyo yili.

¹³Vindu yivi nda mu ng'odera mwinye mu suuvira lieta lyo Mwana wa Nyasaye, mu duke kumanya mu veye nelivamwoyo li ta hera mba.

¹⁴Kandi yibu nu buluviriri bwa ku veye nabwo imbiri wewe, ni ku saala kindu kuli ubulaliri bwibwe, a ku hulira:

¹⁵kandi ni ku manya a ku hulira ku vyosi vya ku saala, ku manya ku veye na visaave vya ku saala kuye.

¹⁶Mundu na a lola amwavo wewe na a kola ubwoni bu ta li bwelikudza, a la saala, na Nyasaye a la mu heera livamwoyo kigira yava ava kola ubwoni bu ta li bwelikudza. Ubwoni bu veyo bwelikudza: si mbola a saale kubwo.

¹⁷Aga ta lungika gosi ga veye ubwoni: ubwoni bu veyo ubu ta duka ku likudza.

¹⁸Ku manya, ku vosi wivulwa kutwula ku Nyasaye si a kola ubwoni; navutswa wivulwa ku twula ku Nyasaye yelinda, na mudamano si a mu dira mba.

¹⁹Ku manya ku veye ava twula ku Nyasaye, kandi avomkivala vosi va gona mu mudamano.

²⁰Kandi kwinye ku manya Mwana wa Nyasaye uudzi, kandi u mali kukuha ubugeeri, ku duke kumanya uyu u veye weligali; kandi kwinye ku veye muye a veye weligali mu Mwana wewe Yesu Kristo. Uyu ni Nyasaye weligali, nelivamwoyo li ta hera mba.

²¹Avana vakekeke vange, mwelinde avene ku misambwa.