Read lulogooli Vakalagi 16 Bible Online

Vakalagi 16 - lulogooli bible

Vakalagi 16

¹Na Samsoni ya sulunguta Gaza, na ya lola yo mulaya mulala, na yingira hehe.

²Na Vagaza va volerua, Samsoni udzi hano. Navo va mu kumbiridza, ni va mu goneka ha kiribwa kyelidala ubudiku bwosi, ni va kiring'ana ubudiku bwosi, na va vola, Ku linde bu luhe bu kye, ma ku la mwiita.

³Na Samsoni ya gona kuduka budiku hagati, na ya vuka hagati hobudiku, na a gumira ulwidzi lwekiribwa kyelidala, na yiha maliva gakyo gombi, halala nemiluguyu gyakyo, na a ginga ku mavega gege, na a lu hila ku intongi ye kigulu ki henza Hebironi.

⁴Na ga duka lwenyima, Samsoni ya yanza wekikali mwivona lya Soreku, lieta lilye lya langwa Delila.

⁵Navanene va Vafilisiti va tsia ku mukali uyu, ni va mu volera, U mu goonye nobugadi, u duke kulola tsingulu tsitsye tsinene tsi veye mu kindu ki, kandi ku la mu guuta naki, kuduka kumboha nokumulegeridza: na kwinye sa mulala ku la ku ha ifetha elfu ne mia indala.

⁶Na Delila ya volera Samsoni, Mwadza, mbolera, tsingulu tsitsyo tsinene tsi veye mu kindu ki, kandi u nyala kubofwa nekindu ki kuduka avandu va ku legeridze.

⁷Samsoni ya mu volera, Ni va mboha nemigoye gyitano negyiviri mivisi gyi kikiri kwuma, ma nda va mudedekere, nda va kuli mundu wundi.

⁸Navanene va Vafilisiti va mu letera migoye gyitano na gyiviri mivisi, gya li ni gyi kikiri kwuma, naye ya mu bohera.

⁹Naye ya li navagoneki ni vikaye mbwasi. Naye ya mu volera, Vafilisiti va veye ku ive, Samsoni. Naye ya kalannya migoye zana, kuli uluvusi lwepamba lu kalika lwa lu dira muliru. Na ndiyo tsingulu tsitsye si tsya manyekana.

¹⁰Kandi Delila ya volera Samsoni, Ive u nkoleye kikenyehenye, nokumbolera bubehi: kalunu mwadza, mbolera, u nyala kubofwa nekindu ki.

¹¹Naye ya mbolera, Ni va mboha nemigoye mihya miyere, gya va kikiri kukola miyinzi nagyo, ma nda va mudedekere, nda leng'ana nomundu wundi.

¹²Ma Delila ya vugula migoye mihya, na a mu bohera, na a mu volera, Vafilisiti va veye ku ive Samsoni. Na vagoneki va li ni vikaye mbwasi. Naye ya gyi kalannya gyi twula ku makono gege kuli luvusi.

¹³Delila ya volera Samsoni, Ive, kuduka kalunu u nkoleye kihenyehenye, nokumbolera bubehi: u mbolere u nyala kubofwa nekindu ki. Naye ya mbolera, Nu u va nu u navil'a boyove butano nobuviri bwelisu lyo ku mutwe gwange mu buvusi bwengubo.

¹⁴Naye ya bu boha ku kisala, na ya mu volera, Vafilisiti va veye ku ive, Samsoni. Naye ya vuka ku tsindolo tsitsye, ni yiha kisala kyomusala halala nobuvusi.

¹⁵Nomukali ya mu volera, U voye ndi, Nku yanzanga, nomwoyo gugwo si gu ve halala ninze? U nkolera kihenyehenye hali kavaka ndi, na si u mboleye tsingulu tsitsyo tsinene tsi veye mu kindu ki.

¹⁶Na ga duka, lwa ya mu nyankidza madiku gosi na makuva gege, nokumugoonya, mwoyo gwigwe gwa henda kuduka likudza.

