Read lulogooli Vakalagi 7 Bible Online

Vakalagi 7 - lulogooli bible

Vakalagi 7

¹Hene yaho Jerubaal, u veye Gideoni, navandu vosi va li halala naye, va vuka mabwebwe, na va singeridza mahema gavo himbi nomugera gwa Harodi: nalihe lyosi lya Midiani lya li ku luvega lwa kasikasini, himbi nekigulu kya More, mwivona.

²Na Yahova ya volera Gideon, Avandu va veye halala nive va veye vanyingi ligali, inze si nyala kuvika Vamidiani mmakono gavo, gase Israeli va legingira ku inze, nokuvola, Mukono gwange mwene gwa mbonnya.

³Kunangwa kalunu u tsie kulandidza mu amatu gavandu, nokuvola Ku vosi u veye nobutii nokudegera yirane a twule mkigulu kya Gileadi. Navo virana kuvo avandu tsielfu makumi gaviri na tsiviri, na va tigala tsielfu likumi.

⁴Na Yahova ya volera Gideoni, Kali kalunu avandu va veye avanyingi ligali, u tsie navo mmadzi, na inze nda va geridzira yo kigira ive: na ga la va, uyu wa nku volera, Uyu a la tsia nive, wa zana uyu a la tsia halala nive; kandi ku vosi wa nku volera, Uyu a ta tsia halala nive mba, kunangwa wa zana uyu, a la vula kutsia.

⁵Ma ya sulungutidza avandu yavo mmadzi: na Yahova ya volera Gideoni, Ku vosi u nagira amadzi nolulimi, kuli imbwa i nagiranga, u la mu vika ha luvega; kandi ndiyo ku vosi u nwa na a kupi masigamo hasi.

⁶Na livalidzwa lya yavo ava nagira amadzi, nomukono ku munwa, va li tsimia tsivaka: navutswa avandi vosi va kupa masigamo hasi kunwa madzi.

⁷Na Yahova ya volera Gideoni, Nda mu honnya navo tsimia tsivaka avanagira, na nda vika Vamidiani mmukono gugwo, navandi vosi u va leke va tsie sa mulala hango hehe.

⁸Ma avandu yavo va vugula vyokulia mmakono gavo, navisiliva vyavo; na ya virannya avandu vosi va Israeli sa mulala mu lihema lilye; navutswa ya tigala na yavo tsimia tsivaka: nelihe lya Midiani lya li mwivona hasi havo.

⁹Na ga duka ubudiku yibu, Yahova ya mu volera, Singira, u sulungute ku lihe; kigira inze mmali kulivika mmukono gugwo.

¹⁰Navutswa nu u va nu u tia kusulunguta, u sulungute halala na Pura mutumekiri wowo kuduka ku lihe:

¹¹na u la hulira ga va volanga; na lwenyima makono gogo ga la nyola tsingulu u duke kusulunguta ku lihe. Hene yaho ya sulunguta halala na Pura mutumekiri wewe kuduka ku kiheri kyavandu vasatsa avevika vyuma ava li ku lihe.

¹²Ma Vamidiani na Vaamaleki navana vesi vevugwi ava gona mwivona kuli tsisigi tsinyingi; netsing'amia tsyavo tsya vula kuvalika, kuli umuyeke gu veye ku luginga lwenyanza tsinyingi.

¹³Kunangwa lwa Gideoni ya duka ha zana, henza, mundu mulala ya li ho wa volera wakye amakuva gamaloto ga ya lota; na ya vola, Henza, ndoli liloto; henza, ubukima bukekeke bwashairi bwa gwa mu hokusosa ha Midiani, ni bu duka ku lihema, ni bu li duya ni li gwa, ni bu li tung'aminya kuduka lihema ni li gona magalama.

¹⁴Nowakye uyu ya tivula na a mu volera, Makuva yaga si ga veye kindu kindi navutswa ga veye kivavi kya Gideoni mwana wa Joashu, mundu wa Israeli: Nyasaye u viki Midiani nelihe lyosi mmukono gwigwe.

¹⁵Na ga duka, lwa Gideoni ya a hulira makuva ga maloto, neligiru; nkanywa lyago, ya sigamira Nyasaye; na yirana ku lihe lya Israeli, na a vola, Mu singire; kigira Yahova u viki lihe lya Midiani mmakono genyu.

¹⁶Naye ya gavula avandu tsimia tsivaka va ve viduma vivaka, na ya ha vosi mmakono gavo visiliva, netsinyingu, tsi ta li nekindu mu, navutswa inyingu sa indala ya li mu nekiyai kyomuliru.

¹⁷Naye ya va volera, Mu henze ku inze, na mu kole kuli nkolanga: mu henze, lwa nduka ku kiheri kya hokusosa, ga la va, kuli nkolanga, mu kole ndiyo.

¹⁸Lwa nkupa kisiliva, inze na yavo vosi ava veye halala ninze, ma mwinye mu kupe visiliva vyenyu tsimbega tsyosi tsya hokusosa, nokuvola, Kivavi kya Yahova ne kya Gideoni.

¹⁹Kunangwa Gideoni, navandu mia va li halala naye, va duka ku kiheri kya hokusosa mu litanga lyobulindi bwa hagati ho budiku, lwa va tanga kugirunkannya bulindi: na va kupa visiliva, ni va tannya tsinyingu tsya li mmakono gavo.

²⁰Na viduma vivaka vya kupa visiliva, nokwatannya tsinyingu, ni va gumira viyai mmakono gavo mamosi, nevisiliva mmakono gavo malungi va duke kuvikupa, na va hanzuka, ni va vola, Kivavi kya Yahova nekya Gideon.

²¹Na va singira sa mulala ha bugono hehe kukumberidza hokusosa hosi; nelihe lyosi liruka; navo va kupa luku, ni va va kunga.

²²Va kupa visiliva tsimia tsivaka, na Yahova ya kola kivavi kyomundu sa mulala kuva ku wakye, noku lihe lyosi: nelihe liruka kuduka Beth-shita ku luvega lwa Zerera, kuduka ku lwako lwa Abelimehola, himbi Tabathu.

²³Navandu va Israeli va vungidzwa kutwula Nafitali, nokutwula Asheri, nokutwula Manase vosi, na va londerera Midiani.

²⁴Na Gideoni ya tuma vatumwa mu kivala kyosi kyevigulu vya Efiraim, na a vola, Mu sulungute ku Midiani, na mu gumire amadzi imbiri wavo, kuduka Beth-bara, kali Yordani. Kunangwa avasatsa vosi ava Efiraim va vugana halala, na va gumira amadzi kuduka Beth-bara, kali Yordani.

²⁵Na va gumira avanene vaviri va Midiani, Orebu na Zeebu, na viita Orehu ha lwanda lwa Orebu, na Zeebu va mwiitira ha kyokumina iwaini kya Zeebu, na va londerera Midiani: ni va leta mitwe gya Orebu na Zeebu ku Gideoni engereka ya Yordani.