Read lulogooli Vakalagi 1 Bible Online

Vakalagi 1 - lulogooli bible

Vakalagi 1

¹Lwa Joshua ya mala kukudza, avana va Israeli va teva Yahova, ni va vola, Ibwaha ku kwinye a la tanga kutwulira Vakanani, ku lwane navo?

²Na Yahova ya vola, Yuda a lanegira: henza, mali kuvika kivala yikyo mmukono gwigwe.

³Na Yuda ya volera Simeoni amwavo wewe, Hamba wanegire halala ninze mu kidieli kyange, ku duke kulwana na Vakanani yavo; na inze nda tsia halala nive mu kidieli kikyo. Kunangwa Simeoni ya tsia halala naye.

⁴Na Yuda yanegira; na Yahova ya vika Vakanani, na Vaperizi, mmukono gwavo: navo va kuya kuvo avandu tsielfu likumi mu Bezeki.

⁵Na va nyola Adoni-bezeki mu Bezeki; na va lwana naye, na va kuya Vakanani na Vaperizi.

⁶Navutswa Adoni-bezeki yiruka; na va mu londerera, ni va mu gumira, na va mu kalaga videte vinene vivye nevino vivye vinene.

⁷Na Adonibezeki ya vola, Avami makumi gatano nagaviri ava kalagwa videte vyavo vinene nevino vyavo vinene, va dola vyokulia vyavo isi wemeza yange: kuli nda kola Nyasaye u ntungi ndiyo. Na va mu leta Yerusalemi, na a kudzera yo.

⁸Kandi avana va Yuda va lwana na Yerusalemi, ni va li guuta, ni va li kuya nobwogi bwekivavi, na va li samba nomuliru.

⁹Na lwenyima avana va Yuda va sulunguta kulwana na Vakanani ava menya mu kivala kyevigulu, nomu kivala kya Kusini, nomu kivala kyekereremu.

¹⁰Kandi Yuda ya twulira Vakanani ava menya mu Hebironi (lieta Hebironi matsyambiri lya langwa Kiriathu-arba); na va kuya Sheshai, na Ahiman, na Talmai.

¹¹Nokutwula yaho ya twulira avamenyi Debiri. (Lieta lya Debiri ku matsyambiri lya langwa Kiriathu-seferi.)

¹²Na Kalebu ya vola, Uyuu kuya Kiriathu-seferi, nokuliguuta, nda mu sererera mukana wange Akisa a ve mukali wewe.

¹³Na Othinieli mwana wa Kenazu, amwavo muke wa Kalebu, ya li guuta: naye ya mu ha Akisa mukana wewe a ve mukali wewe.

¹⁴Kunangwa, lwa ya tsia kumenya naye, ya mu goonya a saale dada wewe mulimi: nomukali yika ku isukiri yeye; na Kalebu ya mu teva, Wenya ki?

¹⁵Naye ya mu volera, U mpe ubugasu; kigira ive u mbiki mu kivala kya Kusini, kunangwa u mpe visenukiru vyamadzi. Na Kalebu ya mu ha visenukiru vyamadzi vyegulu nevyahasi.

¹⁶Navana va Mukeni, mukwasi wa Musa, vanegira kutwula mu lidala lyamakindu halala navana va Yuda kuduka mwigendanyama lya Yuda, li veye kusini wa Aradi; ni va tsia kumenya halala navandu yava.

¹⁷Na Yuda ya tsia halala namwavo wewe Simeoni, navo va kuya Vakanani ava menya Zefathu, ni vononnya lidala ligali. Nelieta lyelidala yili li langwa Horma.

¹⁸Kandi Yuda ya guuta Gaza halala netsinzako tsyalyo, na Ashikelon halala netsinzako tsyalyo, na Ekiron netsinzako tsyalyo.

¹⁹Na Yahova ya li halala na Yuda; na ya kunga avamenyi mkivala kyevigulu; navutswa si ya nyala kukunga avamenyi mwivona, kigira va li namagari gekivya.

²⁰Na va ha Kalebu Hebironi, kuli Musa ya vola: naye ya kunga ha zana avana vavaka va Anaki.

²¹Navana va Benjamini va vula kukunga Vajebusi ava menya ha Yerusalemi; navutswa Vajebusi va menya halala navana va Benjamini mu Yerusalemi kuduka lero.

²²Navenyumba ya Yosefa, vanegira kutwulira Beth-eli; na Yahova ya li halala navo.

²³Ma avenyumba ya Yosefa va tuma avandu va tsie kuiata Beth-eli. (Lieta lyelidala yilyo ku matsyambiri lya langwa Luz.)

²⁴Navaluti va lola mundu na a twulanga mu lidala, navo va mu volera, Mwadza, u ku mannye hokwingira helidala yili, naku la ku kolera bulahi.

²⁵Naye ya va mannya hokwingira helidala; navo va kuya lidala nobwogi bwekivavi; navutswa va leka mundu uyu a hone na aviko veve vosi.

²⁶Naye ya tsia mu kivala kya Vahiti, na yombaka lidala, na ya li gulika lieta lyelidala Luz, li veye lieta lyalyo kuduka lero.

²⁷Na Manase ya vula kukunga avamenyi Beth-shean na madala galyo, kandi yavo avamenyi Taanaka na madala galyo kandi avamenyi Dori na madala galyo, kandi avamenyi Ibileam na madala galyo, kandi avamenyi Megido na madala galyo; navutswa Vakanani va lalira kumenya mu kivala yiki.

²⁸Ma ga duka, lwa Israeli va nyola tsingulu, va vika ku Vakanani miyinzi gyobushutu, na va vula kuvakunga ligali.

²⁹Na Efiraim si ya kunga Vakanani ava menya mu Gezeri; navutswa Vakanani va menya mu Gezeri hagati havo.

³⁰Zebuloni ya vula kukunga ava menya ha Kitiron, kinga yavo ava menya ha Nahaloli; navutswa Vakanani va menya hagati havo, navo va nigwa ku miyinzi gyobushutu.

³¹Asheri ya vula kukunga avamenyi Ako, kinga avamenyi Sidone, kinga va Ahalabu, kinga va Akiziba, kinga va Heliba, kinga va Afiki, kinga va Rehobu;

³²Vaasheri va menya hagati ha Vakanani, ava menya mkivala; kigira si va va kunga mba.

³³Nafitali ya vula kukunga avamenyi Beth-shemeshi, kinga avamenyi Beth-anathu; navutswa ya menya hagati ha Vakanani, ava menya mkivala: navutswa avamenyi ha Beth-shemeshi navamenyi Bethanathu va kola miyinzi gyobushutu.

³⁴Na Vaamori va niga avana va Dan va tsie mkivala kyevigulu; kigira si va va bugirira va sulungute mwivona;

³⁵navutswa Vaamori va lalira kumenya mu kigulu kya Heresu nomu Aijalon, nomu Shaalibim: navutswa mukono gwenyumba ya Yosefa gwa guuta, kuduka va va niga kukola miyinzi gyobushutu.

³⁶No lwako lwa Vaamori lwa li kutwula ku kyanegiru ki tsia Akirabim, kutwula ku lwanda, na igulu walwo.