Read lulogooli Vakalagi 19 Bible Online

Vakalagi 19 - lulogooli bible

Vakalagi 19

¹Kunangwa mmadiku yago, lwa ha li bugira mwami mu Israeli, ya li ho Mulevi mulala wa li menya ku luvega lwembiri wekivala kyevigulu kya Efiraim, ya vugula musuria mu Beth-lehemu-yuda.

²Na musuria wewe zana ya londa malaya, na a mu leka a tsie mu inyumba ya dada wewe ha Beth-lehemu-yuda, na ya menya ho myeli gyine.

³Ma musatsa wewe ya singira, na a mu londerera, kumuvolera nobulina, a duke kumuleta kandi, na ya li nomutumekiri wewe halala, netsisukiri tsiviri: nomukali zana ya mwingeridza mu inyumba ya dada wewe; na dada womkana lwa ya mu lola, ya sangala kulolana naye.

⁴Na navizala wewe; dada womukana, ya mwigalira; na ya menya naye madiku gavaka: va lia nokunwa, nokugona yo.

⁵Na ga duka ku lidiku lya gane, va vuka mabwebwe, na a twula a tsie: na dada womukana ya volera navizala wewe, U leminye mwoyo u lie vyokulia vikekeke, ma inyima mu la tsia.

⁶Na vikala, ni va lia nokunwa, vombi halala: na dada womukana ya volera musatsa uyu, Mwadza, u bugirire kuhonga hano budiku bwosi, nomwoyo gugwo gu sangale.

⁷Na musatsa uyu ya singira a twule ho; navutswa navizala wewe ya mu goonya, na a gona ho kandi.

⁸Ma ya vuka mabwebwe lidiku lya gatano a duke kutsia; na ise womukana ya vola, Mwadza, u leminye mwoyo, mu linde kuduka mgolova; na va lia, vombi.

⁹Na lwa musatsa uvu va singira a tsie, uyu, an musurla wewe, nomutumekiri wewe, navizala wewe, dada womukana, ya mu volera, Henza, mugamba gwisundanga mgolova, nku goonya u linde buluhe bu kye: henza, mugamba gwisundanga ku kiheri kyagwo, gona hano, mwoyo gugwo gu sangale; nomugamba u la tsia mabwebwe, u duke kutsia wenyu.

¹⁰Navutswa musatsa uyu si ya bugirira kulinda ubudiku yibwo, navutswa ya singira na a tsia, na ya duka himbi Jebusi (ha veye Yerusalemi): na ya li halala naye tsisukiri tsiviri tsya lombwa tsyokuginga; na musuria wewe ya li naye.

¹¹Na lwa va li himbi Jebusi, bwa li ni bwenya kwira; namutumekiri ya volera munene wewe, Mwadza, nku goonya, ku govere kwingira mu lidala yili lya Vajebusi, ku gone mu.

¹²Nomunene wewe ya mu volera, Si ku la govera nokwingira mu lidala lya vamenya, ava ta li ku avana va Israeli; navutswa ku lambuka kutsia Gibea.

¹³Na ya volera mutumekiri wewe, Kwisunde mu lilala ku yaga; ku la gona mu Gibea, kinga mu Rama.

¹⁴Na va vita kutsia imbiri; na liuva lya yera ni va veye himbi Gibea, li veye lya Benjamini.

¹⁵Na va govera kutsia ho, kwingira nokugona mu Gibea: na yingira mu, na yikala ku inzira inene yelidala; kigira si ha li nomundu kali mulala wa vingeridza mu inyumba yeye kugona.

¹⁶Na, henza, ya loleka musakulu, kutwula mu miyinzi gyigye mmulimi inyinga yamgolova: na musakulu uyu ya li wekivala kyevigulu kya Efiraim, na ya li mumenya ha Gibea; navutswa avandu va ha zana va li Vabenjamini.

¹⁷Na lwa ya ginga tsimoni tsitsye, ya lola mundu mugendi ku inzira yelidala; na musakulu ya mu teva, U tsitsanga haliha? Na u twula haliha?

¹⁸Naye ya mbolera, Kwinye ku vitanga hano kutwula Bethlehemu-yuda ku tsitsanga ku luvega lwehale lwekivala kyevigulu kya Efiraim; niyo wa nda twula, na nda tsia Beth-lehemu-yuda: na kalunu ntsitsanga ku inyumba ya Yahova; na si ha veye nomundu u nyingeridzanga mu inyumba yeye.

¹⁹Navutswa ku veye nobunyasi nevyokulia vyetsisukiri tsyetu; kandi ku veye nobukima newaini ku inze, na uyu mukana mutugwa wowo, noku musoleli u veye halala nekwinye avatumekiri vovo: si ha veye nelyenya lyek ndu.

²⁰Nomusakulu ya vola, Mirembe gyi ve ku ive; navutswa lyenya lyenyu lyosi li veye ku inze, navutswa yaga geng'ine, mu vule kugona ku inzira.

²¹Ma ya mu leta mu inyumba yeye, na ya mu ha vyokulia vyetsisukiri; na va savidza virenge vyavo, na va lia nokunwa.

²²Na lwa va sangalidza myoyo gyavo, henza, avandu avasatsa velidala, avalala avana vadamano, va kumberidza inyumba yeye tsimbega tsyosi, nokuduya muliango; na va volera munene wenyumba, musakulu, nokumuvolera, U lete kyova musatsa u duki mu inyumba yoyo, ku duke kumumanya.

²³Nomundu uyu, munene wenyumba, ya tsia kuvo kyova, nokuvavolera, Auwa, si ga li ndiyo avamitu, mmu goonya, mu ta kola budamano kuli yibu; kigira musatsa uyu wingiye mu inyumba yange, mu ta kola ubusiru yibu.

²⁴Henzi, mukana wange mugima, nomusuria womundu uyu, nda va leta kyova ku mwinye kalunu, mu va gehidzi, nokuvakolera aga mu lola ga veye malahi: navutswa musatsa uyu mu ta mu kolera inkuva yobusiru kuli yibu.

²⁵Navutswa vasatsa yavo si va bugirira kumuhulira: ma musatsa uyu ya gumira musuria wewe nokumuleta kyova kuvo; na va mmanya, nokumukolera budamano ubudiku bwosi kuduka mugamba: na lwa bwa tanga kukya, va mu leka na a tsia.

²⁶Hene yaho mukali uyu yadza mugamba tsuri, na a gwa hasi ha kiliango kyomusatsa uyu, ha musatsa wewe ya li kuduka bwa kya.

²⁷Musatsa wewe ya vuka mugamba, ni yigula muliango gwenyumba, na a twula a duke kutsia; henza, mukali musuria wewe ya li na a gwiye ha muliango gwenyumba, na makono gege ga li ha mukingi.

²⁸Naye ya mbolera, Vuka, ku tsie; navutswa si ya bugirira: hene yaho ya mu ginga na a mu vika ku isukiri; ma mundu uyu ya twula, na a tsia wewe.

²⁹Na lwa ya duka mu inyumba yeye, ya vugula mbano, na a gumira musurla wewe, na a mu donnya vivero, vidonye likumi neviviri, na a mu hila mu tsinzako tsvosi tsya Israeli.

³⁰Kunangwa, lwa vosi va lola inkuva yeyo va vola, Inkuva kuli yiyi i kikiri kukolwa kinga kuloleka kutwula ku lidiku lyavana va Israeli vanegira kutwula mu kivala kya Egepeti kuduka lero: mu ganagane, mu kole makuva, mu vole.