Read lulogooli Vakalagi 18 Bible Online

Vakalagi 18 - lulogooli bible

Vakalagi 18

¹Mmadiku yago si ha li nomwami mu Israeli: kandi mmadiku yago ihiri ya Dan venya miyandu va nyole hokumenya; kigira kuduka lidiku yilyo miyandu gya li ni gyi kikiri kuduka kuvo hagati hetsihiri tsya Israeli.

²Navana va Dan va tuma aviko vavo vatano mu livalidzwa lyavo lyosi, avasatsa va luviriri, kutwula Zora, nokutwula Eshitaoli, va duke kuluta kivala, no kukimanyeridza, na va va volera, Mu tsie, kumanyeridza kivala yikyo. Navo va duka mu kivala kyevigulu kya Efiraim, kuduka ku inyumba ya Mika, ni va gona ho.

³Na lwa va li himbi nenyumba ya Mika, va manya mwoyo gwomusoleli uvu Mulevi; na va govera ni va tsia yo, nokumuteva, Ni bwaha wa ku leta hano? Na u kolanga kindu ki hano? Na u veye nekindu ki hano?

⁴Naye ya va volera, Mika a nkoleye ndi na ndi, nokulagana ninze, mbeye musalisi wewe.

⁵Na va mu volera, Mwadza, u ku tevere likuva lya Nyasaye, ku duke kumanya inzira yetu ya ku tsia ku, i la gasidzwa.

⁶Nomusalisi ya va volera, Mu tsie nemirembe: inzira ya mu tsia ku, i veye imbiri wa Yahova.

⁷Hene yaho avasatsa vatano yavo va tsia, ni va duka Laishi, na va lola avandu va li mulyo, kuli va menya bulahi, bugira ubutii, kuli miima gya Vasidone, avobwelemeridzi nemirembe; kigira si ha veye nomundu mu kivala yikyo wa li netsingulu, kuvalegannya mu vindu vyosi, na va li ihale na Vasidone na si va kirannya nomundu kali musala.

⁸Ma virana ku vamwavo vavo ha Zora na Eshitaoli: na vamwavo vavo va va teva Mu vola ki?

⁹Navo va vola, Mu singire, ku tsie kulwana navo; kigira ku loli kivala yikyo, henza ki veye kivala kilahi ligali: na mwinye mu kiring'ana? Mu ta va avagata kugenda nokwingira mu duke kugumira kivala yikyo.

¹⁰Lwa mu tsia, mu la duka ku avandu va menyanga bulahi, nemirembe, no ku kivala kinene: kigira Nyasaye u mu heye mmakono genyu; ha veye ha ta gehera kindu kali kilala kyo mu lirova.

¹¹Kunangwa va twula ho, avasatsa tsimia tsitano na indala avevyuma vyobulwani avo bwiko bwa Vadan, kutwula Zora nokutwula Eshitaoli.

¹²Na vanegira kusingeridza mahema gavo mu Kiriathu jearim, mu Yuda: kigira yaga va gulika ha zana Mahane-dan kuduka lero; henza, ha veye ha inyima ha Kiriathu-jearim.

¹³Na va vita yo kuduka mu kivala kyevigulu kya Efiraim, na va duka ha inyumba ya Mika.

¹⁴Hene yaho avandu vatano yavo, ava tsia kuluta kivala kya Laishi, va tivula ni va volera vamwavo vavo, Mwinye mu manya kisibao ki veye mu tsinyumba yitsi, nevifwananyi, nakifwananyi kyokuvadzwa, nekifwa nanyi kyokutulwa? Kalunu mu ganagane aga mu dukira kukola.

¹⁵Na va govera, ni va tsia ku inyumba yomusoleli Mulevi, kuduka ku inyumba ya Mika, na va mu chelidza.

¹⁶Avasatsa tsimia tsitano na indala avevyuma vyobulwani, ava li avana va Dan, va singira hokwingira hekiribwa.

¹⁷Navandu vatano ava tsia kuluta kivala yikyo, vanegira nevingira yo, nokuvugula kifwananyi kyo kuvadzwa, nekisibao, nevifwananyi, nekifwananyi kyokutulwa: nomusalisi zana ya singira hokwingira hekiribwa, halala navasatsa tsimia tsitano na indala avevyuma vyobulwani

¹⁸Navo lwa Yingira mu inyumba ya Mika kuleta kifwananyi kyokuvadzwa, nekisibao, nevifwananyi, nekifwananyi kyokutulwa, nomusalisi ya va teva, Mwinye mu kolanga ki?

¹⁹Navo va mu volera, Kiring'ana, vika mukono gugwo ku munwa gugwo u tsie halala ne kwinye, u ve ku kwinye dada nomusalisi: bu veye bulahi ku ive kuva musalisi mu inyumba yomundu mulala, naho kuva musalisi mu ihiri nobwiko mu Israeli?

²⁰Nomwoyo gwomusalisi uyu gwa sangala, na ya vugula kisibao, nevifwananyi, nakifwananyi kyokuvadzwa, na ya tsia hagati ha avandu yavo.

²¹Na va girunkana na va tsia, navana nemitugu gyavo neviju vyavo va vimiridza.

²²Na lwa va duka ihale kutwula ku inyumba ya Mika, avasatsa va li mu tsinyumba tsya li himbi ku inyumba ya Mika va vuganywa halala, na va va londerera avana va Dan nokuvanyola.

²³Na va langa avana va Dan. Navo va girunkannya mumoni mwavo, nokuvolera Mika, U veye naki, kigira u ku londerera nekiduma kuli yiki?

²⁴Naye ya vola, Mu vuguye avanyasaye vange va nda lomba, nomusalisi, na mu tsie, na mbeye naki kandi kuvita? Na mwinye mu ntevera ki, U veye naki?

²⁵Navana va Dan va mbolera, Mwoyo gugwo gu vule kuhulirwa hagati hetu, gase ava veye nobutima va la ku gwira, na u gote livamwoyo lilyo nelivamyoyo lyavenyumba yoyo.

²⁶Navana va Dan va tsia: na Mika lwa ya lola va ve ne tsingulu tsyokumguuta, ya girunkana ni yirana wewe.

²⁷Na va vugula vya Mika ya lomba, nomusalisi wa ya li naye, na va duka Laishi, ku avandu va li nobwelemeridzi bugira ubutii: va va kuya nobwogi bwekivavi, na va samba lidala lyavo nomuliru.

²⁸Na si ha li nomuhonnyi, kigira lidalayilyo lya li ihale Sidone, na si va kirannya nomundu kali mulala; na lya li mu livona li veye himbi Beth-rehobu. Na vombaka lidala, nokumenya mu.

²⁹Ni va li gulika lidala Dan, kulonda lieta lya guga wavo Dan, yivulwa ku Israeli: navutswa lieta lyelidala yilyo ku matsyambiri lya langwa Laishi.

³⁰Avana va Dan va singeridza kifwananyi kyokuvadzwa: na Jonathan, mwana wa Gerishom, mwana wa Musa, uyu navana veve va li avasalisi ku ihiri ya Dan kuduka ku lidiku lyelilanywa lyekivala.

³¹Va singeridza kifwananyi kyokuvadzwa kya Mika ya lomba, tsinyinga tsyosi tsyenyumba ya Nyasaye ya li ha Shilo.