Read lulogooli Vakalagi 20 Bible Online

Vakalagi 20 - lulogooli bible

Vakalagi 20

¹Inyinga yeyo avana va Israeli vosi va samula, nelivugana lya vuganwa kuli mundu mulala, kutwula Dan kuduka Beer-sheba, halala nekivala kya Gileadi, va vugana ku Yahova ha Mizipa.

²Avanene vavandu yavo, va veye avanene vetsihiri tsyosi tsya Israeli, vevungidza avene mu livugana lyavandu va Nyasaye avasatsa tsielfu tsimia tsine ava genda nevirenge ava somola vivavi.

³(Navandu va Benjamini va hulira avana va Israeli vanegiye kutsia Mizipa.) Navana va Israeli va vola, U ku volere, ubudamano yibwo bwa kolwa ndi?

⁴Na Mulevi, musatsa womukali wiitwa, ya tivula na a vola Inze nda duka Gibea li veye mmiyandu gya Benjamini, inze na musuria wange, ku duke kugona.

⁵Navasatsa va Gibea va ntwulira, nokukumbiridza inyumba tsimbega tsyosi ku inze inyinga yobudiku; va ganagana kunziita, na musuria wange va mwononnya, na a kudza.

⁶Na nda vugula musuria wange, nokumudonnya vidonye, nokumuleta mu kivala kyosi kyemiyandu gya Israeli; kigira va i kola ubudamano ubunene nobusiru mu Israeli.

⁷Henzi, mwinye avana va Israeli, mwosi, mu volere hano inkuva yenyu na makuva genyu.

⁸Navandu vosi va vuka kuli mundu mulala, ni va vola, Kwinye si ha veye nomundu ku kwinye u nyala kwirana mu lihema lilye, kinga si ha veye nomundu ku kwinye u nyala kugirunkana kutsia mu inyumba yeye.

⁹Navutswa inkuva ya ku li kolera Gibea ni yiyi: ku lanegira kulwana nalyo nikura;

¹⁰na ku la vugula avasatsa likumi ku mia ku tsihiri tsyosi tsya Israeli, navandu mia ku elfu, na elfu ku tsielfu likumi va duke kutsia kuvugulira avandu vyokulia lwa va duka ku Gibea lya Benjamini, va duke kukola kuli ubusiru bwosi ubwa va kolera mu Israeli.

¹¹Kunangwa avasatsa vosi va Israeli va vugana halala ku lidala lilyo, na va hambana kuli mundu mulala.

¹²Netsihiri tsya Israeli va tuma avasatsa va tsia ku ihiri yosi ya Benjamini, ni va vola, Ni budamano ki bwa li hagati henyu?

¹³Kunangwa kalunu mu twulidze avandu yava, avadamano, va veye mu Gibea ku duke kuviita, nokutwulidza ubudamano mu Israeli. Navutswa Benjamini si va bugirira kuhulira mwoyo gwavamwavo vavo avana va Israeli.

¹⁴Navana va Benjamini vevungidza avene halala kutwula mu madala kuduka Gibea, kutsia kulwana navana va Israeli.

¹⁵Navana va Benjamini va validzwa ku lidiku yili kutwula mu madala, avasatsa tsielfu makumi gaviri na tsitano na indala avevivavi, kuvita yava ava menya mu Gibea, ava validzwa avandu avasatsa avatovolwa tsimia tsitano na tsiviri.

¹⁶Mu avandu yavo vosi va veye mu avasatsa tsimia tsitano ne tsiviri ava tovolwa avomukono mmosi; sa mulala a nyala kulasa magina nolukova ku kigero kyelisu, na si li nyala kuvita.

¹⁷Navasatsa va Israeli, bugira Benjamini, va validzwa tsielfu tsimia tsine avevivavi: yavo vosi va li avandu vobulwani.

¹⁸Navana va Israeli va vuka, ni vanegira kutsia Belh-eli, ni va teva likuva ku Nyasaye; ni va vola, Ni bwaha ku kwinye va la tanga kwanegira kutsia kulwana navana va Benjamini? Na Yahova ya vola, Yuda a la tanga kwanegira.

¹⁹Navana va Israeli va vuka mugamba, na va singiridza mahema gavo ku Gibea.

²⁰Navasatsa va Israeli va twula va duke kulwana na Benjamini; navasatsa va Israeli va lomba lihe kuvo ha Gibea.

²¹Navana va Benjamini va twula Gibea, navo va dividza avasatsa ku lidiku yili tsielfu makumi gaviri ne tsiviri ku va Israeli.

²²Navandu, vasatsa va Israeli, veluviridza avene, ni va lomba lihe hali kaviri ha zana ha velombera lidiku lyokutanga.

²³Navana va Israeli vanegira nokulira imbiri wa Yahova kuduka mgolova; na va teva Yahova, ni va vola, Nzisundi himbi kandi kulwana na avana va Benjamini amwavo wange? Na Yahova ya vola, Mwanegire mu tsie kulwana naye.

²⁴Kunangwa avana va Israeli visunda kulwana navana va Benjamini lidiku lya kaviri.

²⁵Na Benjamini ya twula kulwana navo kutwula Gibea lidiku lya kaviri, na ya dividza kandi avandu vasatsa tsielfu likumi na tsitano na tsivaka mu avana va Israeli, yavo vosi va li avevivavi.