¹⁷Naye ya mu volera gosi aga li mu mwoyo gwigwe, na a mu volera, Lugembe si lwa duka ku mutwe gwange; kigira inze mbeye Munaziri wa Nyasaye kutwula munda mwa mama wange: ni mba ni mbegwa, hene yaho tsingulu tsyange tsi la ndeka, na nda va mudedekere, nda leng'ana nomundu wundi.

¹⁸Na lwa Delila ya lola u mu voleye gosi aga li mu mwoyo gwigwe, ya tuma na a langa avanene wa Vafilisiti, na a vola, Hambi mwanegire inyinga indala yiyi, kigira u mboleye gosi aga veye mmwoyo gwigwe. Hene yaho avanene va Vafilisiti vanegira kutsia ku mukali, na va leta ifetha mmakono gavo.

¹⁹Na ya mu kola a ve tsindolo ku masigamo gege; naye ya langa mundu, na ya vega boyove butano nobuviri ku mutwe gwigwe; ma mukali uyu ya tanga kumudambidza, netsingulu tsitsye tsya mu leka.

²⁰Nomukali uyu ya mu volera, Vafilisiti va veye ku ive, Samsoni. Naye ya vuka mu tsindolo tsitsye, na a vola, Inze nda twula kuli nda kola tsinyinga tsindi, nzinyire. Navutswa si a manya Yahova u mu leki.

²¹Na Vafilisiti va mu gumira, nokumuhudula tsimoni; na va sulunguta naye kutsia Gaza, na va mboha neviboheru vyomugasa; naye ya sia mu inyumba yavahambe.

²²Navutswa lisu lyomutwe gwigwe lya tanga kumera inyima welivegwa lilye.

²³Ma vanene va Vafilisiti vevungidza va duke kuhaana ku Dagon munyasaye wavo kihaanwa kinene, nokusangala; kigira va vola, Munyasaye wetu u viki Samsoni musigu wetu mmakono getu.

²⁴Na lwa avandu va mu lola, vidzominya munyasaye wavo; kigira va vola, Munyasaye wetu u viki musigu wetu mmukono gwetu, uyu wononnya kivala kyetu, wiita avandu vanyingi ku kwinye.

²⁵Na ga duka, lwa myoyo gyavo gya sangala, va vola, Mu lange Samsoni, a duke kukukolera ubukino. Navo va langa Samsoni kutwula mu inyumba yavahambe; na ya kina n imbiri wavo. Na va mu vika a singire hagati hetsitiru tsiviri:

²⁶na Samsoni ya volera musoleli wa mu gumira mukono, Ndeka mbambe ku tsitiru tsyenyumba yiyi yikala ku, nduke kwesedema ku.

²⁷Nenyumba zana ya li ni yizuye avandu avasatsa navakali; navanene vosi va Vafilisiti va li mu; na va li ho igulu wenyumba kuli avandu tsielfu tsivaka, avasatsa navakali, ava henzanga ha zana lwa Samsoni ya kinanga.

²⁸Na Samsoni yanira Yahova, na a vola, O Yahova Nyasaye, u nzidzulitse, nku saala, u mbe tsingulu mwadza, inyinga indala yiyi vutswa O Nyasaye, nduke kwevanzira kisalya ku Vafilisiti kigira tsimoni tsyange tsyombi.

²⁹Na Samsoni ya vugula tsitiru tsyombi tsya hagati tsyenyumba yikala ku, na yesedama kutsyo, indala ku mukono mulungi, neyindi ku mukono mosi.

³⁰Na Samsoni ya vola, Ndeka nkudze halala na Vafilisiti yava. Na yinama netsingulu tsitsye tsyosi; nenyumba ya gwa ku vanene, na ku vosi ava li muyo. Kunangwa avakudzi va yiitira mu likudza lilye va li vanyingi kuvita ava yiitira mu livamwoyo lilye.

³¹Kunangwa avamwavo veve nenyumba yosi ya dada wewe va sulunguta, ni va mbugula, ni va tsia kumuta hagati ha Zora na Eshitaoli mu hokuta ha dada wewe Manoa. Na ya kalaga mu Israeli mihiga makumi gaviri.