Read lulogooli Vakalagi 14 Bible Online

Vakalagi 14 - lulogooli bible

Vakalagi 14

¹Na Samsoni ya sulunguta kutsia Timina, na ya lola mukana mulala ha Timina ku avakana va Vafilisiti.

²Naye yanegira, na a volera dada wewe na mama wewe, na a vola, Ndoli mukana ha Timina ku avakana va Vafilisiti: kunangwa kalunu mu vugulire inze mukana uyu a ve mukali wange.

³Hene yaho dada wewe na mama wewe va mu volera, Si ha veye nomukana ku avakana va vamwavo vovo, kinga mu avandu vange vosi, u duke kutsia kukwa mukali wa Vafilisiti avatakevwa? Na Samsoni ya volera dada wewe, U vugulire inze mukana uyu; kigira u nyanzidzi ligali.

⁴Navutswa dada wewe na mama wewe va vula kumanya inkuva yiyi ni ya Yahova; kigira yenyanga kivuni ku Vafilisiti. Inyinga yeyo Vafilisiti va li ni vamehanga ku Israeli.

⁵Na Samsoni ya sulunguta, na dada wewe na mama wewe, kutsia Timina, na va duka mmilimi gyemizabibu gya Timina: na henza king'ang'a kisoleli kya mu humira.

⁶Roho wa Yahova ya duka ku Samsoni netsingulu, na ya tandula king'ang'a kuli a tandula kimeme; na si ya li nekindu mu mukono gwigwe mba; navutswa si ya volera dada wewe na mama wewe ga ya kola.

⁷Na ya sulunguta, na a volerana nomukana; nomukana zana ya yanzidza Samsoni ligali.

⁸Na lwenyima yirana a duke kumbugula; naye ya govera kuhenza mubiri gweking'ang'a zana: na, henza, mulumbi gwetsinzuki gu veye mu king'ang'a kikudzu, nobwuki.

⁹Naye ya vugula ubwuki mmakono gege, na a tsia imbiri, na a lia lwa a gendanga; na a duka ku dada wewe na mama wewe, na a va ha ku, ni va lia: navutswa si ya va volera a vuguye ubwuki yibu mu king'ang'a kikudzu mba.

¹⁰Na dada wewe ya sulunguta ku mukana uyu: na Samsoni ya lomba yo lilia, kigira ni ndiyo avasoleli va kolanga.

¹¹Na ga duka, lwa va mu lola, va mu letera avakye makumi gavaka va ve halala naye.

¹²Na Samsoni ya va volera, Inze nda kupa mwinye lugano: ni mu va ni mu mbuulira mmadiku gatano na gaviri agelilia, nokulumanya, ma nda mu ha tsikanzu makumi gavaka tsyekatani netsingubo tsindi makumi gavaka,

¹³navutswa ni mu va ni mu ta nyala kumbuulira, ma mwinye mu la mba tsikanzu makumi gavaka tsyekatani, netsingubo tsindi makumi gavaka, na va mu volera, Kupa lugano lulwo ku duke kuluhulira.

¹⁴Na ya va volera Mu uyu u litsanga vi twula vyokulia, Nomu uyu a wetsingulu bu twula ubunolu. Na si va nyala ku madiku gavaka kuvuula lugano.

¹⁵Na ga duka ku lidiku likola gatano na kaviri, va volera mukali wa Samsoni, U goonye musatsa wowo nobugadi, a duka kukuvuulira lugano, gase ku la ku samba nomuliru, ive nenyumba ya dada wowo: mwa ku langa kuduka kukudakidza? Si ga veye ndiyo?

¹⁶Na mukali wa Samsoni ya lira imbiri wewe, na a vola, Ive u ndunyiranga, si u nyanza mba: u kupiye avana vavandu vange lugano, na si u mboleye ku mba. Naye ya mu volera, Henza, si mboleye dada wange kinga mama wange, kunangwa mbolere ive?

¹⁷Naye ya lira imbiri wewe madiku gatano na gaviri, lwa lilia lyavo li kikiri ho: na ga duka ku lidiku lya gatano na gaviri, ya mu volera, kigira ya li na a mu kiri ligali; naye ya volera avana vavandu veve, lugano.

¹⁸Navandu velidala va mu volera ku lidiku lya li gatano na gaviri, liuva ni li kikiri kuyera, Ni kindu ki ki veye kinolu kuvita ubwuki? Kandi nekindu ki ki veye netsingulu ki vita king'ang'a? Naye ya va volera, Mwinye mu va mwa vula kulima neroli yange, Ngano si mwa manya lugano lwange.

¹⁹Roho wa Yahova ya duka kuye netsingulu, na ya sulunguta Ashikelon, na ya kuya avandu makumi gavaka mu avandu yavo, na a vugula vilanye vyavo, na a ha ava vuula lugano tsingubo. Nobutima bwibwe bwaaka, na yanegira kutsia ku inyumba ya dada wewe.

²⁰Navutswa wakye wa ya kola kuva mulina wewe ya serererwa mukali wa Samsoni.