²⁶Hene yaho avana va Israeli vosi, navandu vosi, vanegira, na va tsia Beth-eli, nokulira, na vikala ho imbiri wa Yahova, na va honga lilia lidiku yilyo kuduka mgolova; na va haana vihaanwa vyokusambwa, nevihaanwa vyemirembe imbiri wa Yahova.

²⁷Navana va Israeli va teva kandi ku Yahova (kigira lisanduku lyamalago ga Nyasaye lya li yo madiku yago,

²⁸na Finehasi mwana wa Eleazaru, mwana wa Haruni, ya li na a singira imbiri welisanduku mmadiku yago), na ya vola, Ntwule kandi ntsie kulwana navana na Benjamini amwavo wange, naho ndeke? Na Yahova ya vola, Mwanegire; kigira mugamba nda mu twulidza nokumuvika mmukono gugwo.

²⁹Na Israeli va vika avandu va goneke Gibea ku likumbiridza tsimbega tsyosi.

³⁰Navana va Israeli vanegira kutsia kulwana navana va Benjamini ku lidiku lya kavaka, na velombera lihe kulwana na Gibea, kuli va kola tsinyingi tsindi.

³¹Navana va Benjamini va twula kulwana navandu yavo, na va kweswa kutwula ku lidala; na va tanga kukuya nokwiita avandu, va duka kuli makumi gavaka avasatsa va Israeli, kuli va kola tsinyingi tsindi, mu mahasi, lilala li tsitsanga Beth-eli, ne lindi Gibea mu mulimi.

³²Navana va Benjamini va vola, Va kuywi imbiri wetu, kuli matsyambiri. Navutswa avana va Israeli va vola, Kwiruke, na ku va kwese va twule ku lidala kuduka ku mahasi.

³³Navasatsa vosi va Israeli va vuka kutwula ha va li, nokwelomberera lihe ha Baal-tamaru: na va goneki va Israeli va twula ha va li, kuli kuduka Maaregeba.

³⁴Na vadza ku Gibea avandu tsielfu likumi avatovolwa ku Israeli vosi, ubulwani bwa gwa budinyu; na si va manya ubudamano bwisundanga himbi kuvo.

³⁵Na Yahova ya kuya Benjamini imbiri wa Israeli; avana va Israeli va dividza va Benjamini lidiku yilyo avandu tsielfu makumi gaviri ne tsitano navandu mia: vosi ava li vevivavi.

³⁶Kunangwa lwa avana va Benjamini va lola ni va kuyiywi; kigira avasatsa va Israeli va lekera Benjamini ubwiyangu, kigira va li nelisuuvira ku yavo avagoneki ava va vika inyima wa Gibea.

³⁷Navagoneki yavo va kola bwangu, nokuvuka ku Gibea; navagoneki va salana, na va kuya lidala lyosi nobwogi bwekivavi.

³⁸Nalilolekidza lya tovolwa hagati Israeli navagoneki ni yili, va lombe lilesi linene lyomwoki li twule mu lidala.

³⁹Avasatsa va Israeli va girunkana ku bulwani, na Benjamini ya tanga kukuya nokwiita avasatsa va Israeli kuli avandu makumi gavaka; kigira va vola, Ligali va kuywa imbiri wetu, kuli matsyambiri.

⁴⁰Navutswa lwa lilesi lya tanga kuvuka kutwula mu lidala kuli itiru yomwoki, ava Benjamini va henza inyima wavo; henza, lidala lyosi lya nina igulu mu mwoki kutsia mwigulu.

⁴¹Navasatsa va Israeli va girunkana, navasatsa va Benjamini va henda mwoyo; kigira va lola budamano bu duka kuvo.

⁴²Kunangwa va girunkana migongo gyavo imbiri wavasatsa va Israeli kuhenza ku inzira yekyangalangwi; navutswa bulwani bwa va londa budinyu; na yavo ava twula mu madala va va dividzira hagati hago.

⁴³Va kumbiridza Vabenjamini tsimbega tsyosi, nokuvakunga, nokuvaduvaga ha va sosera, kuduka Gibea ku luvega lwebutwuliru bweliuva.

⁴⁴Va gwa avasatsa va Benjamini avandu tsielfu Iikumi na tsitano na tsivaka; vosi va li avandu avasatsa avaluviriri.

⁴⁵Navo va girunkana navirukira ku luvega lwekyangalangwi kuduka ku lwanda lwa Rimon: na va dola vyang alika mu avandu yavo mu mahasi avasatsa tsielfu tsitano, va va londerera nubudinyu kuduka Gidom, na va kuya avandu avasatsa tsielfu tsiviri ku yavo.

⁴⁶Kunangwa livalidza lyosi lyavandu va Benjamini ava gwa lidiku yilyo va li avandu makumi gaviri na gatano avasatsa avevivavi; yavo v osi va li avandu avaluviriri.

⁴⁷Navutswa avasatsa tsimia tsitano na indala va girunkana ni virukira ku luvega lwekyangalangwi kuduka ku lwanda lwa Rimon, na va menya mu lwanda lwa Rimon myeli gyine.

⁴⁸Navasatsa va Israeli va girunkana kutsia kandi ku avana va Benjamini na va va kuya nobwogi bwekivavi lidala lyosi nemitugu gyelidala, noku vyosi vya va lola: na kandi madala gosi ga va lola va ga samba nomuliru.